வாடிக்கையாளர்களை கவர சூப்பர் யுக்தி.. என்ன தெரிஞ்சா நீங்களும் நிறுவனத்தின் இ-ஸ்கூட்டர்களை வாங்க விரும்புவீங்க!

பிரபல மின்சார இருசக்கர வாகன உற்பத்தி நிறுவனமான ஒகாயா இவி (Okaya EV) அதன் புகழ்பெற்ற ஃபாஸ்ட் (Fasst) எலெக்ட்ரிக் ஸ்கூட்டர் மாடலில் இரு புதிய வேரியண்டுகளை விற்பனைக்கு அறிமுகம் செய்திருக்கின்றது. புதிய வேரியண்டுகள் எஃப்2பி (Fasst F2B) மற்றும் எஃப்2டி (Fasst F2T) ஆகிய பெயர்களில் அழைக்கப்படும் என்பது குறிப்பிடத்தகுந்தது.

ஏற்கனவே விற்பனையில் இருந்து வரும் ஃபாஸ்ட் எஃப்4 வேரியண்டுடன் இந்த இரு புதிய வேரியண்டுகளும் தற்போது இணைக்கப்பட்டுள்ளன. இந்திய சந்தையில் எலெக்ட்ரிக் இருசக்கர வாகனங்களுக்கு நல்ல வரவேற்புக் கிடைத்துக் கொண்டிருக்கின்றது. குறிப்பாக, தற்போது தீபாவளிப் பண்டிகையை முன்னிட்டு பலர் புதிய இருசக்கர வாகனங்களைத் தொடங்கியிருக்கின்றனர்.

அந்தமாதிரியானோரை குறி வைத்தே ஒகாயா நிறுவனம் இரு புதுமுக வேரியண்டுகளை அதன் ஃபாஸ்ட் எலெக்ட்ரிக் ஸ்கூட்டர் மாடலில் விற்பனைக்குக் களமிறக்கியிருக்கின்றது. மேலும், வாடிக்கையாளர்களைக் கவரும் சிறப்பு பரிசு திட்டத்தையும் நிறுவனம் அறிவித்துள்ளது.

கார், மடிக்கணினி, டிவி, செல்போன், வெள்ளி நாணயம் மற்றும் பரிசு தொகை போன்றவற்றை வழங்க நிறுவனம் முடிவெடுத்துள்ளது. இந்த சிறப்பு பரிசு திட்டம் வரும் 31 அக்டோபர் வரையில் நடைமுறையில் இருக்கும் என்பது குறிப்பிடத்தகுந்தது. அறிமுக எஃப்2பி வேரியண்டிற்கு ரூ. 89,999ம், எஃப்2டி வேரியண்டிற்கு ரூ. 84,999ம் விலையை நிர்ணயித்துள்ளது ஒகாயா நிறுவனம்.

அதேவேலையில், முன்னதாக ரூ. 89,999 விற்பனைக்குக் கிடைத்து வந்த எஃப்4 வேரியண்டின் விலையை நிறுவனம் தற்போது ரூ. 1.09 லட்சமாக உயர்த்தியிருக்கின்றது. இந்த விலையேற்றம் முன்னதாகவே செய்யப்பட்டுவிட்டதாக தகவல்கள் தெரிவிக்கின்றன. ஒகாயா நிறுவனம் எஃப்4 வேரியண்டைக் காட்டிலும் எஃப்2பி மற்றும் எஃப்2டி வேரியண்டுகளில் குறைந்த திறன் கொண்ட பேட்டரி பேக்கையே பயன்படுத்தியிருக்கின்றது.

இரண்டிலும் 2.2 kWh LFP பேட்டரி பேக்கையே நிறுவனம் பயன்படுத்தியிருக்கின்றது. இந்த பேட்டரி பேக் ஓர் முழு சார்ஜில் 70 முதல் 80கிமீ வரையில் ரேஞ்ஜ் தரும். இதேபோல், மோட்டார் விஷயத்திலும் இரண்டு வேரியண்டுகளிலும் 2000 வாட் எலெக்ட்ரிக் மோட்டாரே பயன்படுத்தப்பட்டிருக்கின்றது.

இந்த மோட்டாரின் டாப் ஸ்பீடு மணிக்கு 70 கிமீ ஆகும். இதே திறனை வெளியேற்றக் கூடியதாகவே ஃபாஸ்ட் எஃப்4 இருக்கின்றது. ஆனால், இதில் 4.4 kWh LFP பேட்டரி பேக் பயன்படுத்தப்பட்டிருக்கின்றது. இந்த பேட்டரி பேக் ஓர் முழு சார்ஜில் 140 முதல் 160 கிமீ வரையில் ரேஞ்ஜ் தரும். இந்த அதிக ரேஞ்ஜ் திறனின் காரணத்தின் காரணத்தினாலேயே ஃபாஸ்ட் எஃப்4 அதிக விலையைக் கொண்டதாகக் காட்சியளிக்கின்றது.

இதைவிட சற்று குறைவான விலையில் மின் வாகன பிரியர்களைக் கவர வேண்டும் என்பதற்காகவே ஒகாயா நிறுவனம் ஃபாஸ்ட் மாடலில் இரு புதிய வேரியண்டுகளை விற்பனைக்குக் கொண்டு வந்திருக்கின்றது. நிறுவனத்தின் இந்த தயாரிப்புகளை பஜாஜ் பின்சர்வ், ஐடிஎஃப்சி ஃபர்ஸ்ட் பேங்க் போன்ற முன்னணி வங்கிகளின் கடன் திட்டத்தில் வாங்க முடியும் என்பது குறிப்பிடத்தகுந்தது.

இதுமட்டுமின்றி இன்னும் சில வங்கிகளுடன் ஒகாயா இணைந்துள்ளது. தன்னுடைய வாடிக்கையாளர்களுக்கு எளிதில் நிதியுதவி கிடைக்கம் விதமாக இந்த இணைப்பை அது மேற்கொண்டிருக்கின்றது. நிறுவனம் தற்போது விற்பனையகங்களின் எண்ணிக்கையை பல மடங்கு உயர்த்தியிருக்கின்றது.

2021 வரை 225க்கும் குறைவாக இருந்த விற்பனையகங்கள் தற்போது 550க்கும் அதிகமாக அதிகரித்திருப்பதாக தகவல்கள் தெரிவிக்கின்றன. இந்த அனைத்து ஷோரூம்களிலும் தற்போது விற்பனைக்கு வந்திருக்கும் புதிய வேரியண்டுகள் விற்பனைக்குக் கிடைக்கும் என நிறுவனம் அறிவித்துள்ளது.