பஜாஜ் பிளாட்டினா போல நல்லா உழைக்கும்... ஃபுல் சார்ஜில் 135 கிமீ பயணிக்கும் பட்ஜெட் விலை இ-பைக் வெளியீடு!

பஜாஜ் பிளாட்டினாவிற்கு இந்த எலெக்ட்ரிக் பைக் டஃப் கொடுக்கும் போலிருக்கே என கூறும் அளவிற்கு மிக சிறப்பான வசதிகளைக் கொண்ட இ-பைக்கை ப்யூர் இவி நிறுவனம் இந்தியாவில் இன்று வெளியீடு செய்தது. இந்த வாகனம் பற்றிய முக்கிய தகவல்கள் அனைத்தும் இந்த பதிவில் பார்க்கலாம் வாங்க.

தெலங்கானா மாநிலம் ஹைதராபாத்தை மையமாகக் கொண்டு இயங்கும் நிறுவனம் ப்யூர் இவி. மின்சார இருசக்கர வாகன உற்பத்தியை மட்டுமே மையமாகக் கொண்டு இயங்கும் நிறுவனம் இது ஆகும். இந்த நிறுவனமே தனது புதுமுக எலெக்ட்ரிக் பைக்கை இந்திய மின் வாகன சந்தையை அலங்கரிக்கும் விதமாக இன்று (டிசம்பர் 15) வெளியீடு செய்துள்ளது. ஈகோ ட்ரிஃப்ட் எனும் புதுமுக மாடல் மின்சார பைக்கையே நிறுவனம் இந்தியாவில் அறிமுகப்படுத்தியுள்ளது.

அறிமுகத்தை முன்னிட்டு மின்சார வாகனம் பற்றிய பல்வேறு சுவாரஷ்யமான மற்றும் முக்கிய தகவல்களை நிறுவனம் வெளியிட்டு உள்ளது. குறிப்பாக, ஓர் ஃபுல் சார்ஜில் எத்தனை கிமீ தூரம் பயணிக்கும், என்ன நிற தேர்வுகள் இதில் வழங்கப்பட உள்ளது போன்ற பல்வேறு முக்கிய தகவல்களையே நிறுவனம் வெளியிட்டு இருக்கின்றது. ப்யூர் இவி ஈகோ ட்ரிஃப்ட் ஓர் ஃபுல் சார்ஜில் 135 கிமீ தூரம் பயணிக்கும்.

இந்த சூப்பரான ரேஞ்ஜை வழங்குவதற்காக 3.0 kWh பேட்டரி பேக் எலெக்ட்ரிக் பைக்கில் பயன்படுத்தப்பட்டு உள்ளது. இந்த பேட்டரி பேக் ஏஐஎஸ் 156 சான்று பெற்றது என்பது குறிப்பிடத்தகுந்தது. தண்ணீர், அதிக வெப்பத்தின் காரணமாக பாதிக்காத வண்ணம் பேட்டரி பேக் வடிவமைக்கப்பட்டுள்ளது. இத்தகைய தரமான வசதிக் கொண்ட இ-பைக்கையே ப்யூர் இவி இந்தியாவில் வெளியீடு செய்துள்ளது. இதனை ஜனவரி முதல் வாரத்தில் இருந்து விற்பனைக்கு வழங்க நிறுவனம் திட்டமிட்டுள்ளது.

ஈகோ ட்ரிஃப்ட் எலெக்ட்ரிக் பைக்கின் டாப் ஸ்பீடு மணிக்கு 75 கிமீ என கூறப்படுகின்றது. ஆனால், இதில் பயன்படுத்தப்பட இருக்கும் மின்சார மோட்டார் பற்றிய முழு விபரங்கள் வெளியிடப்படவில்லை. இதுகுறித்த தகவல் அறிமுகத்தின்போது வெளியிடப்படலாம் என எதிர்பார்க்கப்படுகின்றது. ப்யூர் இவி நிறுவனம் இந்த பைக்கை கம்யூட்டர் ரக வாகனத்தைப் போல் வடிவமைத்துள்ளது. உதாரணமாக பஜாஜ் நிறுவனத்தின் பிரபல இருசக்கர வாகன மாடலான பிளாட்டினாவின் ஸ்டைலை ஒத்தவாறு அது கட்டமைக்கப்பட்டு உள்ளது.

ஆங்குலர் டைப் ஹெட்லேம்ப், ஐந்து ஸ்போக் அலாய் வீல்கள், ஒற்றை துண்டு அமைப்பிலான இருக்கை என முழுக்க முழுக்க தினசரி பயன்பாட்டு வாகனமாக ஈகோ ட்ரிஃப்ட் உருவாக்கப்பட்டிருக்கின்றது. மேலும், இதனை ஒட்டுமொத்தமாக நான்கு விதமான நிற தேர்வுகளில் விற்பனைக்கு வழங்க இருப்பதாக தெரிவித்துள்ளது. பிளாக், கிரே, ப்ளூ மற்றும் ரெட் ஆகிய நிற தேர்வுகளிலேயே அது கிடைக்கும். தினசரி பயன்பாட்டை மையப்படுத்தி வந்த வாகனம் விற்பனைக்கு வர இருப்பதால் இதை நிறுவனம் பட்ஜெட் விலையில் விற்பனைக்கு வங்க உள்ளது.

அந்தவகையில், ரூ. 1.20 லட்சம் அல்லது அதற்கும் குறைவான விலையில் ஈகோ ட்ரிஃப்ட் விற்பனைக்கு வரும் என எதிர்பார்க்கப்படுகின்றது. எனவே விற்பனையில் இந்த பைக் சாதனைப் படைப்பதற்கான வாய்ப்புகளும் உள்ளன. ப்யூர் இவி நிறுவனம் கடந்த சில மாதங்களுக்கு முன்னரே இ ட்ரிஸ்ட் எனும் புதுமுக இ-பைக்கை விற்பனைக்கு அறிமுகப்படுத்தியது. இதற்கு நாட்டு மக்கள் மத்தியில் நல்ல வரவேற்புக் கிடைத்து வருவதாக நிறுவனம் தெரிவித்துள்ளது.

இந்த நிலையிலேயே மற்றுமொரு புதுமுக வாகனத்தைக் கொண்டு இந்தியர்களைக் கவர நிறுவனம் திட்டமிட்டுள்ளது. இ ட்ரிஸ்ட் எலெக்ட்ரிக் பைக்கை நிறுவனம் ரூ. 1.54 லட்சத்திற்கு இந்தியாவில் விற்பனைக்கு அறிமுகப்படுத்தியது. இதனை ஒரு முறை முழுமையாக சார்ஜ் செய்தால் 140 கிமீ தூரம் வரை பயணிக்க முடியும். இந்த ரேஞ்ஜ் திறனுக்காக 3.5 KWH பேட்டரி பேக்கை நிறுவனம் பயன்படுத்தியிருக்கின்றது. இதன் டாப் ஸ்பீடு மணிக்கு 85 கிமீ ஆகும்.

அதிக பணம் கொடுத்து பெட்ரோல் டூ-வீலரை வாங்கும் நபர்கள் ஒன்றரை லட்ச ரூபாய் செலவில் இதை வாங்குவதனால் நல்ல பலனை பெற முடியும் என நிறுவனம் தெரிவித்துள்ளது. அதேநேரத்தில், இந்தியாவின் அனைத்து விதமான சாலைகளுக்கும் உகந்த வாகனமாக வடிவமைக்கப்பட்டுள்ளது. இதுமட்டுமின்றி நவீன கால சிறப்பம்சங்கள் பலவும் இந்த பைக்கில் வழங்கப்பட்டிருக்கின்றன. இதுமாதிரியான மிக சிறப்பான வசதிக் கொண்ட எலெக்ட்ரிக் பைக்காகவே ஈகோ ட்ரிஃப்ட் விற்பனைக்கு வர இருக்கின்றது.