தண்டர்பேர்டு ஸ்டைலில் வருகிறது புதிய இ-பைக்.. 125 கிமீ ரேஞ்ஜ் தரும்.. எப்போ விற்பனைக்கு வருது தெரியுமா?

ஆர்ய ஆட்டோமொபைல்ஸ் (Aarya Automobiles) எனும் புதுமுக நிறுவனம் அதன் முதல் எலெக்ட்ரிக் பைக்கை இந்திய மின் வாகன சந்தையில் விரைவில் விற்பனைக்கு அறிமுகம் செய்ய இருப்பதாக அறிவிப்பு வெளியிட்டு உள்ளது. நிறுவனம் அதன் கமேண்டர் (Aarya Commander) எனும் எலெக்ட்ரிக் பைக்கையே இந்திய சந்தைக்காக தயார்படுத்தி இருக்கின்றது.

இதையே வெகு விரைவில் நாட்டில் அது விற்பனைக்குக் களமிறக்க திட்டம் போட்டு உள்ளது. அடுத்த மாதம் இதன் அதிகாரப்பூர்வ அறிமுக நிகழ்வு அரங்கேற இருப்பதாக தகவல்கள் வெளியாகி உள்ளன. அறிமுகமாக கமேண்டர் எலெக்ட்ரிக் மோட்டார்சைக்கிளுக்கு 1 லட்சத்து 60 ஆயிரம் ரூபாய் விலை நிர்ணயம் செய்யப்பட உள்ளது. இது எக்ஸ்-ஷோரூம் விலை மட்டுமே ஆகும்.

அட இவ்ளோ தூரம் போகுமா!

ஓர் ஃபுல் சார்ஜில் 125 கிமீ தூரம் வரை பயணிக்கும் திறனுடன் எலெக்ட்ரிக் பைக் விற்பனைக்கு வர இருக்கின்றது. இந்த சூப்பரான ரேஞ்ஜ் திறனுக்காக 4.4 kWh லித்தியம் அயன் (lithium-ion) பேட்டரி பேக் கமேண்டர் எலெக்ட்ரிக் பைக்கில் பயன்படுத்தப்பட்டு உள்ளது. இத்துடன், 3 kW திறன் கொண்ட மின் மோட்டாரும் இ-பைக்கில் பயன்படுத்தப்பட்டு இருக்கின்றது. இந்த மோட்டார் அதிகபட்சமாக 4.02 பிஎச்பி-யை வெளியேற்றும் திறன் கொண்டது.

அப்போ ஃபாஸ்ட் சார்ஜிங் மையம்தான் பெஸ்ட்

மேலும், மணிக்கு 90 கிமீ வேகத்தில் அது இயங்கும். எலெக்ட்ரிக் பைக்கை முழுமையாக சார்ஜ் செய்ய 5 மணி நேரங்கள் வரை தேவைப்படும் என நிறுவனம் தெரிவித்துள்ளது. ரெகுலரான சார்ஜிங் கருவியை பயன்படுத்தும் போதே இந்த அளவு அதிக நேரம் தேவைப்படும் என்பது குறிப்பிடத்தகுந்தது. அதேவேளையில், ஃபாஸ்ட் சார்ஜிங் மையங்களைப் பயன்படுத்தி சார்ஜ் செய்தால் பல மணி நேரங்களை மிச்சப்படுத்த முடியும்.

முன் தொகை கட்டணம் எவ்வளவு?

அதாவது, இரண்டு மணி நேரங்களுக்கும் குறைவான நேரத்தில் ஆர்யா கமேண்டரை முழுமையாக சார்ஜ் செய்து கொள்ளலாம். அடுத்த மாதம் இது விற்பனைக்கு வர இருப்பதை முன்னிட்டு இப்போதே ஆர்யா நிறுவனம் புக்கிங் பணிகளைத் தொடங்கி இருக்கின்றது. ரூ. 2,500 முன் தொகையில் புக்கிங்குகள் ஏற்கப்பட்டு வருகின்றன. டெலிவரி பணிகள் வரும் ஏப்ரல் மாதத்திற்குள் தொடங்கிவிடும் என கூறப்பட்டுள்ளது.

இன்னும் ரெண்டே மாசத்துல இதை சாலையில பாக்கலாம்

ஆகையால், ஆர்யா கமேண்டர் எலெக்ட்ரிக் பைக்கை அடுத்த இரண்டு மாதங்களுக்குள் இந்திய சாலைகளில் பார்க்க முடியும் என எதிர்பார்க்கப்படுகின்றது. முதற்கட்டமாக விற்பனை பணிகள் நாட்டின் முக்கியமான முதல் நிலை நகரங்களில் மட்டுமே தொடங்கப்பட உள்ளது. விரைவில் நாடு முழுவதும் உள்ள அனைத்து விதமான நகரங்களில் தொடங்கப்பட இருக்கின்றது. இதற்கான முயற்சியில் ஏற்கனவே ஆர்யா நிறுவனம் களமிறங்கிவிட்டது குறிப்பிடத்தகுந்தது.

இந்த நிறுவனம் குஜராத் மாநிலத்தை மையமாகக் கொண்டு இயங்கி வருகின்றது. இதன் உற்பத்தி ஆலை சூரத்தில் அமைந்திருக்கின்றது. இந்த ஆலை மாதத்திற்கு 5 ஆயிரம் யூனிட்டுகள் எலெக்ட்ரிக் வாகனங்களை தயாரிக்கும் திறன் கொண்டது என்பது குறிப்பிடத்தகுந்தது. ஆர்யா கமேண்டோ எலெக்ட்ரிக் பைக்கில் பல்வேறு சிறப்பு வசதிகளை நம்மால் காண முடிகின்றது. அந்தவகையில், பெரிய டிஜிட்டல் இன்ஸ்ட்ரூமென்ட் க்ளஸ்டர், ப்ளூடூத் இணைப்பு வசதி உடன் வழங்கப்பட்டு இருக்கின்றது.

டிஸ்க் பிரேக் கொடுத்திருக்காங்க

இது தவிர யுஎஸ்பி சார்ஜிங் போர்ட் செல்போன்களை சார்ஜ் செய்து கொள்ள ஏதுவாக வழங்கப்பட்டு இருக்கின்றது. இதுபோன்று இன்னும் பல சிறப்பு வசதிகள் இதில் வழங்கப்பட்டிருப்பதை நம்மால் காண முடிகின்றது. இதுதவிர, மிக சிறந்த பிரேக்கிங் அனுபவத்திற்காக கமேண்டர் எலெக்ட்ரிக் பைக்கில் சிபிஎஸ் பிரேக்கிங் சிஸ்டும், டிஸ்க்குகளும் வழங்கப்பட்டு உள்ளன.

தண்டர்பேர்டோட ஸ்டைல்ல இதை உருவாக்கி இருக்காங்க

இதுதவிர, சிறந்த ரைடிங் அனுபவத்திற்காக ஸ்போர்ட் டெலிஸ்கோபிக் ஃபோர்க் முன் பக்கத்திலும், டூயல் ஸ்பிரிங்குகள் கொண்ட ஷாக் அப்சார்பர் பின் பக்கத்திலும் பயன்படுத்தப்பட்டு உள்ளது. இத்தகைய சூப்பரான பைக்காகவே ஆர்யா கமேண்டர் உருவாக்கப்பட்டு உள்ளது. இதுமட்டுமில்லைங்க, இந்திய இருசக்கர வாகன உலகின் ஃபேமஸான பைக் மாடலான தண்டர்பேர்டை தழுவிய ஸ்டைலில் இந்த எலெக்ட்ரிக் பைக்கை ஆர்யா நிறுவனம் உருவாக்கி இருக்கின்றது.

முகப்பு மற்றும் பக்கவாட்டு பகுதி முற்றிலுமாக தண்டர்பேர்டை பிரதிபலிக்கும் வகையில் இருப்பதை நம்மால் காண முடிகின்றது. ஆகையால், இந்த பைக் தண்டர்பேர்டு பயன்பாட்டாளர்களை வெகுவாக கவரும் என எதிர்பார்க்கப்படுகின்றது.