5 வருஷத்தில் இது மிகப்பெரிய வளர்ச்சி... ஓசூரில் தொழிற்சாலை வெச்ச ஏத்தரின் நெட்வொர்க் பெருசா ஆகிட்டே போகுது!

ஏத்தர் எனர்ஜி (Ather Energy), இந்தியாவின் முன்னணி எலெக்ட்ரிக் இருசக்கர வாகன உற்பத்தியாளர். 2020ஆம் ஆண்டு முதல் எலெக்ட்ரிக் ஸ்கூட்டர்களை விற்பனை செய்ய ஆரம்பித்த ஏத்தர் எனர்ஜி நிறுவனம், இந்தியா முழுவதும் 500க்கும் மேற்பட்ட எக்ஸ்பீரியன்ஸ் சென்டர்களை (EC) திறந்து ஒரு குறிப்பிடத்தக்க மைல்கல்லை எட்டியுள்ளது.

கடந்த சில மாதங்களாக, ஏத்தர் நிறுவனம் தனது எலெக்ட்ரிக் ஸ்கூட்டர்களுக்கான வாடிக்கையாளர் தேவையைப் பூர்த்தி செய்ய, குறிப்பாக ஏத்தரின் முதல் ஃபேமிலி ஸ்கூட்டரான ரிஸ்டாவின் அறிமுகத்திற்கு பிறகு இந்தியாவின் மத்திய மற்றும் வட இந்தியாவில் கவனம் செலுத்தி, தனது நெட்வொர்க்கை வேகமாக விரிவுபடுத்தி வருகிறது.

அதில் புதிய மைல்கல்லாக டீலர்ஷிப் ஷோரூம்களின் எண்ணிக்கையில் 500 என்கிற பிரம்மாண்டமான மைல்கல்லை ஏத்தர் எனர்ஜி கடந்துள்ளது. இந்த புதிய மைல்கல் குறித்து ஏத்தர் எனர்ஜி லிமிடெட் நிறுவனத்தின் தலைமை வணிக அதிகாரி திரு. ரவ்னீத் சிங் ஃபோகெலா கூறுகையில், "500 எக்ஸ்பீரியன்ஸ் சென்டர்களைக் கடப்பது எங்கள் வளர்ச்சிப் பயணத்தில் ஒரு முக்கியப் படியாகும்.

சந்தைகளில் அதிகரித்து வரும் தேவைக்கு ஏற்ப நாங்கள் எங்கள் இருப்பை தொடர்ந்து விரிவுபடுத்துகிறோம். தென்னிந்தியா எங்கள் வலுவான தளமாகத் தொடர்கிறது. அங்கு நாங்கள் சீராக வளர்ந்து வருகிறோம். ரிஸ்டா ஸ்கூட்டரின் வெற்றி மத்திய மற்றும் வட இந்தியாவில் எங்கள் விரிவாக்கத்தை விரைவுபடுத்த உதவியுள்ளது.

இந்த வளர்ச்சி பெருநகரங்களில் மட்டும் அல்ல. டயர்-2 மற்றும் டயர்-3 நகரங்களிலும் நாங்கள் ஆழமாக ஊடுருவி வருகிறோம். அங்கு வாடிக்கையாளர்கள் கொடுக்கும் வரவேற்பு ஊக்கமளிப்பதாக உள்ளது. நாங்கள் தொடர்ந்து வளரும்போது, 2026 நிதியாண்டின் இறுதிக்குள் 700 எக்ஸ்பீரியன்ஸ் சென்டர்களைத் தாண்டும் நோக்கத்துடன், இந்தியா முழுவதும் அதிகமான வாடிக்கையாளர்களுக்கு ஏத்தரை அணுகக்கூடியதாக மாற்றுவதில் எங்கள் கவனம் உள்ளது" என்றார்.

கடந்த மூன்று மாதங்களில் (ஜூன்-ஆகஸ்ட் 2025) மட்டும், ஏத்தர் இந்தியா முழுவதும் தனது நெட்வொர்க்கில் 101 புதிய எக்ஸ்பீரியன்ஸ் சென்டர்களைச் சேர்த்துள்ளது. இதில், 58க்கும் மேற்பட்டவை மத்திய மற்றும் வட இந்தியாவில், உத்தரபிரதேசத்தின் ஆக்ரா, மத்திய பிரதேசத்தின் மாண்ட்சௌர் மற்றும் ஜபல்பூர், ஒடிசாவின் சுந்தர்கர், குஜராத்தின் வதோதரா மற்றும் சத்தீஸ்கரின் பிலாஸ்பூர் போன்ற நகரங்களில் திறக்கப்பட்டுள்ளன.

ஏத்தரின் மார்க்கெட் அதிகமாக இருக்கும் தென்னிந்தியாவிலும், ஏத்தர் நிறுவனம் ஒரு வலுவான சில்லறை விற்பனை நெட்வொர்க்கைக் கட்டியெழுப்பியுள்ளது. மேலும் இது சீராக விரிவடைந்து வருகிறது. கூடுதலாக, கோழிக்கோடு, இந்தூர், நாசிக், கோயம்புத்தூர், குண்டூர், ஹல்த்வானி, சத்தாரா, கோட்டா, காங்க்ரா மற்றும் அய்ஸ்வால் உள்ளிட்ட டயர்-2 மற்றும் டயர்-3 நகரங்களிலும் ஏத்தர் தனது நெட்வொர்க்கை ஆழப்படுத்துகிறது.

இது ஏத்தர் எலெக்ட்ரிக் ஸ்கூட்டர்களை பரந்த அளவிலான வாடிக்கையாளர்களுக்கு அணுகக்கூடியதாக மாற்றும். ஏத்தர் தனது சில்லறை சேல்ஸ் நெட்வொர்க்கின் விரிவாக்கத்துடன், ஏத்தர் கோல்ட் சேவை மையங்கள் உட்பட தனது சர்வீஸ் நெட்வொர்க்கையும் தொடர்ந்து விரிவுபடுத்துகிறது.

பல ஆண்டுகளாக, ஏத்தரின் சில்லறை விற்பனை நெட்வொர்க் மகாராஷ்டிரா, கர்நாடகா, கேரளா மற்றும் தமிழ்நாடு போன்ற மாநிலங்களுடன் வளர்ந்துள்ளது. ஒவ்வொரு மாநிலத்திலும் 50க்கும் மேற்பட்ட ஏத்தர் எக்ஸ்பீரியன்ஸ் சென்டர்கள் உள்ளன. நகர அளவில், பெங்களூரு 18 ஏத்தர் எக்ஸ்பீரியன்ஸ் சென்டர்களுடன் முன்னணியில் உள்ளது.

அதைத் தொடர்ந்து புனே மற்றும் ஹைதராபாத் தலா 13, டெல்லி 9 மற்றும் மும்பை மற்றும் சென்னை தலா 8 ஏத்தர் எக்ஸ்பீரியன்ஸ் சென்டர்கள் உள்ளன. இந்த சில்லறை விற்பனை விரிவாக்கம் வலுவான வாடிக்கையாளர் தேவை மற்றும் அதிகரித்து வரும் சந்தைப் பங்கு ஆகியவற்றால் ஆதரிக்கப்படுகிறது.

ஏத்தரின் தேசிய சந்தைப் பங்கு 2025 நிதியாண்டின் முதல் காலாண்டில் 7.6% ஆக இருந்தது. இது 2026 நிதியாண்டின் முதல் காலாண்டில் 14.3% ஆக உயர்ந்துள்ளது. மத்திய இந்தியாவில், ஏத்தரின் பங்கு கடந்த ஒரு ஆண்டில் 2.6 மடங்கு அதிகரித்து 10.7% ஆக உயர்ந்துள்ளது. இது விரைவான சில்லறை விற்பனை விரிவாக்கத்தால் ஏற்பட்டது.

ஏத்தர் 2025 நிதியாண்டின் முதல் காலாண்டில் 22.8% சந்தைப் பங்கைக் கொண்டு தென்னிந்தியாவில் தனது தலைமையை தக்க வைத்துக் கொண்டுள்ளது. ஏத்தரின் தற்போதைய தயாரிப்பு பட்டியலில் 450 சீரிஸ் எலெக்ட்ரிக் ஸ்கூட்டரும் உள்ளது. இது செயல்திறனுக்காக வடிவமைக்கப்படுகிறது. மேலும் ஏத்தரின் முதல் குடும்ப ஸ்கூட்டரான ரிஸ்டா, பாதுகாப்பு, வசதி மற்றும் சௌகரியத்திற்காக உருவாக்கப்பட்டுள்ளது.

டிரைவ்ஸ்பார்க் கருத்து: பெங்களூருவை தலைமையிடமாக கொண்டு செயல்படும் ஏத்தர் எனர்ஜி நிறுவனம், இந்தியாவின் முன்னணி எலெக்ட்ரிக் 2-வீலர் நிறுவனமாக உருவெடுக்க தொடர்ந்து தனது எக்ஸ்பீரியன்ஸ் செண்டர்களின் நெட்வொர்க்கை விரிவுப்படுத்தி வருகிறது. இதில் தற்போது 500 என்கிற எண்ணிக்கையை கடந்திருக்கும் ஏத்தர் நிறுவனம் 1000 என்கிற எண்ணிக்கையை விரிவுப்படுத்தும் கால வெகு தொலைவில் இல்லை.