ஓலாவின் மார்க்கெட்டை காலி பண்ண ரெடியாகும் ஏத்தர்! ஓசூரில் தான் உற்பத்தி... அறிமுகம் எப்போது?

பெங்களூரைச் சேர்ந்த எலெக்ட்ரிக் இருசக்கர வாகனத் தயாரிப்பு நிறுவனமான ஏத்தர் எனர்ஜி (Ather Energy), கடந்த ஆகஸ்ட் 30ஆம் தேதி தனது '2025 சமூக தின' நிகழ்வில் 'இ.எல்01' (EL01) கான்செப்ட் ஸ்கூட்டரைக் காட்சிப்படுத்தியதை பார்த்து இருப்பீர்கள் என நினைக்கிறேன். ஏத்தரின் புதிய இஎல் பிளாட்ஃபார்ம் அடிப்படையிலான இது, நிறுவனத்தின் வரவிருக்கும் மலிவு விலையிலான எலெக்ட்ரிக் ஸ்கூட்டர்களுக்கு அடிப்படையாக அமையும் என அறிவிக்கப்பட்டது.

இந்த நிலையில் தற்போது, இஎல்01 கான்செப்ட் உடன் ஒத்த ஒரு எலெக்ட்ரிக் ஸ்கூட்டருக்கான வடிவமைப்புக்கான காப்புரிமையை ஏத்தர் இந்தியாவில் பதிவு செய்துள்ளது. இது, வரவிருக்கும் மலிவு விலை ஸ்கூட்டராக சந்தையில் அறிமுகம் செய்யப்பட வாய்ப்புள்ளது. ஏத்தரின் தற்போதைய 450 மற்றும் 'ரிஸ்டா' (Rizta) எலெக்ட்ரிக் ஸ்கூட்டர்கள் ஒற்றை பிளாட்ஃபார்மில் உருவாகப்படுகின்றன.

ஆனால், இஎல்01 கான்செப்ட்டின் அடிப்படையிலான புதிய இஎல் பிளாட்ஃபார்ம் ஆனது ஏத்தரின் மிகவும் லட்சியமான திட்டம் ஆகும். இதன் மாடுலார் தன்மை, குறைந்தது மூன்று புதிய எலெக்ட்ரிக் ஸ்கூட்டர்களை உருவாக்க உதவும். இது பல்வேறு இவி வகைகளுக்கு ஏற்றதாக அமையும். இஎல்01 கான்செப்ட் போலவே, சமீபத்திய காப்புரிமை வடிவமும் குடும்பப் பயன்பாட்டிற்கான ஸ்கூட்டராக உள்ளது.

இந்த ஸ்கூட்டரின் வடிவமைப்பு நேர்த்தியாக உள்ளது. ஹேண்டில்பார் சுற்றிய கௌலில் ஹெட்லைட்டுகள், முன்புற அப்ரானில் அகலமான LED DRL உடன் டர்ன் இண்டிகேட்டர்கள் இடம்பெற்றுள்ளன. குடும்ப ஸ்கூட்டர் என்பதால், இதில் தட்டையான ஃப்ளோர் போர்டு மற்றும் ஸ்டோரேஜ் இட வசதிகள் உள்ளன. படி அமைப்புடன், பிரிக்கப்படாத இருக்கை மற்றும் பின் இருக்கையில் பயணிப்பவர்களுக்கான பேக்ரெஸ்ட் ஆகியவையும் உண்டு.

இந்த வடிவம் 'டிவிஎஸ் ஆர்பிட்டர்' (TVS Orbiter) ஸ்கூட்டரை நினைவூட்டுகிறது. கடந்த ஆகஸ்ட் மாதத்தில் இஎல்01 கான்செப்ட்டில் இல்லாத கண்ணாடிகள், தற்போது காப்புரிமை செய்யப்பட்ட உற்பத்தி மாடலில் சேர்க்கப்பட்டுள்ளன. பக்கவாட்டு பேனல்களில் உள்ள ஒற்றை கோடு அமைப்பு தனித்துவமான அழகியலை வழங்குகிறது. இஎல்01 கான்செப்ட்டில் இருந்த நியான் நிறத் தீம், உற்பத்தி மாடலிலும் தொடர வாய்ப்புள்ளது.

சக்கரங்களைப் பொறுத்தவரை, இது டிவிஎஸ் ஆர்பிட்டர் ஸ்கூட்டரைப் போல, 14-இன்ச் முன்புற மற்றும் 12-இன்ச் பின்புற அலாய் சக்கரங்களைக் கொண்டிருக்கலாம் என எதிர்பார்க்கப்படுகிறது. மாடுலார் பிளாட்ஃபார்ம் என்பதால், இந்த ஸ்கூட்டர் 2 kWh முதல் 5 kWh வரையிலான பேட்டரி பேக் தேர்வுகளுடன் வெளிவரும். ஏத்தரின் 450 மற்றும் ரிஸ்டா இ-ஸ்கூட்டர்களில் உள்ள அதே 7-இன்ச் TFT டச் ஸ்கிரீன் திரை மற்றும் பல பாதுகாப்பு அம்சங்கள் இதில் இடம்பெறலாம்.

டிரைவ்ஸ்பார்க் கருத்து: இவ்வாறு ஏத்தரின் புதிய இஎல்-01 எலெக்ட்ரிக் ஸ்கூட்டர் ஏராளமான நவீன அம்சங்களுடன் எதிர்பார்க்கப்படுகிறது. எனினும், சில பிரீமியம் அம்சங்கள் ஒரு "புரோ பேக்" (Pro Pack) ஆக கூடுதல் கட்டணத்துடன் வழங்கப்படும் என்றே தெரிகிறது. இந்த புதிய மலிவு விலை ஏத்தர் எலக்ட்ரிக் ஸ்கூட்டர், 2026 ஆம் ஆண்டு பண்டிகைக் காலத்தில் இந்திய சந்தையில் அறிமுகப்படுத்தப்படும் என எதிர்பார்க்கப்படுகிறது.

இதன் மூலம், ஏத்தர் நிறுவனம் தனது சந்தை இருப்பை மேலும் வலுப்படுத்தி, பரந்த வாடிக்கையாளர் பிரிவை சென்றடையும் ஒரு முக்கிய முயற்சியாக இஎல்-01 அமையும். இந்திய எலெக்ட்ரிக் வாகன சந்தையில் ஒரு போட்டியான தயாரிப்பாக இது வெளிப்படும் என எதிர்பார்க்கப்படுகிறது.