56கிமீ மைலேஜ் தரும் புதிய ஸ்கூட்டரை களமிறக்கியுள்ள ஹீரோ கம்பெனி! விலையை பார்த்தாலே புக்கிங் போட தோணுது!

உலகின் மிகப்பெரிய மோட்டார்சைக்கிள் & ஸ்கூட்டர் தயாரிப்பு நிறுவனங்களுள் ஒன்றான ஹீரோ மோட்டோகார்ப் (Hero Motocorp) நிறுவனம், தனது புத்தம் புதிய டெஸ்டினி 110 (Destini 110) ஸ்கூட்டரை அறிமுகப்படுத்தியுள்ளது. "ஹீரோ கா ஸ்கூட்டர் - ஸ்கூட்டர் கா ஹீரோ" என்ற முழக்கத்துடன் வெளிவந்துள்ள இந்த புதிய டெஸ்டினி ஸ்கூட்டரை பற்றிய விரிவான விபரங்களை இனி இந்த தொகுப்பில் பார்க்கலாம்.

மேம்படுத்தப்பட்ட புதிய ஹீரோ டெஸ்டினி தினசரி பயன்பாட்டிற்கு ஏற்ற அம்சங்களையும், சிறப்பான மைலேஜையும், தனித்துவமான ரெட்ரோ தோற்றத்தையும் ஒருங்கே கொண்டுள்ளது. இதன் மூலமாக, புதிய டெஸ்டினி 110, இந்தியாவின் அன்றாட பயன்பாட்டிற்கான 110சிசி ஸ்கூட்டர் பிரிவில் ஒரு புதிய வரையறையை உருவாக்கும் என எதிர்பார்க்கப்படுகிறது.

குடும்பங்களின் அன்றாடத் தேவைகளையும், முதல்முறையாக ஸ்கூட்டர் வாங்குபவர்களின் எதிர்பார்ப்புகளையும் பூர்த்தி செய்யும் வகையில் இது வடிவமைக்கப்பட்டுள்ளது. தினசரி பயணங்களுக்குத் தேவையான பாதுகாப்பு மற்றும் வசதி, அலுவலகம் செல்வோர் விரும்பும் நம்பகத்தன்மை, கல்லூரி மாணவர்களுக்குப் பிடித்த ஸ்டைல் என அனைத்து அம்சங்களிலும் இது சிறந்து விளங்குகிறது.

நவீன ரெட்ரோ வடிவமைப்பு, 56.2 கி.மீ. மைலேஜ், 785 மி.மீ நீளமுள்ள இருக்கை (பிரிவில் மிக நீளமானது) ஒருங்கிணைந்த பேக்ரெஸ்ட், விசாலமான லெக்ரூம் மற்றும் உறுதியான உலோக உடல் போன்ற பல்வேறு அம்சங்களுடன் புதிய டெஸ்டினி 110 ஸ்கூட்டர் வந்துள்ளது. இவை அனைத்தும் தினசரி பயணங்கள், வார இறுதிப் பொழுதுபோக்கு மற்றும் சரக்கு ஏற்றிச் செல்லும் தேவைகளுக்கு ஏற்ற சிறந்த தேர்வாக அமைகிறது.

புதிய ஹீரோ டெஸ்டினி 110, நாடு முழுவதும் உள்ள ஹீரோ மோட்டோகார்ப் டீலர்ஷிப் ஷோரூம்களில் கிடைக்கும். இதன் அறிமுக விலை ரூ.72,000 (VX - காஸ்ட் டிரம்) மற்றும் ரூ.79,000 (ZX - காஸ்ட் டிஸ்க்) (எக்ஸ்-ஷோரூம், டெல்லி) ஆகும். இந்த ஸ்கூட்டரின் விற்பனை படிப்படியாகத் தொடங்கப்படும்.

டெஸ்டினி 110 ஸ்கூட்டரின் தனித்துவமான வடிவமைப்பு, காலம் கடந்த அழகியலையும் நவீன பாணியையும் ஒருங்கிணைக்கிறது. பிரீமியம் தரத்திலான குரோம் வேலைப்பாடுகள், சக்திவாய்ந்த ப்ரொஜெக்டர் எல்இடி ஹெட்லேம்ப் மற்றும் தனித்துவமான H-வடிவ எல்இடி டெயில் லேம்ப்கள் இதற்கு ஒரு தனித்துவமான தோற்றத்தை அளிக்கின்றன. சிறந்த 110சிசி இன்ஜின் மூலம் இயக்கப்படும் டெஸ்டினி 110 மென்மையான, திறமையான மற்றும் நம்பகமான செயல்திறனை வழங்கக்கூடியதாக உருவாக்கப்பட்டு உள்ளது.

ஹீரோவின் i3s (Idle Stop-Start System) தொழில்நுட்பம் மற்றும் ஒன்-வே கிளட்ச் போன்ற அம்சங்களுடன், இது 56.2 கி.மீ. மைலேஜை உறுதி செய்கிறது. இது தினசரி பயணங்களுக்கும், குடும்பத்துடன் ஓய்வு நேர சவாரிகளுக்கும் ஏற்ற சிறந்த தேர்வாக அமைகிறது. புதிய டெஸ்டினி 110, மூன்று பெரிய உலோக உடல் பேனல்களுடன் வடிவமைக்கப்பட்டுள்ளது.

இது மேம்பட்ட வலிமையையும் நீண்ட கால ஆயுளையும் வழங்குகிறது. இதன் உறுதியான கட்டுமானம் தினசரி பயணங்களின் சவால்களைத் தாங்கும் வகையில் உருவாக்கப்பட்டுள்ளது. இதன் மூலம் குடும்பங்களுக்கு நம்பகத்தன்மை மற்றும் உறுதியான பயணத்தை உறுதி செய்கிறது. 785 மி.மீ நீளமுள்ள இருக்கை (பிரிவில் மிக நீளமானது) மற்றும் ஒருங்கிணைந்த பேக்ரெஸ்ட் மூலம், டெஸ்டினி 110 ஓட்டுனர் மற்றும் பின்னால் அமர்பவர் என இருவருக்கும் சிறந்த சவுகரியத்தை வழங்குகிறது.

12 இன்ச் 100/80 பின்புற சக்கரம் மற்றும் 12 இன்ச் 90/90 முன்புற சக்கரத்துடன் கூடிய அகலமான மற்றும் நிலையான சேசிஸ் பல்வேறு நிலப்பரப்புகளில் நம்பிக்கையான கையாளுதலை வழங்குகிறது. பிரிவில் சிறந்த விசாலமான லெக்ரூம், நீண்ட பயணங்களின் போதும் வசதியான சவாரி அனுபவத்தை உறுதி செய்கிறது.

முன் புறத்தில் உள்ள கிளவ் பாக்ஸ் அத்தியாவசியப் பொருட்களை எளிதாகக் கொண்டுச் செல்ல உதவுகிறது. லக்கேஜ் பாக்ஸில் உள்ள விளக்கு, குறைந்த வெளிச்சத்திலும் பொருட்களை எளிதாகக் கண்டறிய உதவுகிறது. மேம்பட்ட அனலாக்-டிஜிட்டல் ஸ்பீடோமீட்டர் எளிதாக விபரங்களை அறியக்கூடிய வகையில் உள்ளது. 190மிமீ முன்புற டிஸ்க் பிரேக் துல்லியமான மற்றும் நம்பகமான பிரேக்கிங் செயல்திறனை வழங்குகிறது.

புதிய டெஸ்டினி 110, ஐந்து பிரத்யேக கலர் ஆப்ஷன்களில் கிடைக்கும். இந்த ஸ்கூட்டரின் VX காஸ்ட் டிரம் வேரியண்ட் எடர்னல் ஒயிட், மேட் ஸ்டீல் கிரே மற்றும் நெக்ஸஸ் ப்ளூ ஆகிய வண்ணங்களிலும், ZX காஸ்ட் டிஸ்க் வேரியண்ட் அக்வா கிரே, நெக்ஸஸ் ப்ளூ மற்றும் க்ரூவி ரெட் ஆகிய வண்ணங்களிலும் கிடைக்கும்.

டிரைவ்ஸ்பார்க் கருத்து: புதிய மேம்படுத்தப்பட்ட ஹீரோ டெஸ்டினி 110 ஸ்கூட்டர் ஆனது குடும்பத்தினர், இளம் நிபுணர்கள் மற்றும் கல்லூரி மாணவர்களை கவரும் வகையில் ஸ்டைலாகவும் நடைமுறை பயன்பாட்டிற்கு உகந்ததாகவும் உள்ளது. மேலும், விலையும் பலரால் வாங்கக்கூடிய வகையில் குறைவாக நிர்ணயிக்கப்பட்டு உள்ளதால், வரும் மாதங்களில் டெஸ்டினி 110 ஸ்கூட்டரின் விற்பனை அதிகரிக்கும் என எதிர்பார்க்கிறோம்.