எத்தனால் கலக்கப்பட்ட பெட்ரோல் தான் இப்போ பெரிய பிரச்சனையா இருக்கு! கவாஸாகி போல் எல்லா கம்பெனியும் முடிவெடுத்தா

கவாஸாகி இந்தியா (Kawasaki India), தனது 2026 இசட்650 ஆர்.எஸ் (Z650RS) மற்றும் வல்கன் எஸ் (Vulcan S) பைக்குகளை சமீபத்தில் இந்திய சந்தையில் அறிமுகப்படுத்தியுள்ளது. இந்த புதிய அறிமுகங்கள் எத்தனால் 20% கலக்கப்பட்ட இ20 பெட்ரோல் (E20 Petrol) இணக்கத்தன்மை மற்றும் சில மாற்றங்களுடன் வந்துள்ளன. அவற்றை பற்றி தான் இனி இந்த தொகுப்பில் பார்க்க போகிறோம்.

இசட்650 ஆர்.எஸ் பைக் ரூ.7.83 லட்சம் (எக்ஸ்-ஷோரூம்) விலையில் அறிமுகமாகியுள்ளது. இது அதன் முந்தைய மாடலை விட ரூ.14,000 அதிகம். அதேசமயம், 2026 வல்கன் எஸ் பைக்கின் விலை ரூ.8.13 லட்சம் (எக்ஸ்-ஷோரூம்) என நிர்ணயிக்கப்பட்டுள்ளது. இது முந்தைய மாடலை விட ரூ.54,000 கூடுதல் விலையை பெற்றுள்ளது.

2026 இசட்650 ஆர்.எஸ் பைக் 'மெட்டாலிக் ஓஷன் ப்ளூ' (Metallic Ocean Blue) என்ற ஒற்றை கலர் ஆப்ஷனில் மட்டுமே கிடைக்கும். இந்த பைக்கில் தங்க நிற சக்கரங்கள் (golden wheels) தொடர்ந்து இடம்பெற்றுள்ளன. இந்த ஆண்டிற்கான இந்த கவாஸாகி பைக்கின் முக்கிய புதுப்பித்தல், மோட்டார்சைக்கிள் இப்போது இ20 இணக்கத்தன்மையுடன் இருப்பது ஆகும்.

பைக்கின் கிராபிக்ஸில் எந்த வித மாற்றமும் இல்லை. புதிய கலர் ஆப்ஷன் உடன் மட்டுமே வந்துள்ளது. புதிய 2026 இசட்650 ஆர்.எஸ் பைக்கிற்கு, அதே 649சிசி லிக்யுடு-கூல்டு இணையான-இரட்டை சிலிண்டர் என்ஜின் ஆற்றல் அளிக்கிறது. இந்த என்ஜின் அதிகபட்சமாக 8,000 ஆர்பிஎம்-இல் 68 பிஎஸ் ஆற்றலையும், 6,700 ஆர்பிஎம்-இல் 62.1 என்.எம் டார்க் திறனையும் உற்பத்தி செய்கிறது.

இது ஸ்லிப் & அசிஸ்ட் கிளட்ச் உடன் கூடிய 6-ஸ்பீடு கியர்பாக்ஸ் உடன் இணைக்கப்பட்டுள்ளது. இந்த பைக், அதிக இழுவிசையுள்ள எஃகு மூலம் செய்யப்பட்ட ட்யூபுலர் டைமண்ட்-வகை சட்டகத்தைக் கொண்டுள்ளது. இதன் முன் பகுதியில் 41 மிமீ டெலஸ்கோபிக் ஃபோர்க்குகளும், பின் பகுதியில் கிடைமட்டமான பேக்-லிங்க் ஸ்விங்கார்ம் மோனோஷாக் சஸ்பென்ஷனும் உள்ளன.

தற்போது புதிய வல்கன் எஸ் பைக்கைப் பற்றிப் பார்ப்போம். கவாஸாகி தனது 650சிசி பைக் வரிசையை இ20 தரநிலைகளுக்கு இணங்க மேம்படுத்தி வருகிறது. அந்த வரிசையில் தற்போது வல்கன் எஸ் புதியதாக இணைந்துள்ளது. முந்தைய மாடலை விட ரூ.54,000 விலை அதிகரிப்புடன் ரூ.8.13 லட்சம் (எக்ஸ்-ஷோரூம்) விலையில் இது வந்துள்ளது.

இசட்650 ஆர்.எஸ் பைக் போலவே, வல்கன் எஸ் பைக்கிற்கும் இ20 இணக்கமான எஞ்சினைப் பெற்றுள்ளது. இருப்பினும், இந்த எஞ்சினின் செயல்திறனில் சற்று குறைவு ஏற்பட்டுள்ளது. 649சிசி லிக்யுடு-கூல்டு இணையான-இரட்டை சிலிண்டர் என்ஜின் இப்போது 60.1 பிஎச்பி ஆற்றலையும், 61 என்.எம் டார்க் திறனையும் உற்பத்தி செய்கிறது. இது முந்தைய மாடலின் என்ஜினை விட 1.4 என்.எம் குறைவைக் காட்டுகிறது.

2024 மாடலில் இருந்த 'பியர்ல் மேட் சேஜ் கிரீன்' (Pearl Matte Sage Green) கலர் ஆப்ஷன், இப்போது 'மெட்டாலிக் பிளாட் ஸ்பார்க் பிளாக்' (Metallic Flat Spark Black) வண்ணமாக மாற்றப்பட்டுள்ளது. இந்த புதிய கலர் ஆப்ஷன், முன்பு இருந்த பளபளப்பான பச்சை நிறத்திற்கு மாறாக, சற்று அடர்த்தியான மற்றும் மிதமான டோன்-ஐ கொண்டுள்ளது.

டிரைவ்ஸ்பார்க் கருத்து: இ20 விதிமுறைகளை பூர்த்தி செய்ய கவாஸாகி தனது 650சிசி பைக்குகளை புதுப்பிப்பது பாராட்டத்தக்கது. இருப்பினும், இதனால் வல்கன் எஸ் பைக்கில் கொண்டுவரப்பட்டுள்ள இந்த திடீர் விலை உயர்வு, மற்ற 650சிசி பைக்குகளில் இத்தகைய பெரிய விலை ஏற்றம் இல்லாததால், சற்று ஆச்சரியத்தை ஏற்படுத்தியுள்ளது. 2026 அப்டேட்டில் இசட்650 ஆர்.எஸ் மற்றும் வல்கன் எஸ் பைக்கின் அடிப்படையான இயந்திர அமைப்புகளில் பெரியதாக எந்த மாற்றமும் இல்லை.