இளைஞர்கள் ஆசையில் மண் அள்ளி போட்ட கேடிஎம்... ஜிஎஸ்டியால் பைக்குகளின் விலை குறைந்ததுனு மட்டும்தான் சொன்னாங்க!!

புகழ்பெற்ற கேடிஎம் 390 அட்வென்ச்சர் (KTM 390 Adventure) மற்றும் அட்வென்ச்சர் எக்ஸ் மோட்டார்சைக்கிள்களின் விலைகள் உயர்ந்துள்ளன. அரசின் புதிய ஜிஎஸ்டி மாற்றங்களே இந்த விலை உயர்வுக்குக் காரணம் ஆக தெரிவிக்கப்பட்டுள்ளது. புதிய ஜிஎஸ்டி 2.0 விதிமுறைகளின்படி, 350சிசி-க்கு மேல் என்ஜின் திறன் கொண்ட இருசக்கர வாகனங்களுக்கான வரி 31%-இல் இருந்து 40% ஆக அதிகரிக்கப்பட்டுள்ளது.

இதனால், இந்த அட்வென்ச்சர் ரக பைக்குகள் அதிக விலை கொண்டதாக மாறியுள்ளன. தீபாவளி பண்டிகைக் காலத்தில் அரசு அறிமுகப்படுத்திய ஜிஎஸ்டி 2.0, 350சிசி-க்கு குறைவான மோட்டார்சைக்கிள்களின் வரியை 28% இலிருந்து 18% ஆகக் குறைத்தது. ஆனால், கேடிஎம் 390 அட்வென்ச்சர் போன்ற 350சிசி-க்கு மேலான பைக்குகளுக்கான வரி 40% ஆக உயர்ந்தது.

இந்த வரி அதிகரிப்பு குறித்து பஜாஜ் ஆட்டோ நிறுவனம் முதலில் கவலை தெரிவித்திருந்தது. பஜாஜ் ஆட்டோ (Bajaj Auto), கேடிஎம் மற்றும் டிரையம்ப் மோட்டார்சைக்கிள்ஸ் (Triumph Motorcycles) இந்தியாவில் 400சிசி பைக்குகளை விற்பனை செய்கின்றன. இவை அனைத்தும் புனேவில் உள்ள பஜாஜ் தொழிற்சாலையில் உற்பத்தி செய்யப்படுகின்றன. மேலும், இவை அனைத்தும் புதிய 40% ஜிஎஸ்டி வரம்பின் கீழ் வருகின்றன.

பண்டிகைக் காலம் முடிந்த நிலையில், பஜாஜ் நிறுவனம் கேடிஎம் 390 அட்வென்ச்சர் மற்றும் அட்வென்ச்சர் எக்ஸ் பைக்குகளின் விலைகளை அதிகரித்துள்ளது. பஜாஜ் நிறுவனமும் டோமினார் 400 (Dominar 400) மற்றும் பல்சர் என்.எஸ் 400 (Pulsar NS400) ஆகிய 400சிசி பைக்குகளை விற்பனை செய்கிறது.

மறுப்பக்கம், டிரையம்ப் மோட்டார்சைக்கிள்ஸ் நிறுவனமும் ஸ்பீடு 400 (Speed 400) மற்றும் ஸ்க்ராம்ப்ளர் 400 (Scrambler 400) ஆகிய பைக்குகளை விற்பனை செய்கிறது. இந்தப் பைக்குகளின் விலைகளும் வரும் நாட்களில் அதிகரிக்க வாய்ப்புள்ளது. கேடிஎம் 390 அட்வென்ச்சர் பைக்கின் விலை ரூ.27,000 உயர்த்தப்பட்டு, இதன் எக்ஸ்-ஷோரூம் விலை ரூ.3.68 லட்சத்தில் இருந்து ரூ.3.98 லட்சமாக அதிகரித்துள்ளது.

கேடிஎம் அட்வென்ச்சர் எக்ஸ் பைக்கின் விலை ரூ.22,000 உயர்த்தப்பட்டு, இதன் எக்ஸ்-ஷோரூம் விலை ரூ.3.04 லட்சத்தில் இருந்து ரூ.3.26 லட்சமாக மாறியுள்ளது. 390 அட்வென்ச்சர் மற்றும் 390 அட்வென்ச்சர் எக்ஸ் பைக்குகளுக்கு இடையேயான முக்கியமான வித்தியாசம் என்னவென்றால், 390 அட்வென்ச்சர் எக்ஸ் ஆனது விலை குறைவானது; அதுவே 390 அட்வென்ச்சர் ஆனது ஆஃப்-ரோடு பயணங்களுக்கு ஏற்ற திறன்களை அதிகம் கொண்டது ஆகும்.

புதிய ஜிஎஸ்டி 2.0 மாற்றங்கள் இருந்தபோதிலும், கேடிஎம் 390 ட்யூக் மற்றும் ஆர்சி 390 பைக்குகளின் விலைகளில் தற்போது எந்த மாற்றமும் இல்லை. கேடிஎம் நிறுவனம் 390 என்டூரோ (390 Enduro) பைக்கையும் இந்தியாவில் அறிமுகப்படுத்த தயாராகி வருகிறது. இது வெளியானதும், மற்ற 390 பைக்குகளின் விலைகளும் உயரும் என எதிர்பார்க்கப்படுகிறது.

இந்த விலை உயர்வு, கேடிஎம் 390 அட்வென்ச்சர் மற்றும் அதன் போட்டியாளர்களான ராயல் என்ஃபீல்டு ஹிமாலயன் 450 (Royal Enfield Himalayan 450) மற்றும் யெஸ்டி அட்வென்ச்சர் (Yezdi Adventure) பைக்குகளுக்கு இடையிலான விலை வித்தியாசத்தை அதிகரித்துள்ளது. ஏனெனில் கேடிஎம் 390 அட்வென்ச்சர் பைக்கின் மற்ற போட்டியாளர்களின் விலைகளில் எந்த மாற்றமும் இல்லை.

டிரைவ்ஸ்பார்க் கருத்து: பல மாதங்களாக கேடிஎம் நிறுவனம் தனது தயாரிப்புகளுக்கு ஒரு கட்டுப்படியாகும் விலையை நிர்ணயித்து, பண்டிகைக் காலத்தில் சாதனை விற்பனையைப் பதிவு செய்தது. இருப்பினும், இப்போது 390 அட்வென்ச்சர் பைக்குகளின் விலைகளை உயர்த்தியுள்ளது. கேடிஎம் 390 சீரிஸ் பைக்குகள் அவற்றின் செயல்திறன், அம்சங்கள் மற்றும் பிரீமியம் தோற்றத்திற்காகப் பாராட்டப்பட்டாலும், இந்த விலை உயர்வு அவற்றின் விற்பனையைப் பாதிக்கும் என எதிர்பார்க்கப்படுகிறது.