தமிழகத்தில் துவங்கிய 320 கி.மீ ரேஞ்ச் தரும் ஸ்கூட்டர் தயாரிப்பு! எப்ப டெலிவரி தெரியுமா?

ஓலா எலெக்ட்ரிக் தனது புதிய எலெக்ட்ரிக் ஸ்கூட்டரான S1 Pro+ ஐ சமீபத்தில் அறிமுகப்படுத்தியுள்ளது, இந்த ஸ்கூட்டர் தற்போது உற்பத்தியில் உள்ளது. இந்த புதிய மாடல் ஓலாவின் ஜென் 3 எலெக்ட்ரிக் ஸ்கூட்டர்களின் ரேஞ்சில் உள்ளது. S1 Pro+ க்கான டெலிவரிகள் பிப்ரவரி மத்தியில் தொடங்கும் என்று அந்நிறுவனம் அறிவித்துள்ளது. ஸ்கூட்டர் 320 கிலோமீட்டர் ரேஞ்ச் கொண்டுள்ளதாக கூறப்படுகிறது, மேலும் 4680 பாரத் செல்களை கொண்ட முதல் ஸ்கூட்டர் இது.

S1 Pro+ தோற்றத்தில் தற்போது உள்ள S1 Pro மாடலை ஒத்திருக்கிறது. இது இரண்டு பேட்டரி ஆப்ஷன்களுடன் கிடைக்கிறது: 4 kWh மற்றும் 5.3 kWh என்ற பேட்டரி ஆப்ஷன்கள் உள்ளன, இது முறையே ₹1.55 லட்சம் மற்றும் ₹1.70 லட்சம் என்ற அறிமுக விலையில் விற்பனைக்கு வருகிறது. இரண்டும் எக்ஸ்-ஷோரூம் மற்றும் அறிமுக விலைகள் தான். இந்த ஸ்கூட்டர்கள் 5.5 kW அதிக சக்தி அல்லது 13 kW பவர் வெளியீட்டையும் வழங்கும் எலெக்ட்ரிக் மோட்டாரால் பொருத்தப்பட்டுள்ளன.

இரண்டு பேட்டரி பேக்குகளுக்கு இடையே அதிகபட்ச வேகம் வேறுபடுகிறது; 4 kWh எடிசன் 128 kmph வரை செல்லும், அதே நேரத்தில் 5.3 kWh எடிசன் 141 kmph அதிகபட்ச வேகத்தை அடைய முடியும். இரண்டு வேரியன்ட்களும் நான்கு ரைடிங் மோடுகளை வழங்குகின்றன: ஹைப்பர், ஸ்போர்ட்ஸ், நார்மல் மற்றும் எக்கோ, வெவ்வேறு டிரைவிங் கண்டிஷன்களுக்கு ஏற்ப பயன்படுத்த முடியும்.

இரண்டு மாடல்களுக்கும் இடையே பிக்கப் நேரங்கள் சிறிது வேறுபடுகின்றன. சிறிய பேட்டரி பேக் 2.7 வினாடிகளில் 0-40 kmph வேகத்திற்க்கும் 4.1 வினாடிகளில் 0-60 kmph வேகத்திற்க்கும் பிக்கப் செய்கிறது. அதே நேரத்தில், பெரிய பேட்டரி பேக் இந்த வேகத்தை முறையே 2.3 வினாடிகள் மற்றும் 3.4 வினாடிகளில் அடைகிறது.

இந்த ஸ்கூட்டர்களுக்கான சார்ஜிங் நேரங்களும் பேட்டரி அளவைப் பொறுத்து மாறுபடும். சிறிய பேட்டரிக்கு முழுமையாக சார்ஜ் செய்ய சுமார் 6 மணிநேரம் தேவைப்படுகிறது, அதே சமயம் பெரியது இரண்டு மாடல்களுடனும் வழங்கப்படும் நிலையான 750 W சார்ஜரைப் பயன்படுத்தி சார்ஜ் ஏற சுமார் 8 மணிநேரம் 40 நிமிடங்கள் எடுத்துக்கொள்கிறது.

எடையைப் பொறுத்தவரை, பாரத் செல்களுடன் கூடிய S1 Pro+ அதன் பெரிய பேட்டரி பேக் காரணமாக சுமார் 118 கிலோ எடை கொண்டதாக உள்ளது, அதே சமயத்தில் சிறிய பேட்டரி கொண்ட வேரியன்ட் 116 கிலோவில் சற்று குறைவான
எடை கொண்டதாக உள்ளது.

இந்த ஸ்கூட்டர்களின் கிரேடபிளிட்டியும் குறிப்பிடத்தக்கது; சிறிய பேட்டரி வேரியன்ட் 22.6 டிகிரி வரை சாய்வுகளை சமாளிக்க முடியும், அதே சமயத்தில் பெரியது 24 டிகிரி வரை சரிவுகளை சுலபமாக சமாளிக்கும். ரேஞ்சை பொறுத்தவரை, சிறிய பேட்டரியுடன் கூடிய S1 Pro+ ஸ்கூட்டர் சுமார் 242 கிலோமீட்டர் பயணிக்க முடியும். அதே சமயத்தில் பெரிய பேட்டரி கொண்ட ஸ்கூட்டர் சுமார் 320 கிலோமீட்டர் ரேஞ்சை கொண்டுள்ளதாக கூறப்படுகிறது. அப்படி என்றால் ஒரு முறை சார்ஜ் செய்தால் நீண்ட தூரம் பயணிக்கும் வகையில் இது உருவாக்கப்பட்டுள்ளது

டிரைவ்ஸ்பார்க் கருத்து: ஓலா எலெக்ட்ரிக்கின் புதிய வாகனங்கள் இந்தியாவில் எலெக்ட்ரிக் ஸ்கூட்டர் ஆர்வலர்களுக்கு மேம்படுத்தப்பட்ட செயல்திறன் மற்றும் திறனைக் கொடுக்கின்றன, ஒரே சார்ஜில் நீண்ட தூரம் பயணிக்கும் திறன், அதிக வேகம், நல்ல பிக்கப் என எலெக்ட்ரிக் வாகனத்தில் பலர் சொன்ன குறைகளை சரி செய்து இந்த வாகனம் தயாரிக்கப்பட்டுள்ளது குறிப்பிடத்தக்கது.