டிவிஎஸ் ஆசை காட்டி மோசம் பண்ணுது... புதுசா வந்த அப்பாச்சி பைக்கின் விலை அறிமுகமான சில வாரங்களில் அதிகரிப்பு!!

டிவிஎஸ் அப்பாச்சி ஆர்டிஎக்ஸ் 300 பில்ட்-டு-ஆர்டர் (TVS Apache RTX300 BTO) பைக்கின் விலை அதிகரிக்கப்பட்டுள்ளது. இந்த அப்பாச்சி பைக் அறிமுகம் செய்யப்பட்ட சில வாரங்களிலேயே இந்த விலை உயர்வு அறிவிக்கப்பட்டுள்ளது. பைக்கின் மற்ற பேஸ் மற்றும் டாப் வேரியண்ட்களின் விலையில் எந்த மாற்றமும் இல்லை; பிடிஓ வேரியண்ட்டின் விலையில் மட்டுமே அதிகரிப்பு கொண்டுவரப்பட்டு உள்ளது குறிப்பிடத்தக்கது.

நடுத்தர 300சிசி அட்வென்ச்சர் மோட்டார்சைக்கிள் பிரிவில், டிவிஎஸ் அப்பாச்சி ஆர்டிஎக்ஸ் 300 பிடிஓ வேரியண்ட் அறிமுகப்படுத்தப்பட்ட சில வாரங்களிலேயே இந்த விலை உயர்வை சந்தித்துள்ளது. உற்பத்திச் செலவுகள் அதிகரிப்பு அல்லது சந்தை நிலை மாற்றங்கள் காரணமாக இந்த விலை உயர்வை டிவிஎஸ் மோட்டார் நிறுவனம் கொண்டுவந்திருக்கலாம் என கூறப்படுகிறது.

அப்பாச்சி ஆர்டிஎக்ஸ் 300 பிடிஓ வேரியண்ட் இந்திய சந்தையில் அறிமுகப்படுத்தப்பட்டபோது அதன் எக்ஸ்-ஷோரூம் விலை (Ex-Showroom Price) ரூ.2.29 லட்சமாக இருந்தது. தற்போது இந்த வேரியண்ட் ரூ.2.34 லட்சத்தில் விற்கப்படுகிறது. இது அதிகாரப்பூர்வ இணையதளத்தில் குறிப்பிடப்பட்டுள்ளது. ஆனால், பேஸ் வேரியன்ட் ரூ.1.99 லட்சத்திலும், 'டாப்' வேரியன்ட் ரூ.2.14 லட்சத்திலும் எவ்வித மாற்றமுமின்றி தொடர்ந்து விற்பனை செய்யப்படுகின்றன.

ஏற்கனவே கூறியதுபோல், இவை அனைத்தும் பைக்கின் எக்ஸ்-ஷோரூம் விலைகள் ஆகும். பிடிஓ வேரியண்ட் 'வைப்பர் கிரீன்', 'லைட்னிங் பிளாக்' மற்றும் 'மெட்டாலிக் ப்ளூ' ஆகிய வண்ணத் தேர்வுகளில் கிடைக்கிறது. இது வாடிக்கையாளர்களுக்கு தனித்துவமான விருப்பங்களை வழங்குகிறது. அப்பாச்சி ஆர்டிஎக்ஸ் 300 பைக்கில், பிடிஓ வேரியண்ட் மட்டுமே விலை உயர்வை சந்தித்துள்ளது.

மற்ற பேஸ் மற்றும் டாப் வேரியண்ட்கள் பாதிக்கப்படவில்லை. பிடிஓ மாடல், அட்ஜெஸ்ட் செய்யக்கூடிய சஸ்பென்ஷன், டயர் பிரஷர் மானிட்டரிங் சிஸ்டம் (TPMS) போன்ற அம்சங்களுடன் வருகிறது. இந்த கூடுதல் அம்சங்கள் மற்றும் ஃபேக்டரி-கஸ்டம் கட்டுமானம் காரணமாக, அதன் பாகங்களின் விலை உயர்ந்திருக்கலாம். இதன் விளைவாக பைக்கின் விலையில் அதிகரிப்பு கொண்டுவரப்பட்டு இருக்கலாம் என்று கூறப்படுகிறது.

அப்பாச்சி ஆர்டிஎக்ஸ் 300 பிடிஓ வேரியண்ட் 299சிசி லிக்யுடு-கூல்டு சிங்கிள்-சிலிண்டர் என்ஜினுடன் வருகிறது. இது 35.5 hp சக்தியையும், 28.5 Nm டார்க்கையும் வெளிப்படுத்துகிறது. இது 6-ஸ்பீடு கியர்பாக்ஸ் உடன் இணைக்கப்பட்டுள்ளது. மேலும், இந்த பைக்கில் அட்ஜெஸ்ட் செய்யக்கூடிய சஸ்பென்ஷன், டயர்களில் காற்றழுத்தத்தை கண்காணிக்கும் வசதிகள் வழங்கப்படுகின்றன.

இவற்றை விட முக்கியமாக, தனது விருப்பத்திற்கேற்ப வாடிக்கையாளர்கள் இந்த பைக்கை பெறுவதற்கு பல்வேறு கலர் ஆப்ஷன்களை டிவிஎஸ் நிறுவனம் வழங்குகிறது. இந்த பைக்கின் முன் சக்கரம் 19 இன்ச்சிலும், பின் சக்கரம் 17 இன்ச்சிலும் உள்ளன. அத்துடன், இந்த பைக்கில் 12.5 லிட்டர் கொள்ளளவில் பெட்ரோல் டேங்க் வழங்கப்படுகிறது.

பிடிஓ வேரியண்ட்டை வாங்க திட்டமிட்டு வந்தவர்களுக்கு, தற்போதைய ரூ.5,000 விலை உயர்வு, பட்ஜெட்டை சற்று மாற்றியமைக்கும். பதிவு, காப்பீடு மற்றும் பிற ஆக்சஸெரீஸ் போன்றவற்றுடன் கூடிய பைக்கின் ஆன்-ரோடு விலை மாறுபடலாம். இருப்பினும், இந்த உயர்வு பெரிய பாதிப்பை ஏற்படுத்தாது என்று எதிர்பார்க்கப்படுகிறது. இறுதி விலைகளை டீலர்களிடம் உறுதி செய்து கொள்ளுமாறு அறிவுறுத்தப்படுகிறது.

டிரைவ்ஸ்பார்க் கருத்து: டிவிஎஸ் அப்பாச்சி பைக்குகளுக்கு உலகின் பல நாடுகளில் சிறப்பான வரவேற்பு கிடைத்து வருகிறது. இதனாலேயே, பிஎம்டபிள்யூ மோட்டார்ராட் நிறுவனத்துடன் இணைந்து புதிய அட்வென்ச்சர் ரக பைக்காக அப்பாச்சி ஆர்டிஎக்ஸ் 300 பைக்கை உருவாக்கி சமீபத்தில் டிவிஎஸ் நிறுவனம் அறிமுகப்படுத்தியது. இத்தகைய புதிய மாடர்ன் பைக்கில் வெறும் ரூ.5,000 விலையுயர்வு என்பது அதன் விற்பனையை பெரிய அளவிற்கு பாதிக்காது என்றே எதிர்பார்க்கிறோம்.