தொழிற்சாலையில் கிட்டத்தட்ட எல்லா வேலையும் முடிஞ்சிடுச்சு! புக் செய்தவர்களுக்கு ஒரு ஹாப்பி நியூஸ்!

பெங்களூரைச் சேர்ந்த எலக்ட்ரிக் இருசக்கர வாகன ஸ்டார்ட் அப் நிறுவனமான அல்ட்ரா வயலட் ஆட்டோமோட்டிவ், கடந்த மாதம் தனது புதிய எலக்ட்ரிக் மோட்டார்சைக்கிளாக எக்ஸ்47 க்ராஸ்ஓவர் இவி அட்வென்ச்சர் பைக்கை இந்தியாவில் அறிமுகப்படுத்தியது. தற்போது, ஒரு மாதத்திற்குப் பிறகு, நிறுவனம் அதன் டெலிவரிகளைத் தொடங்கியுள்ளது.

அல்ட்ரா வயலட் எக்ஸ்47 பைக்குகளின் முதல் சில யூனிட்கள் தொழிற்சாலையில் இருந்து வெளியேற்றப்படும் படங்கள் மற்றும் வீடியோவை அல்ட்ரா வயலட் நிறுவனம் தனது சமூக வலைத்தள பக்கங்களில் பகிர்ந்துள்ளது. இந்த பதிவுகள், புதிய எக்ஸ்47 எலெக்ட்ரிக் பைக்கின் உற்பத்தி மற்றும் தரச் சோதனைகளைக் காட்டுகிறது.

அல்ட்ரா வயலட் நிறுவனத்தின் சிஇஓ நாராயண் அவர்களும் தனது இன்ஸ்டாகிராம் பக்கத்தில் இதுகுறித்தப் பதிவை வெளியிட்டுள்ளார். இந்த பதிவில், அல்ட்ரா வயலட் எக்ஸ்47 பைக்கின் முதல் உற்பத்தி யூனிட்கள் அசெம்பிளி லைனில் இருந்து வெளியேறுவதைக் காணலாம். மேலும், ஒவ்வொரு அல்ட்ரா வயலட் எக்ஸ்47 பைக்கின் உருவாக்கம் குறித்தும் அவர் விளக்கினார்.

இவை பல கடுமையான சோதனைகளுக்குப் பிறகே வாடிக்கையாளர்களுக்கு வழங்கப்படுவதாகவும் அவர் தெரிவித்துள்ளார். வேக சோதனை மற்றும் பிரேக்கிங் சோதனைகளுக்காக டைனோவில் பைக் சோதிக்கப்படுவதையும் இதுதொடர்பான படங்களில் காண முடிகிறது. பைக்குகள் சிறப்பாகச் செயல்படுவதை உறுதிசெய்யும் வகையில், அவை உச்ச வரம்பிற்குச் சோதிக்கப்படுவதாகவும் நாராயண் கூறுகிறார்.

டைனோ சோதனையின்போது பைக்கின் பவர், டார்க், எலக்ட்ரானிக் அளவுத்திருத்தம் மற்றும் பிற அம்சங்கள் சரிபார்க்கப்படுகின்றன. கடந்த செப்டம்பர் மாதம் அல்ட்ரா வயலட் எக்ஸ்47 டூயல்-ஸ்போர்ட் அட்வென்ச்சர் எலக்ட்ரிக் மோட்டார்சைக்கிள் அறிமுகப்படுத்தப்பட்டது. முதல் 1,000 முன்பதிவுகளுக்கு ரூ.2.49 லட்சம் அறிமுக விலையில் இந்த பைக் கிடைக்கும் என அறிவிக்கப்பட்டது.

அதன் பிறகு, விலை ரூ.2.79 லட்சமாக உயரும் என தெரிவிக்கப்பட்டது. எக்ஸ்47 லேசர், ஏர்ஸ்ட்ரைக் மற்றும் ஷேடோ என மூன்று வேரியண்ட்களில் கிடைக்கிறது. டெசர்ட் விங் என்ற சிறப்புப் பதிப்பும் இதில் உள்ளது. அல்ட்ரா வயலட் எக்ஸ்47 பைக்கின் முக்கிய அம்சம் அதன் பவர்டிரெய்ன் ஆகும். இது அதன் சகோதர மாடலான அல்ட்ரா வயலட் எஃப்77 உடன் பகிர்ந்து கொள்ளப்படுகிறது.

இதன்படி, 7.1 kWh மற்றும் 10.3 kWh என இரண்டு பேட்டரி பேக் ஆப்ஷன்களில் எக்ஸ்47 பைக் விற்பனை செய்யப்படுகிறது. அல்ட்ரா வயலட் நிறுவனத்தின் கூற்றுப்படி, 10.3 kWh பேட்டரி பேக் 323 கி.மீ ரேஞ்சை வழங்குகிறது, மேலும் 7.1 kWh பேட்டரி பேக் 211 கி.மீ ரேஞ்சை வழங்குகிறது.

இதன் மூலம் பைக் அதிகபட்சமாக 145 கி.மீ வேகத்தை எட்டும். மேலும், 0-60 கி.மீ வேகத்தை வெறும் 2.7 வினாடிகளில் எட்டிவிடும். அல்ட்ரா வயலட் எக்ஸ்47 பைக் உடன் வழங்கப்படும் மற்ற குறிப்பிடத்தக்க அம்சங்களில் ADAS (மேம்பட்ட ஓட்டுநர் உதவி அமைப்புகள்) அடங்கும்.

பின்பக்க மோதல் எச்சரிக்கை, சாலையில் பாதை மாற்றம் உதவி மற்றும் முந்திச்செல்லும் எச்சரிக்கைகளையும் இது வழங்குகிறது. ADAS எச்சரிக்கைகளுக்காக ஒரு பிரத்யேக இரண்டாம் நிலைத் திரையும் உள்ளது. இந்த பைக்கில் ஒரு முக்கிய டாஷ்போர்டு, பல ரீஜென் மோட்கள், டூயல்-சேனல் ABS, 4-நிலை டிராக்‌ஷன் கண்ட்ரோல், டைனமிக் ஸ்டெபிலிட்டி கண்ட்ரோல் மற்றும் டிராக்‌ஷன் அலார்ட் ஆகியவை உள்ளன.

டிரைவ்ஸ்பார்க் கருத்து: எஃப்77 எலெக்ட்ரிக் பைக்கை போலவே எக்ஸ்47 எலெக்ட்ரிக் பைக்கின் மீதும் அல்ட்ரா வயலட் நிறுவனம் மிகுந்த நம்பிக்கை வைத்துள்ளது. இதனால்தான், அறிமுகம் செய்யப்பட்ட உடனேயே இந்த பைக்கை உற்பத்தி செய்ய ஆரம்பித்தது. அதனை தொடர்ந்து, தற்போது எக்ஸ்47 எலெக்ட்ரிக் பைக்கை புக் செய்தவர்களுக்கு டெலிவிரி கொடுக்கும் பணிகளும் துவங்கப்பட்டு உள்ளன.