ஷோரூமுக்கு வருபவர்களில் பாதி பேர் இந்த 5இல் ஒன்றை தான் கேட்டு வாங்குறாங்க! 2025இல் மாஸ் காட்டிய ஸ்கூட்டர்கள்!

இந்தியாவில், நகரப் பயணங்களுக்கு மக்கள் மோட்டார்சைக்கிள்களைக் காட்டிலும் ஸ்கூட்டர்களையே விரும்புவது அதிகரித்து வருகிறது. வசதியான பயணம், கால்களை வைக்க போதுமான இடம், நடைமுறைக்கு உகந்த பின்பக்க பூட்ஸ்பேஸ் வசதி உள்ளிட்டவை ஸ்கூட்டர்களின் முக்கிய சிறப்பம்சங்கள் ஆகும். ஒவ்வொரு மாதமும் ஏராளமான ஸ்கூட்டர்கள் விற்பனையாகுகின்றன.

அவற்றில் சில மாடல்கள் மட்டுமே தொடர்ந்து வாடிக்கையாளர்கள் இடையே பெரும் வரவேற்பைப் பெற்றுள்ளன. நிறைவடையும் தருவாயில் உள்ள 2025ஆம் ஆண்டின் விற்பனைப் போக்குகள் மற்றும் சந்தை அங்கீகாரத்தின் அடிப்படையில், இந்திய வாடிக்கையாளர்களிடையே அதிக வரவேற்பைப் பெற்ற முதல் ஐந்து ஸ்கூட்டர்களின் பட்டியலை இங்கே காணலாம்.

ஹோண்டா டியோ (Honda Dio): 2025இல் இந்தியாவில் அதிகம் விற்பனையான முதல் 5 ஸ்கூட்டர்களில் ஐந்தாவது இடத்தை பிடித்துள்ள டியோ ஆனது இந்திய இளைஞர்களைக் கவரும் ஸ்போர்ட்டியான ஸ்கூட்டராக விளங்குகிறது. ஹோண்டா ஆக்டிவாவைப் போலவே 110சிசி மற்றும் 125சிசி என்ஜின் ஆப்ஷன்களுடன் கிடைக்கிறது. இதன் என்ஜின் ட்யூனிங் வேறுபட்டுள்ளதுடன், குறைந்த எடையால் சிறந்த த்ரோட்டில் ரெஸ்பான்ஸ் மற்றும் சிறப்பான பயண அனுபவத்தை வழங்குகிறது.

டிவிஎஸ் என்டார்க் 125 (TVS NTorq 125): டியோவை போன்று, இளம் இந்திய தலைமுறையினரிடையே மிகுந்த வரவேற்பைப் பெற்று வரும் எண்டார்க் 125 ஸ்கூட்டரில் 124.8சிசி, 3-வால்வு என்ஜின் பொருத்தப்படுகிறது. இது அதிகப்பட்சமாக 7.5 கிலோவாட் ஆற்றலையும், 11.5 என்எம் டார்க் திறனையும் உற்பத்தி செய்யக்கூடியதாக உள்ளது. இந்த ஸ்கூட்டர் வெறும் 7.9 வினாடிகளில் 0-60 கிமீ/மணி வேகத்தை எட்டுகிறது.

சுஸுகி ஆக்சஸ் 125 (Suzuki Access 125): சுஸுகியின் அதிகம் விற்பனையாகும் இருசக்கர வாகன மாடலாக சுஸுகி ஆக்சஸ் 125 தொடர்ந்து நீடிக்கிறது. இதன் ஆரம்ப எக்ஸ்-ஷோரூம் விலை ரூ.80,891 ஆகவும், டாப்-எண்ட் ரைட் கனெக்ட் டிஎஃப்டி எடிஷன்களின் விலைகள் ரூ.97,084 ஆகவும் உள்ளன. இந்த ஸ்கூட்டர் 124சிசி சிங்கிள்-சிலிண்டர், ஏர்-கூல்டு எஞ்சின் மூலம் இயக்கப்படுகிறது. இது அதிகப்பட்சமாக, 6.2 கிலோவாட் ஆற்றலையும், 10.2 என்எம் டார்க் திறனையும் உற்பத்தி செய்கிறது.

டிவிஎஸ் ஜூபிடர் (TVS Jupiter): டிவிஎஸ் மோட்டார் நிறுவனத்தின் சிறந்த விற்பனை ஸ்கூட்டர் ஜூபிடராகும். இது 110சிசி மற்றும் 125சிசி என இரு என்ஜின் ஆப்ஷன்களில் கிடைக்கிறது. 110சிசி மாடலில் 113.3சிசி சிங்கிள்-சிலிண்டர், ஏர்-கூல்டு என்ஜின் பொருத்தப்படுகிறது. இது 5.9 கிலோவாட் ஆற்றலையும், 9.8 என்எம் டார்க் திறனையும் வழங்குகிறது. பெரிய 125சிசி மாடல் 124.76சிசி சிங்கிள்-சிலிண்டர், ஏர்-கூல்டு என்ஜின் மூலம் செயல்படுகிறது.

ஹோண்டா ஆக்டிவா (Honda Activa): இந்தியாவின் நம்பர் 1 ஸ்கூட்டராகவும், சந்தைத் தலைவராகவும் ஹோண்டா ஆக்டிவா தொடர்ந்து ஆதிக்கம் செலுத்தி வருகிறது. பல ஆண்டுகளாக மக்கள் வைத்துள்ள நம்பகத்தன்மை, சீரான மற்றும் நம்பகமான என்ஜின், வலுவான கட்டுமானத் தரம் மற்றும் சிறந்த மைலேஜ் ஆகியவை ஆக்டிவாவின் சிறப்பம்சங்கள் ஆகும். இது 110சிசி மற்றும் 125சிசி என இரண்டு என்ஜின் ஆப்ஷன்களில் கிடைக்கிறது.

டிரைவ்ஸ்பார்க் கருத்து: உலகின் மிக பெரிய ஸ்கூட்டர் சந்தைகளுள் இந்தியாவும் ஒன்றாகும். இதனாலேயே ஒவ்வொரு வருடமும் பல கவர்ச்சிகரமான ஸ்கூட்டர்கள் தொடர்ந்து இந்திய மார்க்கெட்டில் அறிமுகம் செய்யப்பட்ட வண்ணம் உள்ளன. இருப்பினும், இந்த தொகுப்பில் இடம்பிடித்துள்ள டாப்-5 ஸ்கூட்டர்களின் விற்பனையை கடந்த சில வருடங்களாகவே எந்த ஸ்கூட்டரும் முந்தவில்லை. அந்த அளவிற்கு மக்களின் மனதில் நீங்கா இடம்பிடித்து இருக்கும் இந்த 5 ஸ்கூட்டர்களுள் உங்களது ஃபேவரட் எது என்பதை கமெண்ட் பாக்ஸில் தெரிவிக்கவும்.