புதிய லுக்கில் கவாஸாகி Z650 S பைக்... விலையும் வசதிகளும் இதோ!

கவாஸாகி நிறுவனம் இந்தியாவில் தனது புதிய 2027 மாடல் Z650 S மோட்டார்சைக்கிளை அறிமுகப்படுத்தியுள்ளது. புதுப்பிக்கப்பட்ட வடிவமைப்பு, நவீன தொழில்நுட்ப வசதிகள் மற்றும் மேம்பட்ட ஓட்டுதல் அனுபவத்தை வழங்கும் வகையில் இந்த பைக் வடிவமைக்கப்பட்டு இருக்கிறது. இந்த புதிய மாடல் ரூ.7.59 லட்சம் எக்ஸ்ஷோரூம் விலையில் வந்துள்ளது.

இந்த புதிய மாடல் ஏற்கெனவே விற்பனையில் உள்ள கவாஸாகி Z650 பைக்கைக் காட்டிலும் ரூ.33,000 அதிக விலையில் அறிமுகமாகியுள்ளது. நாடு முழுவதும் உள்ள கவாஸாகி விற்பனையாளர்கள் மூலம் இதன் வினியோகம் தொடங்கப்பட்டுள்ளது. புதிய தோற்றத்துடன் நடுத்தர ரக பிரீமியம் பைக் சந்தையில் வாடிக்கையாளர்களைக் கவரும் நோக்கில் இது களமிறங்கியுள்ளது.

புதிய வடிவமைப்பு மற்றும் தோற்றம்

2027 கவாஸாகி Z650 S பைக்கில் நிறுவனத்தின் புகழ்பெற்ற Sugomi வடிவமைப்புத் தத்துவம் பயன்படுத்தப்பட்டுள்ளது. முன்புறத்தில் மறுவடிவமைக்கப்பட்ட LED ஹெட்லைட், பின்புறத்தில் புதிய LED டெயில் லைட் ஆகியவை இடம்பெற்றுள்ளன. இவை கவாஸாகி Z900 பைக்கின் வடிவமைப்பிலிருந்து சில அம்சங்களைப் பெற்றுள்ளன.

மேலும், பெரிய எரிபொருள் டேங்க் ஸ்கூப்புகள், கூர்மையான பாடி பேனல்கள், அலுமினிய ரேடியேட்டர் கவர்கள் ஆகியவை இதன் தோற்றத்தை மேலும் கம்பீரமாக மாற்றுகின்றன. பின்புறப் பகுதியும் உயர்த்தப்பட்ட வடிவமைப்பில் அமைக்கப்பட்டுள்ளது. இதனால் முந்தைய மாடலைவிட ஸ்போர்ட்டியான தோற்றம் கிடைக்கிறது.

இருக்கை உயரம் மற்றும் எடை

புதிய Z650 S பைக்கில் அகலமான ஹேண்டில்பார் வழங்கப்பட்டுள்ளது. இது சற்று முன்னோக்கி அமைக்கப்பட்டுள்ளதால், முந்தைய Z650 மாடலைவிட ஸ்போர்ட்டியான ஓட்டுதல் நிலையைப் பெற முடியும். இருக்கையின் உயரம் 790 மிமீயிலிருந்து 805 மிமீ ஆக அதிகரிக்கப்பட்டுள்ளது.

இந்த பைக்கின் எடை 193 கிலோவாக உள்ளது. முந்தைய மாடலைவிட 5 கிலோ அதிகமாகும். 15 லிட்டர் எரிபொருள் டேங்க் மற்றும் 130 மிமீ கிரவுண்ட் கிளியரன்ஸ் ஆகியவை மாற்றமின்றி தொடர்கின்றன. Pearl Blizzard White மற்றும் Candy Lime Green ஆகிய வண்ணத் தேர்வுகளில் இது விற்பனை செய்யப்படுகிறது.

Also Read

ஹீரோ கூட்டணியில் உருவான ஹார்லி டேவிட்சன் X350T பைக் வெளியானது!

எஞ்சின் மற்றும் செயல்திறன்

புதிய கவாஸாகி Z650 S பைக்கில் 649 சிசி, லிக்யூடு கூல்டு, பேரலல் ட்வின் எஞ்சின் பயன்படுத்தப்பட்டுள்ளது. இது அதிகபட்சமாக 67 எச்பி பவரையும், 64 என்எம் டார்க்கையும் வெளிப்படுத்துகிறது. இதில் 6 ஸ்பீடு கியர்பாக்ஸ் இணைக்கப்பட்டுள்ளது.

மேலும், Assist and Slipper Clutch வசதி அறிமுகப்படுத்தப்பட்டுள்ளது. இதனால் கிளட்ச் இயக்குவதற்கான முயற்சி குறைவதுடன், வேகமாக கியர் குறைக்கும்போது பின்புற சக்கரத்தின் நிலைத்தன்மையும் மேம்படுகிறது. விருப்பத் தேர்வாக Quickshifter வசதியையும் பெறலாம். Traction Control வசதியும் இடம்பெற்றுள்ளது.

Also Read

ரூ.4,499-ல் புதிய ஸ்டீல்பேர்டு FEC-3 ஹெல்மெட் அறிமுகம்: 3 பாதுகாப்புச் சான்றுகள், பிரீமியம் அம்சங்கள்!

புதிய தொழில்நுட்ப வசதிகள்

இந்த பைக்கில் 4.3 அங்குல வண்ண TFT டிஜிட்டல் இன்ஸ்ட்ரூமென்ட் கிளஸ்டர் வழங்கப்பட்டுள்ளது. இதில் வாகனத் தகவல்கள், பயணப் பதிவுகள் மற்றும் தேர்ந்தெடுக்கப்பட்ட மொபைல் அறிவிப்புகளைப் பார்க்க முடியும். ஸ்மார்ட்போன் இணைப்பு வசதியுடன் Turn-by-Turn Navigation வசதியும் கிடைக்கிறது.

சஸ்பென்ஷனைப் பொறுத்தவரையில் முன்புறத்தில் RSU ஃபோர்க்கும், பின்புறத்தில் Backlink மோனோஷாக்கும் வழங்கப்பட்டுள்ளன. பிரேக்கிங் அமைப்பில் முன்புறம் இரண்டு 272 மிமீ டிஸ்க்குகளும், பின்புறம் 186 மிமீ டிஸ்க்கும் இடம்பெற்றுள்ளன.

புதிய 2027 கவாஸாகி Z650 S பைக் புதிய தோற்றம், நவீன வசதிகள் மற்றும் மேம்படுத்தப்பட்ட கிளட்ச் தொழில்நுட்பத்துடன் அறிமுகமாகியுள்ளது. ஏற்கெனவே Z650 பைக்கை விரும்பும் வாடிக்கையாளர்களுக்கு இந்த மாடல் கூடுதல் தேர்வாக அமையும். ரூ.7.59 லட்சம் விலையில் பிரீமியம் நேக்கட் பைக் வாங்க நினைப்பவர்களின் கவனத்தை இந்த மாடல் ஈர்க்கும் என எதிர்பார்க்கப்படுகிறது.