வந்த வேகத்தில் மீண்டும் விடைபெற்றது பஜாஜ் பல்சர் 180 பைக்... ரசிகர்கள் ஏமாற்றம்!
இந்தியாவில் பல்சர் என்ற பெயருக்கு தனி ரசிகர் பட்டாளமே இருக்கிறது. குறிப்பாக 150சிசி முதல் 200சிசி வரையிலான மோட்டார்சைக்கிள் பிரிவில் பஜாஜ் பல்சர் மாடல்கள் நீண்டகாலமாக வாடிக்கையாளர்களின் சிறந்த தேர்வுகளில் ஒன்றாக இருந்து வருகின்றன. அந்த வரிசையில் தனித்துவமான இடத்தைப் பெற்றிருந்த பல்சர் 180 பைக் குறித்த செய்தி அதன் ரசிகர்களுக்கு ஏமாற்றத்தை தரும் வகையில் அமைந்துள்ளது.
ஆம், சில ஆண்டுகளுக்கு முன்பு விற்பனையிலிருந்து நீக்கப்பட்ட இந்த பைக்கை பஜாஜ் நிறுவனம் கடந்த ஏப்ரல் மாதம் மீண்டும் இந்தியச் சந்தையில் அறிமுகப்படுத்தியது. பழைய பல்சர் 180 மாடலை விரும்பியவர்களுக்கு இந்த மறுவருகை மகிழ்ச்சியை அளித்தது. ஆனால், அறிமுகமான ஆறே மாதங்களில் மீண்டும் விற்பனையிலிருந்து விலகியிருப்பதாகத் தகவல் வெளியாகியுள்ளது.

பஜாஜ் பல்சர் 180 பைக் கடந்த 2022ம் ஆண்டு விற்பனையிலிருந்து நீக்கப்பட்டது. அதன்பிறகு பல்சர் வரிசையில் 125, 150, 160 மற்றும் 200சிசி மாடல்களுக்கு நிறுவனம் முக்கியத்துவம் அளித்தது. இதனால் 180சிசி பிரிவில் இந்த மாடலை விரும்பிய வாடிக்கையாளர்களுக்கு மாற்று மோட்டார்சைக்கிள்களைத் தேர்ந்தெடுக்கும் சூழல் ஏற்பட்டது.
இந்நிலையில், கடந்த ஏப்ரல் மாதத்தில் பல்சர் 180 மீண்டும் அறிமுகப்படுத்தப்பட்டது. ஏற்கெனவே பிரபலமாக இருந்த வடிவமைப்பு மற்றும் செயல்திறனை விரும்பிய வாடிக்கையாளர்களை இலக்காகக் கொண்டு இந்த மோட்டார்சைக்கிள் சந்தைக்குக் கொண்டுவரப்பட்டது. குறிப்பாக டிவிஎஸ் அப்பாச்சி ஆர்டிஆர் 180 மாடலுக்குப் போட்டியாகவும் இது அமைந்திருந்தது.
ஆனால் தற்போது பஜாஜ் நிறுவனத்தின் அதிகாரப்பூர்வ இணையதளத்தில் பல்சர் 180 இடம்பெறவில்லை. சமீபத்திய இணையதளப் புதுப்பிப்புக்குப் பிறகு இந்த மோட்டார்சைக்கிள் பட்டியலிலிருந்து நீக்கப்பட்டுள்ளது. இதன் அடிப்படையில் விற்பனை நிறுத்தப்பட்டிருக்கலாம் என்று தகவல்கள் தெரிவிக்கின்றன. இருப்பினும், இதுகுறித்து நிறுவனம் இதுவரை அதிகாரப்பூர்வ அறிவிப்பை வெளியிடவில்லை.
பல்சர் 180 மோட்டார்சைக்கிளின் கடைசியாகப் ரூ.1.22 லட்சம் விலையில் இருந்தது. இந்த விலைப் பிரிவில் 180சிசி எஞ்சின் கொண்ட மோட்டார்சைக்கிளைத் தேடிய வாடிக்கையாளர்களுக்கு இது ஒரு தேர்வாக இருந்தது. தற்போது இணையதளத்தில் இடம்பெறாததால் புதிய வாகனங்களின் விற்பனை நிலை குறித்து கேள்விகள் எழுந்துள்ளன.
இருப்பினும், ஏற்கெனவே டீலர்ஷிப்புகளில் இருப்பில் உள்ள பல்சர் 180 பைக்குகள் வாடிக்கையாளர்களுக்கு டெலிவிரி கிடைக்க வாய்ப்புள்ளது. எனவே பல்சர் 180 வாங்கத் திட்டமிடுபவர்கள் அருகிலுள்ள பஜாஜ் ஷோரூம்களைத் தொடர்புகொண்டு இருப்பு மற்றும் விலை விவரங்களை உறுதிப்படுத்திக்கொள்வது நல்லது. புதிய விற்பனை முன்பதிவுகள் ஏற்கப்படுகிறதா என்பதையும் விசாரித்துக் கொள்வது அவசியம்.
பஜாஜ் பல்சர் 180 பைக்கில் 178.6சிசி எஞ்சின் வழங்கப்பட்டிருந்தது. இந்த எஞ்சின் அதிகபட்சமாக 8,500 ஆர்பிஎம்மில் 17 எச்பி பவரையும், 6,500 ஆர்பிஎம்மில் 15 என்எம் டார்க்கையும் வெளிப்படுத்தும் திறன் கொண்டது. இந்த எஞ்சினுடன் 5 ஸ்பீடு கியர்பாக்ஸ் இணைக்கப்பட்டிருந்தது. நகர்ப்புறப் பயணங்களுக்கும் நெடுஞ்சாலைப் பயணங்களுக்கும் ஏற்ற வகையில் இதன் செயல்திறன் அமைந்திருந்தது. குறிப்பாக 150சிசி மோட்டார்சைக்கிளைவிட கூடுதல் பவர் தேடும் வாடிக்கையாளர்களுக்கு 180சிசி பிரிவில் இது ஒரு மாறுபட்ட தேர்வாக இருந்தது.
சமீபத்தில் பல்சர் 125 மற்றும் பல்சர் 150 பைக்குகளில் குறிப்பிடத்தக்க தொழில்நுட்ப மற்றும் பிளாட்ஃபார்ம் மாற்றங்களை பஜாஜ் ஆட்டோ அறிமுகப்படுத்தியுள்ளது. ஆனால் பல்சர் 180 பைக்கிற்கும் இதேபோன்ற பெரிய அப்டேட் கிடைக்கும் என்பதற்கான அறிகுறிகளும் தற்போது இல்லை. எதிர்காலத்தில் மீண்டும் சந்தைக்கு வருவதற்கான வாய்ப்பை முழுமையாக நிராகரிக்க முடியாது. எனினும், மீண்டும் விற்பனைக்கு கொண்டு வரப்பட்டு ஆறு மாதங்களிலேயே பல்சர் 180 தற்போது மீண்டும் விற்பனையிலிருந்து விலகியிருப்பது பல்சர் ரசிகர்களுக்கு ஏமாற்றமாக அமைந்துள்ளது.


Click it and Unblock the Notifications


