ரூ.89,999 விலையில் புதிய இ-ஸ்பிரின்டோ ஜி1 எலெக்ட்ரிக் ஸ்கூட்டர் அறிமுகம்!

இந்தியாவில் எலெக்ட்ரிக் ஸ்கூட்டர்களுக்கான வரவேற்பு அதிகரித்து வரும் நிலையில், இ-ஸ்பிரின்டோ (e-SPRINTO) நிறுவனம் தனது புதிய ஜி1 (G1) எலெக்ட்ரிக் ஸ்கூட்டரை விற்பனைக்கு அறிமுகப்படுத்தியுள்ளது. குடும்பங்களின் அன்றாடப் பயணத்தைக் கருத்தில் கொண்டு உருவாக்கப்பட்டுள்ள இந்த ஸ்கூட்டர், ரூ.89,999 ஆரம்ப விலையில் விற்பனைக்கு வந்துள்ளது. இந்த ஸ்கூட்டர் அதிகபட்சமாக 130 கி.மீ வரை ரேஞ்ச் வழங்கும் என நிறுவனம் தெரிவித்துள்ளது.

இதுவரை வர்த்தக பயன்பாட்டுக்கான மின்சார வாகனச் சந்தையில் கவனம் செலுத்தி வந்த இ-ஸ்பிரின்டோ, தற்போது தனிப்பட்ட வாடிக்கையாளர்களுக்கான சந்தையிலும் தனது வர்த்தகத்தை விரிவுபடுத்துகிறது. மூன்று பேட்டரி தேர்வுகள், வெவ்வேறு ரைடிங் மோடுகள் மற்றும் அன்றாடப் பயன்பாட்டுக்கு உதவும் வசதிகளுடன் ஜி1 ஸ்கூட்டர் அறிமுகமாகியுள்ளது.

விலை மற்றும் வேரியண்ட்டுகள்

இ-ஸ்பிரின்டோ ஜி1 எலெக்ட்ரிக் ஸ்கூட்டர் மூன்று பேட்டரி திறன் தேர்வுகளில் கிடைக்கிறது. இதன் 2.0 கிலோவாட் ஹவர் பேட்டரி கொண்ட அடிப்படை வேரியண்ட் ரூ.89,999 விலையிலும், 2.5 கிலோவாட் ஹவர் பேட்டரி கொண்ட மிட் வேரியண்ட் ரூ.94,999 விலையிலும் கிடைக்கிறது. அதிக பேட்டரி திறன் கொண்ட 3.0 கிலோவாட் ஹவர் வேரியண்ட் ரூ.99,999 விலையில் அறிமுகம் செய்யப்பட்டுள்ளது.

இந்த வேரியண்ட்டுகள் முறையே ஒருமுறை முழுமையாக சார்ஜ் செய்தால் 80 கிமீ, 100 கிமீ மற்றும் 130 கிமீ வரை செல்லும் என நிறுவனம் தெரிவித்துள்ளது. எனினும், உண்மையான பயன்பாட்டில் கிடைக்கும் ரேஞ்ச், பயணிக்கும் வேகம், சாலை நிலை, வாகனத்தில் ஏற்றப்படும் எடை மற்றும் ஓட்டும் முறையைப் பொறுத்து மாறுபடலாம்.

Also Read

250 கிமீ ரேஞ்ச், கழற்றி மாட்டும் பேட்டரி.. புதிய விஎல்எஃப் மின்சார ஸ்கூட்டர் அறிமுகம்!

பேட்டரி மற்றும் செயல்திறன்

ஜி1 ஸ்கூட்டரில் மூன்று பேட்டரி தேர்வுகள் வழங்கப்படுவது முக்கிய அம்சமாகும். குறைந்த தூரம் பயணிப்பவர்களுக்கு அடிப்படை வேரியண்ட் ஏற்றதாக இருக்கலாம். தினசரி அதிக தூரம் பயணிப்பவர்கள் கூடுதல் பேட்டரி திறன் கொண்ட வேரியண்ட்களைத் தேர்வு செய்யலாம்.

இந்த ஸ்கூட்டரில் அதிகபட்சமாக மணிக்கு 50 கி.மீ வேகத்தில் செல்ல முடியும். மேலும், எக்கோ (Eco), சிட்டி (City), ஸ்போர்ட் (Sport) என மூன்று ரைடிங் மோடுகள் வழங்கப்பட்டுள்ளன. எக்கோ மோடில் மணிக்கு 30 கி.மீ வேகமும், சிட்டி மோடில் மணிக்கு 40 கி.மீ வேகமும், ஸ்போர்ட் மோடில் மணிக்கு 50 கி.மீ வேகமும் கிடைக்கும் என தெரிவிக்கப்பட்டுள்ளது. பேட்டரியை முழுமையாக சார்ஜ் செய்ய சுமார் 4 முதல் 4.5 மணி நேரம் தேவைப்படும் என்று தெரிவிக்கப்பட்டு இருக்கிறது.

வடிவமைப்பு மற்றும் முக்கிய வசதிகள்

இ-ஸ்பிரின்டோ ஜி1 ஸ்கூட்டர் குடும்பப் பயன்பாட்டுக்கு ஏற்ற வழக்கமான ஸ்கூட்டர் வடிவமைப்பைக் கொண்டுள்ளது. முன்புறத்தில் பெரிய பேனல், ஹேண்டில்பாரில் பொருத்தப்பட்ட எல்இடி முகப்பு விளக்கு மற்றும் குரோம் அலங்காரங்கள் இடம்பெற்றுள்ளன. பின்புறத்திலும் நீளமான பாடி பேனல்கள் கொடுக்கப்பட்டுள்ளன.

இந்த ஸ்கூட்டரில் டிஜிட்டல் இன்ஸ்ட்ரூமென்ட் திரை வழங்கப்பட்டுள்ளது. பயண வேகம் உள்ளிட்ட முக்கியத் தகவல்களை இதில் தெரிந்துகொள்ளலாம். மொபைல் போன்களை சார்ஜ் செய்வதற்கான யுஎஸ்பி சார்ஜிங் வசதியும் இடம்பெற்றுள்ளது. மேலும், ரிவர்ஸ் மோடு இருப்பதால் குறுகிய இடங்களில் ஸ்கூட்டரைப் பின்னோக்கி நகர்த்துவது எளிதாக இருக்கும். சந்தா அடிப்படையிலான தேர்வில் டர்ன்-பை-டர்ன் நேவிகேஷன் வசதியும் கிடைக்கும்.

Also Read

LED விளக்குகள், புதிய வண்ணத் தேர்வுகளில் 2026 டிவிஎஸ் ரேடியான் பைக் அறிமுகம்... விலை ரூ.67,100 முதல்!

பாதுகாப்பு மற்றும் குடும்பப் பயன்பாடு

இ-ஸ்பிரின்டோ ஜி1 ஸ்கூட்டரில் கம்பைன்டு பிரேக்கிங் சிஸ்டம் (CBS) வழங்கப்பட்டுள்ளது. முன் மற்றும் பின்புற பிரேக்குகளின் செயல்பாட்டை ஒருங்கிணைக்க உதவும் இந்த அமைப்பு, பிரேக்கிங் சமநிலையை மேம்படுத்தும் நோக்கத்துடன் வழங்கப்படுகிறது.

மேலும், திருட்டை எச்சரிக்கும் அலாரம், வாகனத்தைக் கண்டறிய உதவும் வசதி மற்றும் சைடு ஸ்டாண்ட் கட்-ஆஃப் சென்சார் ஆகியவையும் இடம்பெற்றுள்ளன. சைடு ஸ்டாண்ட் சரியாக மடக்கப்படவில்லை என்றால் வாகனம் இயங்குவதைத் தடுப்பதற்கு இந்த சென்சார் உதவும்.

இந்த ஸ்கூட்டரில் 12 அங்குல டியூப்லெஸ் டயர்கள், முன்புறத்தில் டெலிஸ்கோபிக் சஸ்பென்ஷன் மற்றும் பின்புறத்தில் இரட்டை ஷாக் அப்சார்பர்கள் வழங்கப்பட்டுள்ளன. தரையிலிருந்து 165 மிமீ கிரவுண்ட் கிளியரன்ஸ் கொண்டுள்ளதுடன், அதிகபட்சமாக 150 கிலோ எடையைச் சுமக்கும் திறனையும் பெற்றுள்ளது. பேட்டரிக்கு ஐபி67 பாதுகாப்புத் தரம் வழங்கப்பட்டுள்ளதாகவும் தெரிவிக்கப்பட்டுள்ளது.

வண்ணத் தேர்வுகள்

இ-ஸ்பிரின்டோ ஜி1 எலெக்ட்ரிக் ஸ்கூட்டர் சார்கோல் பிளாக் (Charcoal Black), ஸ்லேட் கிரே (Slate Grey), ஹொரைசன் ப்ளூ (Horizon Blue), பைன் கிரீன் (Pine Green) என நான்கு வண்ணத் தேர்வுகளில் கிடைக்கிறது. இந்த ஸ்கூட்டருக்கு முன்பதிவு தொடங்கியுள்ள நிலையில், வாடிக்கையாளர்களுக்கான டெலிவரி வரும் 2027ம் ஆண்டு ஜனவரி 1 முதல் தொடங்கும் என நிறுவனம் தெரிவித்துள்ளது.