கர்நாடகாவில் இனி அரை ஹெல்மெட்டுக்கு தடை... அரசு அதிரடி அறிவிப்பு!
கர்நாடகாவில் இருசக்கர வாகன ஓட்டிகளுக்கான பாதுகாப்பு விதிகளில் முக்கிய மாற்றம் கொண்டுவர மாநில அரசு தயாராகி வருகிறது. இனி அரை ஹெல்மெட் (Half Face Helmet) அணிந்து வாகனம் ஓட்டுவதற்குத் தடை விதிக்கப்பட உள்ளது. இந்த புதிய விதிமுறை நடப்பு ஆண்டின் இறுதிக்குள் அமலுக்கு வரும் என்று போக்குவரத்துத் துறை அமைச்சர் அறிவித்துள்ளார்.
இதுமட்டுமின்றி, ஓலா (Ola), ஊபர் (Uber) உள்ளிட்ட மொபைல் செயலி அடிப்படையிலான டாக்ஸிகளுக்கும் கட்டண மீட்டர் பொருத்துவது கட்டாயமாக்கப்பட உள்ளது. இதற்கான விதிமுறைகளை அரசு தயாரித்து வருகிறது.

இதுகுறித்து கர்நாடக போக்குவரத்துத் துறை அமைச்சர் பைரதி சுரேஷ் வெளியிட்டுள்ள அறிவிப்பின்படி, இருசக்கர வாகன ஓட்டிகள் பயன்படுத்தும் அரை ஹெல்மெட்டுகளுக்குத் தடை விதிக்கப்பட உள்ளது. இதற்கான சட்ட நடவடிக்கைகள் மேற்கொள்ளப்பட்டு வருகின்றன. இந்தத் தடை புத்தாண்டுக்கு முன்பாக அமலுக்கு வரும் என்று அமைச்சர் சுரேஷ் தெரிவித்துள்ளார்.
தற்போது சந்தைகளில் கிடைக்கும் அரை ஹெல்மெட்டுகள் தலையின் மேற்பகுதியை மட்டுமே பாதுகாக்கின்றன. முகம், தாடை, காதுகள் மற்றும் கழுத்தின் கீழ்ப்பகுதி ஆகியவற்றுக்கு போதிய பாதுகாப்பு கிடைப்பதில்லை. விபத்துகளின்போது இத்தகைய ஹெல்மெட்டுகள் கடுமையான காயங்களைத் தடுக்க போதுமானதாக இருக்காது என்பதால் அரசு இந்த நடவடிக்கையை முன்னெடுத்துள்ளது.
இந்த விவகாரத்தில் ஹெல்மெட் பயன்படுத்துபவர்கள் மட்டுமின்றி, அவற்றை விற்பனை செய்யும் கடைக்காரர்கள் மற்றும் தயாரிப்பு நிறுவனங்கள் மீதும் நடவடிக்கை எடுக்க அரசு திட்டமிட்டுள்ளது. கடந்த அக்டோபர் மாதத்திலேயே போக்குவரத்துத் துறை மற்றும் உள்துறை அதிகாரிகள் இணைந்து, அரை ஹெல்மெட்டுகளைத் தடை செய்வதற்கான சட்ட ஆலோசனையை அரசிடம் கோரிக்கை வைத்திருந்தனர்.
இதுதவிர்த்து, இனிமேல் ஓலா, ஊபர் போன்ற செயலிகள் மூலம் இயங்கும் டாக்ஸிகளிலும் கட்டண மீட்டர் கட்டாயம் பொருத்தப்பட வேண்டும் என்று அமைச்சர் தெரிவித்துள்ளார். இதன்மூலம் அனைத்து டாக்ஸிகளும் அரசால் நிர்ணயிக்கப்பட்ட கட்டணத்தின் அடிப்படையிலேயே பயணிகளிடம் பணம் வசூலிக்க வேண்டிய நிலை உருவாகும்.
தற்போது செயலி அடிப்படையிலான டாக்ஸிகளில் பயண தூரம், தேவை, நேரம் உள்ளிட்ட பல்வேறு காரணிகளுக்கு ஏற்ப கட்டணம் மாறுபடுகிறது. குறிப்பாக அதிக தேவை இருக்கும் நேரங்களில் பயணக் கட்டணம் உயர்வதாகப் புகார்கள் எழுகின்றன. இதைக் கட்டுப்படுத்தவும், கட்டண வசூலில் வெளிப்படைத்தன்மையை உருவாக்கவும் மீட்டர் முறை உதவும் என்று எதிர்பார்க்கப்படுகிறது.
இதற்கான சட்ட விதிமுறைகள் மற்றும் நடைமுறைகளை உருவாக்கும் பணிகள் தற்போது நடைபெற்று வருகின்றன. புதிய விதிகளை மீறி பயணிகளிடம் கூடுதல் கட்டணம் வசூலிக்கும் நிறுவனங்கள் மற்றும் ஓட்டுனர்கள் மீது அபராதம் உள்ளிட்ட நடவடிக்கைகள் எடுக்கப்படும் என்றும் அமைச்சர் எச்சரித்துள்ளார். இந்த நடவடிக்கை டாக்ஸி உரிமையாளர்களின் கோரிக்கையைத் தொடர்ந்து எடுக்கப்பட்டுள்ளது.
இதற்கிடையே, இருசக்கர வாகனங்களை நடைபாதையில் ஓட்டுபவர்களுக்கான அபராதத்தையும் கர்நாடக அரசு உயர்த்தியுள்ளது. முதல்முறை விதிமீறலில் ஈடுபட்டால் ரூ.5,000 அபராதம் விதிக்கப்படும். அதே தவறை இரண்டாவது முறையாகச் செய்தால் அபராதம் ரூ.10,000 ஆக உயர்த்தப்படும் என்று அமைச்சர் தெரிவித்துள்ளார்.
மூன்றாவது முறையாக இதே விதிமீறலில் ஈடுபடும் வாகன ஓட்டிகளின் வாகனமே பறிமுதல் செய்யப்படும் என்றும் அறிவிக்கப்பட்டுள்ளது. நடைபாதைகள் பாதசாரிகளின் பாதுகாப்பிற்காக ஒதுக்கப்பட்டுள்ள நிலையில், அவற்றை இருசக்கர வாகனங்கள் பயன்படுத்துவதைத் தடுக்கவே இந்த நடவடிக்கை எடுக்கப்படுகிறது. இதற்கான விதிமுறைகளும் அரசு ஒப்புதலுக்குப் பிறகு அமலுக்கு வரும்.
இதுதவிர, வியட்நாமைச் சேர்ந்த கிரீன் எஸ்எம் (Green SM) டாக்ஸி நிறுவனத்தின் புதிய வாகனப் பதிவுகளுக்கும் கர்நாடக அரசு தற்காலிகத் தடை விதித்துள்ளது. ஏற்கெனவே அந்த நிறுவனத்தின் 100 டாக்ஸிகள் கர்நாடகாவில் பதிவு செய்யப்பட்டுள்ளன. மறு உத்தரவு வரும் வரை புதிய வாகனங்களைப் பதிவு செய்யக்கூடாது என்று போக்குவரத்துத் துறைக்கு அறிவுறுத்தப்பட்டுள்ளது.


Click it and Unblock the Notifications


