ஜூலை 2ஆம் தேதி நடக்க போகும் தரமான சம்பவம்! பெட்ரோல் பைக்குகளுக்கு போட்டியாக புதிய எலெக்ட்ரிக் பைக்!

இந்தியாவின் எலெக்ட்ரிக் இருசக்கர வாகனச் சந்தையில் ஆரம்பகால புரட்சியை ஏற்படுத்திய ரெவோல்ட் மோட்டார்ஸ் (Revolt Motors), தனது அடுத்த பிரம்மாண்ட படைப்பை வெளியிடத் தயாராகிவிட்டது. வரும் ஜூலை 2ஆம் தேதி அன்று புதிய அதிநவீன எலெக்ட்ரிக் மோட்டார்சைக்கிள் ஒன்றை அறிமுகப்படுத்த திட்டமிட்டுள்ளது இந்த குருகிராம் நகரத்தை சேர்ந்த நிறுவனம்.

இது வெறும் சாதாரண எலெக்ட்ரிக் பைக்கா அல்லது எலெக்ட்ரிக் வாகன உலகையே அசைத்துப் பார்க்கப்போகும் ஒரு புதிய மைல்கல்லா என்கிற எதிர்பார்ப்பு இப்போதே எகிறியுள்ளது. இந்த நிலையில் தற்போது ரெவோல்ட் நிறுவனம் வெளியிட்டுள்ள மர்மமான டீசர் புகைப்படம், வாகனப் பிரியர்களிடையே பெரும் விவாதத்தை ஏற்படுத்தியுள்ளது.

டீசரில், போர்வையால் மூடப்பட்டிருக்கும் மோட்டார்சைக்கிள் பார்ப்பதற்கே மிகவும் கம்பீரமாகவும், உயரமாகவும், ஆக்ரோஷமான ஸ்போர்ட்டியான வடிவமைப்போடும் காட்சியளிக்கிறது. டீசரில் நகர்புற போக்குவரத்து சூழல் காட்டப்பட்டுள்ளதால், ரெவோல்ட்டின் இந்த புதிய எலெக்ட்ரிக் பைக் ஆனது நகர்புறத்தில் ஓட்டக்கூடிய ஸ்ட்ரீட்ஃபைட்டர் தோற்றத்தில் இருக்கலாம். 'உங்களுக்கு தெரிந்தது போன்று நகருங்கள்' என்கிற கேப்ஷன் உடன் டீசர் படங்கள் வெளியிடப்பட்டுள்ளன.

இந்த நிலையில், சமீபத்தில் வெளியிடப்பட்டுள்ள டீசரில் ஜூலை 2ஆம் தேதி மாலை 5.30 மணியளவில் இந்த புதிய எலெக்ட்ரிக் பைக்கை அறிமுகம் செய்ய உள்ளதாக ரெவோல்ட் நிறுவனம் தெரிவித்துள்ளது. இந்த புதிய பைக் ஆனது தற்போதைய புகழ்பெற்ற ரெவோல்ட் RV400 எலெக்ட்ரிக் பைக்கின் மேம்படுத்தப்பட்ட பதிப்பா அல்லது ஒட்டுமொத்த சந்தையையும் மிரட்ட வரும் ஒரு புதிய பிரீமியம் மாடலா? என்பது தெரியவில்லை.

இதன் ஸ்போர்ட்டியான லுக் மற்றும் கம்பீரமான மிரர்கள், இது அல்ட்ராவாய்லெட் எஃப்77 (Ultraviolette F77) எலெக்ட்ரிக் பைக்கிற்கு நேரடிப் போட்டியாக அமையலாம் என்கிற யூகங்களை பலப்படுத்தியுள்ளது. புதிய தொழில்நுட்பங்களுடன் வெளிவரவிருக்கும் இந்த பைக்கில் என்னென்ன சிறப்பம்சங்கள் இருக்கப் போகின்றன? என்று பார்த்தால், வழக்கம்போல ஸ்மார்ட்ஃபோனை MyRevolt செயலி மூலம் இணைக்கும் AI வசதிகள் இடம்பெறலாம்.

அதேபோல், சாலையில் பயணிக்கும்போது பாதுகாப்பை உறுதி செய்ய நான்கு விதமான செயற்கை என்ஜின் சத்தங்களை (artificial sound modes) உருவாக்கும் வசதியும் இதில் இருக்கும் என நம்பப்படுகிறது. மேலும், இதில் பயன்படுத்தப்படவுள்ள அதிநவீன லித்தியம்-இரும்பு பேட்டரி பேக்குகள் நீர், அதிர்வுகள் மற்றும் அனைத்து காலநிலைகளையும் தாங்கும் திறன் கொண்டவையாக இருக்கும் என்பது உறுதி.

மிகக் குறுகிய நேரத்தில் சார்ஜ் ஆகும் வகையில் அல்ட்ரா-ஃபாஸ்ட் சார்ஜிங் வசதியோடு, நீண்ட தூரப் பயணத்திற்கான அதிகப்படியான ரேஞ்ச் (Range) இந்த புதிய ரெவோல்ட் பைக்கில் இருக்கும் என எதிர்பார்க்கப்படுகிறது. ரெவோல்ட் நிறுவனத்தின் தற்போதைய தயாரிப்புகள் மற்றும் அவற்றின் எக்ஸ்-ஷோரூம் விலை விவரங்கள் இதோ...

டிரைவ்ஸ்பார்க் கருத்து: இந்தியாவில் முதன்முதலாக எலெக்ட்ரிக் பைக்கை அறிமுகம் செய்த நிறுவனமாக ரெவோல்ட் விளங்குகிறது. எலெக்ட்ரிக் ஸ்கூட்டர்களை தான் பெரும்பாலான நிறுவனங்கள் அறிமுகம் செய்துவந்த சமயத்தில் தைரியமாக எலெக்ட்ரிக் பைக்கை அறிமுகம் செய்து ரெவோல்ட் மலைக்க வைத்தது. இந்திய எலெக்ட்ரிக் வாகன உலகையே திரும்பிப் பார்க்க வைக்கப்போகும் ஜூலை 2ஆம் தேதியான நாளைய தினத்திற்காக ஒட்டுமொத்த ஆட்டோமொபைல் உலகமே ஆவலோடு காத்துக் கொண்டிருக்கிறது!