Click it and Unblock the Notifications
ரூ.4.26 லட்சத்தில் ராயல் என்ஃபீல்டு கிளாசிக் 650 லிமிடேட் எடிஷன்.. 125 பைக்குகள் மட்டுமே!
ராயல் என்ஃபீல்டு நிறுவனத்தின் 125வது ஆண்டு நிறைவைக் கொண்டாடும் வகையில், கிளாசிக் 650 மோட்டார்சைக்கிளின் சிறப்பு பதிப்பு இந்தியாவில் அறிமுகம் செய்யப்பட்டுள்ளது. ரூ.4.26 லட்சம் என்ற எக்ஸ்ஷோரூம் விலையில் விற்பனைக்கு வந்துள்ள இந்த மாடல், தனித்துவமான வண்ணத் தோற்றம் மற்றும் குறைந்த எண்ணிக்கையில் விற்பனை செய்யப்படும் என்ற விஷயங்களால் கவனம் ஈர்த்துள்ளது.
ராயல் என்ஃபீல்டு நிறுவனம் தனது 125 ஆண்டு மோட்டார்சைக்கிள் பாரம்பரியத்தைக் கொண்டாடும் வகையில் இந்த சிறப்புப் பதிப்பை உருவாக்கியுள்ளது. உலகின் முக்கிய சந்தைகள் ஒவ்வொன்றிலும் தலா 125 பைக்குகள் மட்டுமே விற்பனை செய்யப்பட உள்ளன. இதனால், வழக்கமான மாடல்களை விட பிரத்யேகமான பைக்கை விரும்பும் வாடிக்கையாளர்களுக்கு இது ஒரு முக்கியமான தேர்வாக இருக்கும்.
இந்த புதிய மாடலுக்கான முன்பதிவு இன்று பிற்பகல் 2 மணி முதல் நிறுவனத்தின் அதிகாரப்பூர்வ இணையதளம் மற்றும் மொபைல் செயலி வாயிலாகத் தொடங்கி உள்ளது. அக்டோபர் 28ம் தேதி வரை முன்பதிவு செய்ய வாய்ப்பு வழங்கப்படும் என அறிவிக்கப்பட்டுள்ளது. வாடிக்கையாளர்களுக்கான டெலிவரி வரும் நவம்பர் முதல் தொடங்கத் திட்டமிடப்பட்டுள்ளது.
நிறம் மாறும் ஹைப்பர்ஷிஃப்ட் பெயிண்ட்
இந்த பைக்கின் மிக முக்கியமான சிறப்பம்சம் அதன் ஹைப்பர்ஷிஃப்ட் வண்ணப்பூச்சு ஆகும். ஒளி விழும் கோணம் மற்றும் சூழலுக்கு ஏற்ப சிவப்பு, பச்சை, தங்கம் ஆகிய நிறங்களில் மாறுபட்ட தோற்றத்தை இது வழங்கும். 1901ம் ஆண்டில் பயன்படுத்தப்பட்ட பித்தளை நிறத்தை அடிப்படையாகக் கொண்டு இந்த வண்ண வடிவமைப்பு உருவாக்கப்பட்டுள்ளது.
மேலும், தங்க நிறத்தில் 125 ஆண்டு நிறைவைக் குறிக்கும் சின்னம், பிரத்யேக பக்கவாட்டு அலங்காரப் பெயர்ப்பலகைகள் மற்றும் கையால் வரையப்பட்ட கோடுகள் ஆகியவை இந்த பைக்கின் தோற்றத்தை மேலும் மெருகூட்டுகின்றன. கிளாசிக் வரிசையின் அடையாளமான கண்ணீர்த்துளி வடிவ எரிபொருள் டேங்க் மற்றும் முன்பக்க முகப்பு விளக்கு அமைப்பும் தொடர்ந்து இடம்பெறுகின்றன.
எஞ்சின்
இந்த சிறப்புப் பதிப்பில் வழக்கமான கிளாசிக் 650 பைக்கில் உள்ள அதே 648 சிசி இரட்டை சிலிண்டர் எஞ்சின்தான் வழங்கப்பட்டுள்ளது. இது அதிகபட்சமாக 46.4 எச்பி திறனையும், 52.3 என்எம் டார்க்கையும் வெளிப்படுத்துகிறது. இதனுடன் 6 ஸ்பீடு கியர்பாக்ஸ் இணைக்கப்பட்டுள்ளது. எஞ்சினில் எந்த மாற்றங்களும் இல்லை.
முக்கிய வசதிகள்
இந்த மோட்டார்சைக்களின் முன்புறத்தில் ஷோவா டெலிஸ்கோபிக் சஸ்பென்ஷன், பின்பக்கத்தில் இரட்டை ஷாக் அப்சார்பர்கள், இரட்டை சேனல் ஏபிஎஸ் பிரேக்கிங் வசதி மற்றும் முன்புறத்தில் 19 அங்குல சக்கரமும், பின்புறத்தில் 18 அங்குல சக்கரமும் வழங்கப்பட்டுள்ளன. மேலும், யூஎஸ்பி டைப்-சி சார்ஜிங் வசதி மற்றும் கியர் நிலை குறித்த தகவல், எரிபொருள் அளவு உள்ளிட்ட தகவல்களைக் காட்டும் டிஜிட்டல் எல்சிடி திரையும் இடம்பெற்றுள்ளன.
இந்த லிமிடேட் எடிசன் ராயல் என்ஃபீல்டு கிளாசிக் 650 மோட்டார்சைக்கிள் பாரம்பரிய வடிவமைப்பு மற்றும் அரிய சேகரிப்பு பைக்காக வாங்க விரும்புபவர்களை இலக்காகக் கொண்டு அறிமுகம் செய்யப்பட்டுள்ளது. ரூ.4.26 லட்சம் எக்ஸ்ஷோரூம் விலையில் அறிமுகமாகியுள்ள இந்த மோட்டார்சைக்கிள் தனித்துவத்தை விரும்புவோருக்கு மிகச் சிறந்த தேர்வாக அமையும்.
Continue with Google
