ஓலா நம்பர் 1 இடத்தில் இருக்கும்னு நினைப்பீங்க... அதான் இல்ல!! தமிழ்நாட்டு கம்பெனி கஸ்டமர்ஸை அள்ளுது!

2025ஆம் ஆண்டில், இந்திய எலெக்ட்ரிக் 2-வீலர் மார்க்கெட் குறிப்பிடத்தக்க வளர்ச்சியைப் பதிவு செய்துள்ளது. வழக்கமான பெட்ரோல் ஸ்கூட்டர்கள் மற்றும் மோட்டார்சைக்கிள்களில் இருந்து எலெக்ட்ரிக் வாகனங்களுக்குப் பெரும் எண்ணிக்கையிலான வாடிக்கையாளர்கள் மாறியதே இதற்குக் காரணம் ஆகும். ஆட்டோகார் இந்தியா (Autocar India) செய்தித்தளம் வெளியிட்ட அறிக்கையின்படி, 2024 உடன் ஒப்பிடும்போது இந்திய எலெக்ட்ரிக் இரு சக்கர வாகனப் பிரிவு 11% வளர்ச்சி கண்டுள்ளது.

இதில் மொத்த விற்பனையில் 95%க்கும் அதிகமானவை எலெக்ட்ரிக் ஸ்கூட்டர்கள் (Electric Scooters) ஆகும். கடந்த சில ஆண்டுகளாக, ஓலா எலக்ட்ரிக் (Ola Electric) நிறுவனம் இந்திய எலெக்ட்ரிக் ஸ்கூட்டர் பிரிவில் ஆதிக்கம் செலுத்தி வந்தது. எனினும், 2025ஆம் ஆண்டில் பாரம்பரிய உற்பத்தியாளரான டிவிஎஸ் மோட்டார் (TVS Motor) நிறுவனம் முதல்முறையாக ஓலா எலக்ட்ரிக்கை முந்தி, முதலிடத்தைப் பிடித்துள்ளது.

இதற்கு காரணம், நகர்ப்புற குடும்பப் பயனர்களிடையே டிவிஎஸ் ஐக்யூப் (iQube) மிகவும் பிரபலமாக இருப்பது ஆகும். 2025இல் எட்டு மாதங்களில் டிவிஎஸ் மோட்டார் சிறந்த எலெக்ட்ரிக் வாகன விற்பனையாளராக முன்னிலை வகித்தது. கடந்த மாதத்தில் விற்பனையான மொத்த எலெக்ட்ரிக் 2-வீலர்களில் டிவிஎஸ் சுமார் 23% பங்கைப் பெற்றுள்ளது. மேலும், 3 லட்சம் யூனிட் விற்பனை இலக்கை மிகக் குறைந்த வித்தியாசத்தில் டிவிஎஸ் தவறவிட்டது.

மற்றொரு பாரம்பரிய 2-வீலர் உற்பத்தியாளரான பஜாஜ் ஆட்டோ (Bajaj Auto), 2025இல் அதிக எலெக்ட்ரிக் 2-வீலர்களை விற்பனை செய்த நிறுவனமாக இரண்டாம் இடத்தைப் பிடித்துள்ளது. டிவிஎஸ் ஐக்யூபைப் போன்றே வயதானவர்களையும் கவர்ந்த சேத்தக் (Chetak) எலெக்ட்ரிக் ஸ்கூட்டரை பஜாஜ் இந்தியாவில் விற்பனை செய்கிறது. பல தசாப்தங்களுக்கு முன்பு பிரபலமாக இருந்த சேத்தக் ஸ்கூட்டரின் எலெக்ட்ரிக் பதிப்பே தற்போது விற்பனையில் இருக்கும் சேத்தக் ஆகும்.

இந்த எலெக்ட்ரிக் சேத்தக் மூலம், எலெக்ட்ரிக் 2-வீலர்ஸ் மார்க்கெட்டில் பஜாஜ் தனது சந்தைப் பங்கை 21% ஆக உயர்த்தியுள்ளது. 2024 உடன் ஒப்பிடுகையில், 39% என்ற ஈர்க்கக்கூடிய வளர்ச்சியை நடந்து முடிந்த 2025இல் பதிவு செய்துள்ள பஜாஜ் 2025இன் பிற்பகுதியில் விநியோகச் சிக்கல்களால் உற்பத்தித் தடங்கல்கள் ஏற்பட்ட போதிலும், 2.5 லட்சம் சேத்தக் எலெக்ட்ரிக் ஸ்கூட்டர்களை விற்பனை செய்துள்ளது.

இந்திய ஸ்டார்ட்அப் நிறுவனமான ஏத்தர் எனர்ஜி (Ather Energy), சுமார் 16% சந்தைப் பங்குடன் மூன்றாவது இடத்திற்கு முன்னேறியுள்ளது. 2024இல் 11% சந்தைப் பங்கைக் கொண்டிருந்த ஏத்தர், 2025இல் தனது சந்தைப் பங்கை அதிகரித்ததுடன், விற்பனையில் 59% என்ற வலுவான வளர்ச்சியையும் கடந்த 2025இல் அடைந்துள்ளது. கடந்த ஆண்டில் ஏத்தர் 2 லட்சம் எலெக்ட்ரிக் ஸ்கூட்டர்கள் விற்பனை இலக்கை கடந்துள்ளது.

இதில் ரிஸ்டா (Rizta) குடும்ப ஸ்கூட்டர் ஆனது ஏத்தரின் மொத்த விற்பனையில் 70%-க்கும் அதிகமாகப் பங்களித்துள்ளது. நடைமுறைப் பயன்பாடு, சௌகர்யம் மற்றும் ரேஞ்ச் ஆகியவை காரணமாக ஏத்தர் ரிஸ்டா, இந்தியாவின் மிகவும் விரும்பப்படும் ஃபேமலி எலெக்ட்ரிக் ஸ்கூட்டர்களில் ஒன்றாக விரைவாகவே மாறியுள்ளது. ஆட்டோமொபைல் சந்தையில் நுழைந்ததற்கு பிறகு முதல்முறையாக, ஓலா எலக்ட்ரிக் நிறுவனம் எலெக்ட்ரிக் 2-வீலர்கள் சந்தையில் நான்காவது இடத்துக்குச் சரிந்துள்ளது.

இந்தச் சரிவுக்கு முக்கிய காரணம் விற்பனைக்குப் பிந்தைய சேவை தொடர்பான சிக்கல்களே ஆகும். இதனாலேயே, கடந்த ஆண்டில் ஓலா 2 லட்சம் எலெக்ட்ரிக் 2-வீலர்கள் விற்பனை மைல்கல்லைக் கடக்கத் தவறிவிட்டது. பெங்களூரை தளமாகக் கொண்ட ஓலா எலெக்ட்ரிக் நிறுவனம், பல தயாரிப்புகளை தொடர்ந்து வழங்கி வருகிறது.

ஆனால், 2025 ஜனவரி முதல் அதன் விற்பனை வேகம் நேர்மறையாக இல்லை. கடந்த ஆண்டு 35% ஆக இருந்த அதன் சந்தைப் பங்கு, தற்போது 15.57% ஆகக் கணிசமாகக் குறைந்துள்ளது. ஹீரோ மோட்டோகார்ப் (Hero Motocorp) நிறுவனத்தின் விடா எலெக்ட்ரிக் (VidA Electric) பிரிவும் கடந்த ஆண்டில் சிறந்த விற்பனையைப் பதிவு செய்துள்ளது.

2025இல் 1 லட்சம் யூனிட்கள் விற்பனை மைல்கல்லைக் கடந்துள்ள ஹீரோ விடாவின் எக்ஸ்2 (X2) இந்த பிராண்டின் மிகவும் பிரபலமான எலெக்ட்ரிக் ஸ்கூட்டராகும். இது ஓலா நிறுவனத்தை வளர்ச்சிப் பாதைக்கு இட்டுச் செல்கிறது. தற்போது, எலெக்ட்ரிக் இருசக்கர வாகன விற்பனையில் ஓலா எலக்ட்ரிக்கிற்கு அடுத்தபடியாக ஹீரோ விடா ஐந்தாவது இடத்தைப் பிடித்துள்ளது.

டிரைவ்ஸ்பார்க் கருத்து: இந்தியாவின் இரு சக்கர வாகன சந்தையின் தலைவரான ஹீரோ மோட்டோகார்ப், 2025இல் அதிக கஸ்டமர்களை பெற்ற 2-வீலர் பிராண்டாக இருப்பதுடன், தற்போது விடா பிராண்ட் மூலம் எலெக்ட்ரிக் 2-வீலர் சந்தையிலும் ஆதிக்கத்தை செலுத்த ஆரம்பித்துள்ளது. இதனால், 2026இல் இந்த சந்தையில் ஹீரோ விடாவின் பங்கு அதிகரிக்கும் என எதிர்பார்க்கப்படுகிறது. அதேபோல், ஓலா எலெக்ட்ரிக் நிறுவனமும் இந்த வருடத்தில் புதுமையான முயற்சிகளுடன் வாடிக்கையாளர்களின் கவனத்தை ஈர்க்க முயற்சிக்கலாம்.