இந்த ஒரே எலெக்ட்ரிக் ஸ்கூட்டரை 8 லட்சம் பேர் வாங்கி இருப்பது ஆச்சிரியமா இருக்கு! டிவிஎஸ்-க்கு தரமான வெற்றி!

டிவிஎஸ் மோட்டார் (TVS Motor) கம்பெனியின் ஐக்யூப் (iQube) எலக்ட்ரிக் ஸ்கூட்டர் இந்தியாவில் ஒரு பெரிய விற்பனை மைல்கல்லை எட்டியுள்ளது. நாட்டின் மிகவும் பிரபலமான எலக்ட்ரிக் ஸ்கூட்டர்களில் ஒன்றான ஐக்யூப், 8 லட்சம் யூனிட் விற்பனையை தாண்டியுள்ளது. 2020ஆம் ஆண்டு அறிமுகப்படுத்தப்பட்ட டிவிஎஸ் ஐக்யூப், இந்திய எலெக்ட்ரிக் வாகன சந்தையில் ஆறு வருட தொடர் வளர்ச்சிக்குப் பிறகு இந்த குறிப்பிடத்தக்க சாதனையை அடைந்துள்ளது.

8 லட்சம் விற்பனை இலக்கு கடந்த 2025 டிசம்பரில் எட்டப்பட்டது. அதே மாதத்தில், இந்த டிவிஎஸ் எலெக்ட்ரிக் ஸ்கூட்டர் (Electric Scooter) 30,000 யூனிட் விற்பனையைக் கடந்தது. முதல் 1 லட்சம் ஐக்யூப் எலெக்ட்ரிக் ஸ்கூட்டர்களை விற்க டிவிஎஸ் நிறுவனத்திற்கு மூன்று வருடங்கள் ஆன நிலையில், அடுத்த மூன்று ஆண்டுகளில் மீதமுள்ள 7 லட்சம் யூனிட்களை விற்று டிவிஎஸ் சாதனை படைத்துள்ளது.

இது சமீபத்திய ஆண்டுகளில் டிவிஎஸ் ஐக்யூப் விற்பனையில் ஏற்பட்ட அதிவேக வளர்ச்சியைக் காட்டுகிறது. டிவிஎஸ் ஐக்யூப் மற்றும் பஜாஜ் சேத்தக் (Bajaj Chetak) ஆகியவை தற்போது இந்திய எலெக்ட்ரிக் ஸ்கூட்டர்கள் சந்தையில் மிகவும் பிரபலமான இரண்டு எலக்ட்ரிக் ஸ்கூட்டர்களாகும். 2025ஆம் ஆண்டில், இந்த இரண்டு பாரம்பரிய நிறுவனங்களும் விற்பனைப் பட்டியலில் ஆதிக்கம் செலுத்தி, ஓலா எலக்ட்ரிக் (Ola Electric), ஏத்தர் எனர்ஜி (Ather Energy) மற்றும் ஹீரோ விடா (Hero Vida) நிறுவனங்களை முறையே மூன்றாவது, நான்காவது மற்றும் ஐந்தாவது இடங்களுக்குத் தள்ளின.

ஓலா எலக்ட்ரிக் மற்றும் ஏத்தர் எனர்ஜி போன்ற ஸ்டார்ட்-அப் (Start-up) நிறுவனங்களிடம் இருந்து கடுமையான போட்டி இருந்த போதிலும், டிவிஎஸ் தனது முக்கிய பலங்களில் கவனம் செலுத்தியது. தினசரி பயன்பாட்டிற்கு ஏற்ற வடிவமைப்பு, நம்பகமான ஸ்கூட்டர் கட்டமைப்பு மற்றும் வலுவான விற்பனைக்குப் பிந்தைய சேவை நெட்வொர்க் ஆகியவை இதில் அடங்கும்.

ஏற்கனவே பாரம்பரிய இருசக்கர வாகன உற்பத்தி நிறுவனமாக இருப்பதால், எலெக்ட்ரிக் ஸ்கூட்டரிலும் வாடிக்கையாளர்களிடையே அதிக நம்பிக்கையைப் பெறவும் டிவிஎஸ் நிறுவனத்திற்கு உதவியுள்ளது. டிவிஎஸ் ஐக்யூப் மூன்று வேரியண்ட்களில் கிடைக்கிறது. அவையாவன, ஐக்யூப், ஐக்யூப் எஸ் மற்றும் ஐக்யூப் எஸ்டி என்பன ஆகும். இது 2.2 kWh, 3.5 kWh மற்றும் 5.5 kWh என மூன்று பேட்டரி ஆப்ஷன்களுடன் வழங்கப்படுகிறது.

மிகப்பெரிய பேட்டரி வேரியண்ட்டை ஒருமுறை முழுமையாக சார்ஜ் செய்தால் அதிகப்பட்சமாக 212 கி.மீ வரை பயணிக்க முடியும். கூடுதலாக, ஐக்யூப் இ-ஸ்கூட்டரில் எல்இடி லைட்டிங் அமைப்பு, 17.78 செ.மீ தொடுதிரை டாஷ்போர்டு, 32 லிட்டர் கொள்ளளவில் இருக்கைக்கு அடியில் ஸ்டோரேஜ் இடவசதி, சார்ஜிங் பாயிண்ட், ஸ்விட்ச் கண்ட்ரோல்கள் மற்றும் ஸ்மார்ட் எக்ஸ் கனெக்ட் (SmartXonnect) உடன் வாட்ச் இணைப்பு வசதியும் உள்ளன.

டிவிஎஸ் ஐக்யூப் ரூ.94,434 (எக்ஸ்-ஷோரூம்) விலையிலும், ஐக்யூப் எஸ் ரூ.1.17 லட்சம் (எக்ஸ்-ஷோரூம்) விலையிலும், டாப்-ஸ்பெக் ஐக்யூப் எஸ்.டி ரூ.1.58 லட்சம் (எக்ஸ்-ஷோரூம்) விலையிலும் விற்கப்படுகின்றன. பஜாஜ் சேத்தக், ஓலா எஸ்1 புரோ பிளஸ், ஏத்தர் ரிஸ்டா மற்றும் ஹீரோ விடா விஎக்ஸ்2 போன்ற போட்டியாளர்களுடன் விற்பனையில் ஐக்யூப் மோதுகிறது.

டிரைவ்ஸ்பார்க் கருத்து: டிவிஎஸ் ஐக்யூப்பின் இத்தகைய பிரபலத்திற்கு அதன் நடைமுறை பயன்பாடு, அதிகமான ரேஞ்ச், நம்பகத்தன்மை மற்றும் மேம்பட்ட தொழில்நுட்பமே முக்கிய காரணங்களாகும். குறிப்பாக நகர்ப்புறங்களில் எலெக்ட்ரிக் வாகன பயன்பாடு அதிகரித்து வருவதால், அதிகமானோர் எலக்ட்ரிக் ஸ்கூட்டர்களை விரும்பி வாங்குகின்றனர். டிவிஎஸ் ஐக்யூப் இந்த வளர்ந்து வரும் சந்தையின் குறிப்பிடத்தக்க பங்கை வெற்றிகரமாகப் பிடித்துள்ளது.