Click it and Unblock the Notifications
குவியும் புக்கிங், திணறும் டிவிஎஸ்... தேவையை சமாளிக்க இதுதான் ஒரே வழி!!
இரண்டு சக்கர வாகன சந்தையில் மிக வேகமாக வளர்ந்து வரும் டிவிஎஸ் மோட்டார் நிறுவனம் எதிர்கால சந்தை தேவைகளை கருத்தில்கொண்டு, வாகன உற்பத்தியை கணிசமாக உயர்த்த முடிவு செய்துள்ளது. இருசக்கர வாகன சந்தையில் மூன்றாவது இடத்தில் இருந்த டிவிஎஸ் தற்போது ஹீரோ, ஹோண்டாவுக்கு இணையாக சந்தையை வளர்த்தெடுத்துள்ளது.
டிவிஎஸ் மாடல்களுக்கு நல்ல வரவேற்பு இருப்பதால், புக்கிங்கும் கணிசமாக குவிந்து வருகிறது. இதனையடுத்து, வாடிக்கையாளர்களின் தேவையைப் பூர்த்தி செய்ய உற்பத்தித் திறனை கணிசமாக அதிகரிக்க அந்நிறுவனம் திட்டமிட்டுள்ளது. தற்போது டிவிஎஸ் நிறுவனத்திடம் ஆண்டுக்கு 68 லட்சம் இருசக்கர வாகனங்களை உற்பத்தி செய்யும் திறன் உள்ளது. இதனை மேலும் 15 லட்சம் யூனிட்டுகள் அதிகரிக்க அந்நிறுவனம் முடிவு செய்துள்ளது. இதன் மூலம் 2027ஆம் ஆண்டின் மத்தியில் இருந்து ஆண்டுக்கு 83 லட்சம் இருசக்கர வாகனங்களை உற்பத்தி செய்யும் அளவுக்கு திறன் உயர்த்தப்பட உள்ளது.
ஆட்டோரிக்ஷா உள்ளிட்ட மூன்று சக்கர வாகனப் பிரிவிலும் உற்பத்தியை அதிகரிக்க டிவிஎஸ் திட்டமிட்டுள்ளது. தற்போது ஆண்டுக்கு 2.5 லட்சம் மூன்று சக்கர வாகனங்களை உற்பத்தி செய்யும் திறன் டிவிஎஸ் வசம் உள்ளது. இதனை சுமார் 4.2 லட்சம் யூனிட்டுகளாக உயர்த்த நிறுவனம் இலக்கு நிர்ணயித்துள்ளது. இதன் மூலம் இந்தப் பிரிவில் அதிகரிக்கும் தேவையைச் சமாளிக்க முடியும்.
இந்த விரிவாக்கத்திற்குப் பின்னால் விற்பனை வளர்ச்சியும் முக்கியக் காரணமாக உள்ளது. 2026-27 நிதியாண்டின் இரண்டாவது காலாண்டில் (ஜூலை முதல் செப்டம்பர் வரை) டிவிஎஸ் நிறுவனம் இதுவரை இல்லாத அளவுக்கு வாகனங்களை விற்பனை செய்துள்ளது. இருசக்கர மற்றும் மூன்று சக்கர வாகனங்களின் ஒட்டுமொத்த விற்பனை முந்தைய ஆண்டுடன் ஒப்பிடுகையில் 27 சதவீதம் அதிகரித்து 19 லட்சம் யூனிட்டுகளை எட்டியுள்ளது.
எலெக்ட்ரிக் வாகனப் பிரிவுதான் டிவிஎஸ் நிறுவனத்தின் வளர்ச்சியில் முக்கியப் பங்கு வகிக்கிறது. குறிப்பாக, அந்நிறுவனத்தின் ஐக்யூப் (iQube) எலெக்ட்ரிக் ஸ்கூட்டருக்கு வாடிக்கையாளர்கள் மத்தியில் தொடர்ந்து வரவேற்பு கிடைத்து வருகிறது. இந்த ஸ்கூட்டரின் ஒட்டுமொத்த விற்பனை கடந்த ஜூலை மாதத்தில் 10 லட்சம் யூனிட்டுகளைக் கடந்து புதிய மைல்கல்லை எட்டியது.
இரண்டாவது காலாண்டில் டிவிஎஸ் நிறுவனத்தின் உள்நாட்டு எலெக்ட்ரிக் இருசக்கர வாகன விற்பனை 129 சதவீதம் வளர்ச்சி கண்டுள்ளது. இதே காலகட்டத்தில் ஒட்டுமொத்த எலெக்ட்ரிக் இருசக்கர வாகனச் சந்தையின் வளர்ச்சி 84 சதவீதமாக மட்டுமே இருந்தது. இதனால் சந்தையின் சராசரி வளர்ச்சியைவிட டிவிஎஸ் நிறுவனம் வேகமாக முன்னேறி வருகிறது.
இந்த வரவேற்பைத் தொடர்ந்து எலெக்ட்ரிக் இருசக்கர வாகனங்களின் மாதாந்திர உற்பத்தித் திறனையும் 80,000 யூனிட்டுகளாக உயர்த்த டிவிஎஸ் திட்டமிட்டுள்ளது. தற்போது மாதத்திற்கு சுமார் 60,000 முதல் 65,000 எலெக்ட்ரிக் இருசக்கர வாகனங்கள் உற்பத்தி செய்யப்படுகின்றன. இந்த விரிவாக்கம் 2027 மார்ச் மாதத்திற்குள் நிறைவடையும் என எதிர்பார்க்கப்படுகிறது.
மூன்று சக்கர வாகனப் பிரிவிலும் நல்ல வளர்ச்சி காணப்படுகிறது. கடந்த நிதியாண்டின் இதே காலாண்டில் சுமார் 16,000 யூனிட்டுகளாக இருந்த உள்நாட்டு விற்பனை, தற்போது 26,300 யூனிட்டுகளாக அதிகரித்துள்ளது. இது 65 சதவீத வளர்ச்சி என்பது குறிப்பிடத்தக்கது. டிவிஎஸ் நிறுவனத்தின் எலெக்ட்ரிக் மூன்று சக்கர வாகனங்களுக்கான வரவேற்பு இந்த வளர்ச்சிக்கு முக்கியக் காரணமாகவும் அமைந்துள்ளது.
வெளிநாட்டுச் சந்தைகளிலும் டிவிஎஸ் நிறுவனம் குறிப்பிடத்தக்க வளர்ச்சியைப் பதிவு செய்துள்ளது. நடப்பு 2026-27 நிதியாண்டின் இரண்டாவது காலாண்டில் வெளிநாட்டு விற்பனை சுமார் 5.39 லட்சம் யூனிட்டுகளாக உயர்ந்துள்ளது. இது முந்தைய ஆண்டின் இதே காலாண்டுடன் ஒப்பிடும்போது 35 சதவீத வளர்ச்சியை பதிவு செய்துள்ளது. நேபாளம், இலங்கை, கென்யா, எகிப்து உள்ளிட்ட நாடுகளில் புதிய வாகனங்களை அறிமுகப்படுத்தியதும் இதற்கு கைகொடுத்துள்ளது.
டிவிஎஸ் நிறுவனத்தின் மற்றொரு முக்கிய மைல்கல்லாக ஜூபிடர் (Jupiter) ஸ்கூட்டரின் ஒட்டுமொத்த விற்பனை 90 லட்சம் யூனிட்டுகளைக் கடந்துள்ளது. கடந்த 2013ஆம் ஆண்டு அறிமுகமான இந்த ஸ்கூட்டர், குடும்பப் பயன்பாட்டிற்கு ஏற்ற மாடலாக தொடர்ந்து வாடிக்கையாளர்களின் ஆதரவைப் பெற்று வருகிறது. இதுவும் நிறுவனத்தின் வளர்ச்சிக்கு வலுசேர்க்கிறது.
Source: ET Auto
Continue with Google
