மனசாட்சியே இல்லாம ரூ.1.34 லட்சத்தில் ஸ்கூட்டரை கொண்டுவராங்க! வெஸ்பா ஸ்கூட்டர் என்றாலே தனி ஸ்பெஷல்!

வெஸ்பா (Vespa) நிறுவனம், அதன் புகழ்பெற்ற 'ஆஃபீசினா 8' (Officina 8) சிறப்புப் பதிப்பு ஸ்கூட்டரை அறிமுகப்படுத்தியுள்ளது. இத்தாலி நாட்டின் பொன்டேடெரா நகரில் அமைந்துள்ள பியாஜியோ (Piaggio) தொழிற்சாலையில், பரிசோதனைப் பிரிவாக செயல்பட்ட 'ஆஃபீசினா 8' என்பதன் நினைவாக இந்த ஸ்கூட்டருக்குப் பெயரிடப்பட்டுள்ளது.

1944ஆம் ஆண்டு உருவாக்கப்பட்ட ஆஃபீசினா 8, ஒரு பிரத்யேக ஆய்வகமாகச் செயல்பட்டது. இங்கு பொறியாளர்கள், வடிவமைப்பாளர்கள், தகர வேலை செய்பவர்கள், மெக்கானிக்குகள் (Mechanics) கொண்ட குழு, வழக்கமான உற்பத்திப் பிரிவுகளில் இருந்து வேறுப்பட்டு புதிய கான்செப்ட்களை உருவாக்கியது. இந்தக் குழு தொடர்ந்து பல முன்மாதிரிகளைச் சோதித்தும், பொறியியல் தீர்வுகளை செம்மைப்படுத்தியும் வந்தது.

ஆஃபீசினா 8-இல், ஒவ்வொரு வாகன பாகமும் அவற்றின் செயல்பாடு, நம்பகத்தன்மை, மற்றும் பயன்பாட்டின் எளிமை ஆகியவற்றை உறுதிப்படுத்த, கடுமையான சாலை சோதனைகளுக்கு உட்படுத்தப்பட்டன. 1946ஆம் ஆண்டிற்குள், ஆஃபீசினா 8-இல் நடந்த இத்தகைய தொடர்ச்சியான ஆய்வுகள், வெஸ்பா ஸ்கூட்டர்களைக் காப்புரிமை செய்ய வழிவகுத்தன. இதன் மூலமாக, இரும்பு சட்டகம், டூ-ஸ்ட்ரோக் என்ஜின், டைரக்ட்-டிரைவ் டிரான்ஸ்மிஷன் (Direct-drive Transmission) மற்றும் ஹேண்டில்பாரில் பொருத்தப்பட்ட கியர் கண்ட்ரோல் போன்ற புதுமையான வடிவமைப்புகள் வெஸ்பா ஸ்கூட்டர்களில் அறிமுகப்படுத்தப்பட்டன.

இந்த அம்சங்கள், தனிநபர் போக்குவரத்து முறையில் புதுமைகளை உருவாக்கின. 1940களின் பிற்பகுதியிலும் 1950களின் முற்பகுதியிலும் பியாஜியோவின் ஆராய்ச்சி மற்றும் மேம்பாட்டு முயற்சிகள் விரிவடைந்தன. இதனால் ஆஃபீசினா 8-இன் முக்கியத்துவமும், அளவும் அதிகரித்தது. தற்போது புதியதாக அறிமுகப்படுத்தப்பட்டுள்ள வெஸ்பா ஆஃபீசினா 8, அதன் தெளிவான மற்றும் செயல்பாட்டு வடிவமைப்பு மூலம் இந்த பாரம்பரியத்தைப் பிரதிபலிக்கிறது.

இதன் இரும்பு பாடி 'மேட் மெட்டாலிக் ப்ளூ ஆஃபீசினா 8' (Matte Metallic Blue Officina 8) என்கிற நிறத்தில் பூசப்பட்டுள்ளது. இந்த நிறம், அசல் பட்டறையின் கருவிகள், இயந்திரங்கள் மற்றும் பணியாளர்கள் ஆடைகளின் பிரதிப்பலிப்பாக இந்த சிறப்புத் தொடருக்காக உருவாக்கப்பட்டது. உலோக ரிவெட்டுகள், பித்தளை மற்றும் அலுமினிய டோன்கள் ஸ்கூட்டரின் வடிவமைப்பிற்கு மெருகூட்டுகின்றன.

இந்த ஸ்கூட்டர் 125சிசி மற்றும் 150சிசி வெர்சன்களில் கிடைக்கிறது. ஸ்கூட்டர் உடன் உயர்தரப் பொருட்கள் மற்றும் ஆக்சஸரீஸ்களின் வரிசையையும் பியாஜியோ அறிமுகப்படுத்தி உள்ளது. ஆஃபீசினா 8-இன் தொழில்துறை நீல நிறம் இந்த ஆக்சஸரீஸ்கள் மற்றும் பொருட்களிலும் பிரதிபலிக்கிறது. இந்த ஸ்கூட்டருடன் வந்துள்ள ஹெல்மெட், ஸ்கூட்டரின் நிற அழகியலுடன் பொருந்துகிறது.

செயல்பாட்டையும், அழகையும் சமமாகப் பாராட்ட விரும்புவோர், இயந்திரத்தின் மற்ற பகுதிகளைப் போலவே அதே மேட் டோனில் முடிக்கப்பட்ட 'டாப் பாக்ஸ்' ஒன்றை வாங்கலாம். இந்த ஸ்கூட்டரை வாங்குபவர்கள் காற்று தடுப்பான்கள், ஹூடிகள், டி-ஷர்ட்கள், பேக்பேக்குகள் மற்றும் சாவிக் கொத்துகளில் ஆஃபீசினா 8 சின்னம் பொறிக்கப்பட்ட உயர்தரப் பொருட்களைத் தேர்வு செய்யலாம்.

இவற்றுடன், ஒவ்வொரு ஆஃபீசினா 8 ஓட்டுநருக்கும் அவர்களின் வாகனத்துடன் ஒரு இலவச வரவேற்பு கிட் வழங்கப்படும். தகரத்தில் சிறப்பாகத் தயாரிக்கப்பட்ட இந்த கிட்டில், ஆஃபீசினா 8 வரலாற்றைப் பற்றிய உரிமையாளர் புத்தகம் உள்ளது. இது, சுமார் எட்டு தசாப்தங்களுக்கு முன்பு வெஸ்பாவை முதலில் உருவாக்கிய பார்வை, லட்சியம் மற்றும் அர்ப்பணிப்பை விவரிக்கிறது.

ஆஃபீசினா 8 மூலம், வெஸ்பா வெறும் போக்குவரத்தைக் கடந்து, பாரம்பரியம் மற்றும் கைவினைத்திறனின் அடையாளத்தை வெளியிட்டுள்ளது. மகாராஷ்டிராவில் எக்ஸ்-ஷோரூம் விலை (Ex-Showroom Price) ரூ.1.34 லட்சம் முதல் தொடங்கும் புதிய வெஸ்பா ஆஃபீசினா 8, ஹெல்மெட் உடன் கிடைக்கும். இந்த ஸ்கூட்டர் இப்போது இந்தியா முழுவதும் உள்ள தேர்ந்தெடுக்கப்பட்ட வெஸ்பா டீலர்ஷிப்களில் கிடைக்கிறது.

டிரைவ்ஸ்பார்க் கருத்து: புதிய ஆஃபீசினா 8 ஸ்கூட்டரும், அதன் ஹெல்மெட் மற்றும் ஆக்ஸஸரீகளும் இத்தாலியின் பொன்டேடெரா நகரில் உள்ள பட்டறை குழுவின் பாரம்பரியத்தை நேரடியாகப் போற்றுகின்றன. இத்தகைய காலமுறை சிறப்புப் பதிப்பு தயாரிப்புகள் மூலம் வெஸ்பா தொடர்ந்து மதிப்பு சேர்க்கிறது, மேலும் தன்னை வேறுபடுத்திக் காட்டுகிறது. அதேநேரத்தில் இந்தியாவில் உயர்தரப் பொருட்களை அறிமுகப்படுத்துகிறது.