IND vs SA: அபிஷேக் சர்மா 3 முறை டக் அவுட் ஆனாலும் சஞ்சு சாம்சனுக்கு வாய்ப்பில்லை.. இந்திய அணி முடிவு

மும்பை: 2026 டி20 உலகக்கோப்பை தொடரில் இந்திய அணி தொடர்ந்து நான்கு வெற்றிகளுடன் சூப்பர் 8 சுற்றுக்கு முன்னேறியுள்ளது. ஞாயிற்றுக்கிழமை (பிப்ரவரி 22) அகமதாபாத்தில் நடைபெறவுள்ள தங்களது முதல் சூப்பர் 8 போட்டியில் தென்னாப்பிரிக்க அணியை இந்தியா எதிர்கொள்கிறது.

லீக் சுற்றில் தோல்வியையே சந்திக்காத இந்திய அணி, அமெரிக்கா, நமீபியா, பாகிஸ்தான் மற்றும் நெதர்லாந்து ஆகிய அணிகளை வீழ்த்தி சூப்பர் 8 சுற்றுக்குத் தகுதி பெற்றுள்ளது. இதே வெற்றிப் பயணத்தைத் தென்னாப்பிரிக்காவுக்கு எதிராகவும் தொடர இந்திய அணி முனைப்பு காட்டி வருகிறது.

அபிஷேக் சர்மாவின் ஃபார்ம்

இந்த முக்கியமான போட்டிக்கு முன்பாக, தொடக்க வீரர் அபிஷேக் சர்மாவின் பேட்டிங் இந்திய அணிக்குக் கவலையை ஏற்படுத்தியுள்ளது. உலகின் சிறந்த டி20 பேட்ஸ்மேன்களில் ஒருவராக அறியப்படும் அவர், இந்த உலகக்கோப்பைத் தொடரில் இதுவரை தனது ரன் கணக்கைத் தொடங்கவில்லை.

அமெரிக்காவுக்கு எதிரான முதல் போட்டியில் டக் அவுட் ஆன அவர், வயிற்று உபாதை காரணமாக நமீபியாவுக்கு எதிரான போட்டியில் விளையாடவில்லை. பின்னர் பாகிஸ்தானுக்கு எதிரான போட்டியில் அணிக்குத் திரும்பிய அவர், அந்தப் போட்டியிலும் ரன் ஏதும் எடுக்காமல் ஆட்டமிழந்தார். அதன்பிறகு நெதர்லாந்துக்கு எதிரான போட்டியிலும் அவர் டக் அவுட் ஆனார். இதுவரை விளையாடிய மூன்று போட்டிகளிலும் அவர் ரன் எடுக்காமல் வெளியேறியுள்ளார்.

சஞ்சு சாம்சனுக்கு வாய்ப்பு கிடைக்குமா?

தொடர்ச்சியாக மூன்று முறை டக் அவுட் ஆனதால், அபிஷேக் சர்மாவுக்குப் பதிலாக சஞ்சு சாம்சனுக்கு ஆடும் லெவனில் வாய்ப்பளிக்க வேண்டும் என்று பல தரப்பிலிருந்தும் கோரிக்கைகள் எழுந்து வருகின்றன. இந்திய அணி இதுவரை அனைத்துப் போட்டிகளிலும் வெற்றி பெற்றுள்ளதால் அபிஷேக்கின் தொடர் சறுக்கல் பெரிய அளவில் பாதிப்பை ஏற்படுத்தவில்லை என்றாலும், அவர் விரைவில் ரன் குவிக்க வேண்டும் எனப் பலரும் எதிர்பார்க்கின்றனர். இதனால் தென்னாப்பிரிக்காவுக்கு எதிரான போட்டியில் அவர் அணியில் இருந்து நீக்கப்படலாம் என்ற வதந்திகள் பரவின.

மோர்னே மோர்கல் விளக்கம்

எனினும், அபிஷேக் சர்மாவை பிளேயிங் 11இல் இருந்து நீக்கும் எண்ணம் இல்லை என்பதை இந்திய அணியின் உதவிப் பயிற்சியாளர் மோர்னே மோர்கல் திட்டவட்டமாகத் தெளிவுபடுத்தியுள்ளார். தென்னாப்பிரிக்கப் போட்டிக்கு முந்தைய செய்தியாளர் சந்திப்பில் பேசிய அவர், நெருக்கடியில் இருக்கும் அபிஷேக் சர்மாவுக்கு அணி நிர்வாகம் முழு ஆதரவு அளிப்பதாகத் தெரிவித்தார்.

இது குறித்துப் பேசிய அவர், "அபிஷேக் சர்மாவின் ஃபார்ம் குறித்து அணிக்குள் எந்த விவாதமும் எழவில்லை. அவர் அணிக்காகவும், ரசிகர்களுக்காகவும் நிச்சயம் சிறப்பாக ரன் குவிப்பார். வலைப்பயிற்சியில் அவர் மிகச் சிறப்பாகப் பந்தை அடித்து விளையாடுகிறார். அவர் விரைவில் தனது பழைய ஃபார்முக்குத் திரும்புவார்" என்று மோர்னே மோர்கல் கூறியுள்ளார். இதன் மூலம் சஞ்சு சாம்சனுக்கு இப்போதைக்கு ஆடும் லெவனில் வாய்ப்பு கிடைக்காது என்பது உறுதியாகியுள்ளது.

2 மேட்ச் தோற்ற வெறி.. கத்துக்குட்டி ஓமனை பொளந்த ஆஸ்திரேலியா.. 10 ஓவருக்குள் முடிந்த சேஸிங்

முக்கியமான சூப்பர் 8 போட்டி

தென்னாப்பிரிக்காவுக்கு எதிரான இந்தப் போட்டி இந்திய அணிக்கு மிக முக்கியமான ஒன்றாகும். லீக் சுற்றில் இந்தியாவைப் போலவே தென்னாப்பிரிக்க அணியும் தாங்கள் விளையாடிய நான்கு போட்டிகளிலும் வெற்றி பெற்று தோல்வியடையாத அணியாக வலம் வருகிறது. இந்தப் போட்டியில் வெற்றி பெறும் அணிக்கு அரையிறுதி வாய்ப்பு எளிதாகும் என்பதால், ரசிகர்கள் மத்தியில் இந்தப் போட்டி அதிக எதிர்பார்ப்பை ஏற்படுத்தியுள்ளது.

"உலகக்கோப்பையில் இந்தியாவை தோற்கடிப்பது எப்படி?".. கிரிக்கெட் ஜாம்பவான்கள் நடத்திய ஆலோசனை

Credit: Mykhel