ரூ.1.59 லட்சத்தில் புதிய பஜாஜ் பல்சர் N250 SS பைக் அறிமுகம்!

இந்தியாவில் 250 சிசி ரக பைக்குகளுக்கு நல்ல வரவேற்பு இருந்து வருகிறது. குறிப்பாக, தினசரி பயணத்திற்கும் வார இறுதி நீண்ட தூரப் பயணங்களுக்கும் ஏற்ற பைக்குகளை வாங்க வாடிக்கையாளர்கள் ஆர்வம் காட்டுகின்றனர். இதற்கு சரியான பட்ஜெட்டில் வாடிக்கையாளர்களுக்கு பல்சர் வரிசை பைக்குகள் சிறந்த தேர்வாக இருக்கின்றன. அந்த வகையில், பஜாஜ் ஆட்டோ நிறுவனம் தனது பல்சர் N250 SS பைக்கை ரூ.1.59 லட்சம் விலையில் அறிமுகப்படுத்தியுள்ளது. இந்தப் புதிய மாடலில் எஞ்சின், கியர்பாக்ஸ் மற்றும் தொழில்நுட்ப வசதிகளில் முக்கியமான அப்டேட்டுகள் இடம்பெற்றுள்ளன.

பஜாஜ் பல்சர் வரிசையில் ஏற்கெனவே N250 மாடல் கவனம் பெற்றுள்ள நிலையில், புதிய N250 SS மூலம் வாடிக்கையாளர்களுக்கு மேம்பட்ட ஓட்டுதல் அனுபவத்தை வழங்கும் வகையில் இந்த மாடல் வந்துள்ளது. ஸ்போர்ட்டியான வடிவமைப்புடன் செயல்திறனையும் நவீன வசதிகளையும் எதிர்பார்ப்பவர்களைக் கவரும் வகையில் இந்தப் பைக் உருவாக்கப்பட்டுள்ளது.

எஞ்சின் விபரம்

இந்தப் புதிய பைக்கில் சிங்கிள் சிலிண்டர் கொண்ட 249 சிசி ஏர்/ஆயில் கூல்டு எஞ்சின் வழங்கப்பட்டுள்ளது. பழைய மாடலில் இருந்த இரண்டு வால்வு அமைப்புக்குப் பதிலாக, இதில் நான்கு வால்வு அமைப்பு இடம்பெற்றுள்ளது. இதன் மூலம் அதிகபட்சமாக 24.6 எச்பி பவரையும் 22 என்எம் டார்க்கையும் வெளிப்படுத்துகிறது.

343 கிமீ ரேஞ்ச், ரேடார் பாதுகாப்பு... ரூ.2.65 லட்சத்தில் புதிய அல்ட்ராவயலெட் X-47 Venom EV பைக் அறிமுகம்!

இந்தப் பைக்கின் கியர்பாக்ஸ் மற்றொரு முக்கியமான மாற்றம் உள்ளது. முந்தைய மாடலில் 5 ஸ்பீடு கியர்பாக்ஸ் வழங்கப்பட்ட நிலையில், புதிய N250 SS மாடலில் 6 ஸ்பீடு கியர்பாக்ஸ் கொடுக்கப்பட்டுள்ளது. மேலும், கிளட்சைப் பயன்படுத்தாமல் கியரை மேலே மாற்ற உதவும் குயிக் ஷிஃப்டர் வசதியும் இடம்பெற்றுள்ளது. நெடுஞ்சாலைப் பயணங்களின்போது இந்த வசதி பயனுள்ளதாக இருக்கும்.

முக்கிய அம்சங்கள்

புதிய பல்சர் N250 SS பைக்கில் 5 அங்குல வண்ண TFT திரை வழங்கப்பட்டுள்ளது. இது பழைய LCD திரைக்குப் பதிலாக இடம்பெற்றுள்ளது. கூகுள் மேப்ஸ் வழிகாட்டித் தகவல்களை திரையில் பார்க்கும் வசதியும் உள்ளது. இதனால் பயணத்தின்போது வழிகளைத் தெரிந்துகொள்வது எளிதாகும். இதனுடன் எலக்ட்ரானிக் த்ராட்டில் பாடி (ETB) தொழில்நுட்பம் இடம்பெற்றுள்ளது. இதன் மூலம் வெவ்வேறு ரைடிங் மோடுகளைத் தேர்வு செய்ய முடியும்.

Also Read

ரூ.7.22 லட்சத்தில் பெனெல்லியின் அட்டகாசமான டூரிங் பைக்குகள் அறிமுகம்!

மேலும், அட்ஜஸ்ட் செய்யக்கூடிய பிரேக் மற்றும் கிளட்ச் லீவர்கள், USB Type-C சார்ஜிங் வசதி, ஹசார்டு விளக்குகள் மற்றும் திடீர் பிரேக்கிங்கின்போது பின்னால் வரும் வாகனங்களுக்கு எச்சரிக்கை அளிக்கும் பானிக் பிரேக் அலர்ட் ஆகியவையும் வழங்கப்பட்டுள்ளன.

புதிய பஜாஜ் பல்சர் N250 SS பைக்கின் எக்ஸ்ஷோரூம் விலை ரூ.1,59,406 என்று நிர்ணயிக்கப்பட்டு இருக்கிறது. வழக்கமான பல்சர் N250 மாடலைவிட இது சுமார் ரூ.14,000 அதிகம். கூடுதல் தொழில்நுட்ப வசதிகள் மற்றும் மேம்படுத்தப்பட்ட எஞ்சின் அமைப்பை விரும்புபவர்களுக்கு இந்த விலை வேறுபாடு முக்கியமானதாக இருக்கும்.

இந்தியச் சந்தையில் சுஸுகி ஜிக்ஸர் 250 மற்றும் ஹீரோ எக்ஸ்ட்ரீம் 250R போன்ற பைக்குகளுக்கு இது போட்டியாக அமையும். மொத்தத்தில், ஸ்போர்ட்டியான தோற்றத்துடன் ஆறு வேக கியர்பாக்ஸ், குயிக் ஷிஃப்டர், நவீன திரை வசதிகள் ஆகியவற்றை ஒரே பைக்கில் எதிர்பார்க்கும் வாடிக்கையாளர்களுக்கு புதிய பல்சர் N250 SS ஒரு கவனிக்கத்தக்க தேர்வாக இருக்கும்.