ஹைட்ரஜனில் இயங்கும் புதிய ஹோண்டா கான்செப்ட் கார்!!

தயாரிப்பு

2015ம் ஆண்டில் இந்த கார் தயாரிப்புக்கு செல்ல இருக்கிறது. முதலில் அமெரிக்காவில் விற்பனைக்கு வரும் இந்த கார் அடுத்ததாக ஜப்பானிலும் தொடர்ந்து ஐரோப்பாவிலும் விற்பனைக்கு கொண்டு வரப்பட உள்ளது. இந்த கார் முழு அளவில் உற்பத்தி செய்யப்படுமா அல்லது தற்போதைய எஃப்சிஎக்ஸ் கிளாரிட்டி கார் போன்று குறைந்த அளவில் உற்பத்தி செய்யப்படுமா என்பது குறித்த தகவல்கள் இதுவரை வெளியிடப்படவில்லை.

டிசைன்

ஃப்யூல் செல் எனப்படும் ஹைட்ரஜன் எரிபொருள் கலன்கள் இந்த காரின் எஞ்சின் பகுதிக்குள்ளேயே வெகு அழகாக அடக்கப்பட்டிருக்கிறது. முந்தைய மாடல்களில் இருந்து முற்றிலும் வேறுபட்ட டிசைன் தாத்பரியமாக இதனை குறிப்பிடலாம்.

இடவசதி

எஞ்சின், எரிபொருள் கலன்கள் முழுவதுமாக எஞ்சின் பகுதிக்குள் அடக்கப்பட்டிருப்பதால், மிகச் சிறப்பான உட்புற இடவசதியை பெற்றிருக்கிறது. மேலும், 5 பேர் தாராளமாக அமர்ந்து செல்ல முடியும் என்பது இதன் சிறப்பாக இருக்கிறது.

திறன்

எஃப்சிஎக்ஸ் கிளாரிடிட்டி காருடன் ஒப்பிடுகையில், இதன் ஹைட்ரஜன் எரிபொருள் கலன்களின் மூலம் உற்பத்தி செய்யப்படும் ஆற்றலின் அளவு 60 சதவீதம் அதிகம். இதேபோன்று, எரிபொருள் கலன்களின் வடிவமும் 33 சதவீதம் குறைக்கப்பட்டுள்ளது.

ரேஞ்ச்

இந்த புதிய தலைமுறை ஹோண்டா எஃப்சிஇவி மூலம் ஒருமுறை எரிபொருள் நிரப்பினால் 500 கிமீ வரை செல்ல முடியும் என்கிறது ஹோண்டா. இந்த காரின் ஹைட்ரஜன் எரிபொருள் தொட்டியில் மூன்றே நிமிடங்களில் எரிபொருள் நிரப்ப முடியும் என்கிறது ஹோண்டா.

எதிர்கால மாடல்

புதிய ஹோண்டா எஃப்சிஇவி ஹைட்ரஜன் கார் எதிர்காலத்துக்கான அடிப்படை தொழில்நுட்பம் கொண்ட கார் மாடல் என்று ஹோண்டா பெருமிதம் தெரிவித்துள்ளது. இது கான்செப்ட் நிலையில் இருந்தாலும், விரைவில் தயாரிப்பு நிலையை எட்ட இருப்பதும் முக்கிய விஷயமாக ஆட்டோமொபைல் துறையினரால் பார்க்கப்படுகிறது.

இரட்டை பயன்

ஹைட்ரஜன் கார்கள் மட்டுமின்றி எலக்ட்ரிக் கார்களை மேம்படுத்துவதற்கான தொழில்நுட்பத்தையும் இந்த புதிய கார் கொண்டிருப்பதாக ஹோண்டா கார் நிறுவனம் தெரிவித்துள்ளது.