தீபாவளிக்கு முன்னதாகவே ஹூண்டாய்- 800 அறிமுகம்?

நாட்டின் கார் உற்பத்தியில் இரண்டாம் இடம் வகிக்கும் ஹூண்டாய் நிறுவனம் எச்ஏ என்ற குறியீட்டு பெயரில் குட்டி காரை வடிவமைத்துள்ளது.

கடந்த இரண்டு ஆண்டுகளாக பல்வேறு கட்ட சோதனைஓட்டங்களை வெற்றிகரமாக முடித்துள்ள இந்த கார் விரைவில் அறிமுகம் செய்யப்பட இருக்கிறது.

ஹூண்டாய் விற்பனையில் முன்னிலை வகிக்கும் ஐ-10 காருக்கும் குறைந்த விலையில் வரும் இந்த கார் அதிக மைலேஜ் கொடுக்கும் 800சிசி திறன் கொண்ட எஞ்சினுடன் வர இருக்கிறது.

ஆல்ட்டோ, ஸ்பார்க் ரகத்தில் வர இருக்கும் இந்த காரின் எஞ்சின் மட்டும்தான் குறைந்த சிசி கொண்டது. மற்றபடி, டாப்எண்ட் மாடல்களின் வசதிகளுடன் வர இருக்கிறது. இதில், ஏசி மற்றும் பவர் ஸ்டீயரிங் ஸ்டாண்டர்டு அம்சங்களாக வருகிறது.

v-வடிவ கன்சோலுடன் வரும் இந்த காரின் ஸ்டீரியோ சிஸ்டம் எம்பி-3 சிடியை சப்போர்ட் செய்யும். யுஎஸ்பி கனெக்ட்டிவிட்டி வசதியும் இருக்கும். உள்பக்க பாகங்களின் தரமும் நிரந்தரமாக இருக்கும்.

முன்பக்கம் பவர் விண்டோஸ் வசதியும், பின்பக்கம் மேனுவல் விண்டோஸ் கொண்டதாக இருக்கும். நானோ காரில் இருப்பது போன்று முன்பக்க கண்ணாடியில் இரண்டு வைப்பர்கள் பொருத்தப்பட்டிருக்கும்.

மேலும், ஹூண்டாயின் சமீபத்திய புளூயிடிக் வடிவமைப்பில் வரும் இந்த காரின் வெளிப்புற தோற்றமும் அசத்தும் வகையில் இருக்கும். இலகு எடை கொண்ட காராக வடிவமைக்கப்பட்டுள்ளதால், லிட்டருக்கு கண்டிப்பாக 20கிமீ.,க்கு மேல் செல்லும் என்று தெரிகிறது.

வரும் அக்டோபர் முதல் வாரத்தில் இந்த காரை அறிமுகம் செய்ய திட்டமிட்டுள்ள ஹூண்டாய், செப்டம்பரில் உற்பத்தியையும் துவங்க இருப்பதாக தகவல்கள் தெரிவிக்கின்றன.

விரைவில் மாருதி தனது 800 காரை மேம்படுத்தி களமிறக்க இருக்கும் நிலையில், ஹூண்டாயும் தனது 800 காரை களமிறக்குவது அதிக எதிர்பார்ப்பை ஏற்படுத்தியுள்ளது.