வேலைவாய்ப்பில் பெண் பொறியாளர்களுக்கு முன்னுரிமை கொடுக்க ஃபோர்டு முடிவு!

ஆசிய பசிஃபிக் கண்டத்தில் இருக்கக்கூடிய அனைத்து ஃபோர்டு நிறுவனங்களிலும் பெண் ஊழியர்களின் எண்ணிக்கை 125 சதவீதமாக உயர்ந்துள்ளது. கடந்த 5 வருடத்தில் நடைபெற்றிருக்கும் இந்த வளர்ச்சியால், ஃபோர்டு நிறுவனத்தில் பணியாற்றும் பெண்கள் பலர் உயர் அதிகாரிகளாகவும், சீனியர் பிரிவிலும் பதவி உயர்வு பெற்றுள்ளனர்.

ஃபோர்டு நிறுவனத்தின் இந்த முடிவு பற்றி பேசிய ஆசிய நாடுகளுக்கான ஃபோர்டு நிறுவனத்திற்கான தலைமை அதிகாரி டேவ் ஸ்கோச் "ஆசிய நாடுகளில் பெண்களை வேலைக்கு எடுப்பதும், அவர்களை தக்கவைத்துகொள்வதும் மிகப்பெரிய சவாலாக உள்ளன. சீனா உட்பட மற்ற ஆசிய நாடுகளில் நாங்கள் வளர்ச்சி பெற பெண் பொறியாளர்களின் தேவை அவசியமாகவுள்ளது" என கூறுகிறார்.

ஆட்டோமொபைல் துறையில் பெண்கள் குறைத்து மதிப்பிடப்படுகிறார்கள், அதை கலையும் முயற்சியில் தனது வேலைவாய்ப்பு முறையில் ஃபோர்டு திட்டங்களை வகுத்து வருவதாகவும் டேவ் ஸ்கோச் தெரிவிக்கிறார். வரும் காலங்களில் பொறியியல் மற்றும் ஒட்டுமொத்த துறைகளிலும் பெண்களுக்கான தேவையை அதிகரிக்கவும் ஃபோர்டு நிறுவனம் முடிவு செய்திருக்கிறது.

அறிவியல், தொழில்நுட்பம், பொறியியல், கலை மற்றும் கணிதம் ஆகிய துறைகளில் பெண்கள் பெற்றிருக்கக்கூடிய கல்வியை சாதகமாக்கிக் கொள்ள ஃபோர்டு கார் நிறுவனம் முயற்சிகள் மேற்கொண்டு வருகிறது. இதை தனது எதிர்கால வளர்ச்சிக்கான வெற்றியாகவும் அந்நிறுவனம் கருதுகிறது.

பணிச்சூழலில் பன்முகத்தன்மையை வளர்க்க ஃபோர்டு ஒரு கூட்டணிக் குழுவை இம்மாதத்தில் உருவாக்க உள்ளது. அந்த செயல்பாடுகள் மூலம், அறிவியல், தொழில்நுட்பம் என ஏனையை துறைகளில் பெண்களின் கல்விதரத்தை அறிந்து , அவர்களுக்கு ஏற்றவாற்றான தொழில் சார்ந்த வாய்ப்புகளை உருவாக்க ஃபோர்டு தீர்மானத்திருக்கிறது.

பெண்களை ஒரு ஊழியராக மட்டும் பார்க்காமல், தனிப்பட்ட வாழ்க்கையில் பெண்கள் வகிக்கும் பொறுப்புகளுக்கு ஃபோர்டு நிறுவனம் முக்கியத்துவம் தருகிறது. இதற்காக சீனாவில் தனது நிறுவனம் அமைந்திருக்கும் சில பகுதிகளில், பணியில் இருக்கும்போதே பெண்கள் தங்களது குழந்தைகளை கவனித்துக்கொள்ளவும், ஒரு இல்லத்தரசிக்கான பணிகளை அவர்கள் செய்யவும் ஃபோர்டு வசதிகளை ஏற்படுத்தி தந்திருக்கிறது.

ஃபோர்டு நிறுவனத்தில் புதியதாக வேலை சேரும் பெண்களுக்கான உடனடி பயிற்சி வகுப்புகளும், உயர் பதிவிகளை ஏற்படுத்திக்கொள்ளும் லீடர்ஷிப் பயிற்சிகளையும் ஃபோர்டு நிறுவனம் வழங்கவுள்ளது.

சமீபத்தில் ஆசிய பசிஃபிக் நாடுகளில் வேலை பார்க்கும் 13,000 ஊழியர்களுக்கு மற்ற பணியார்களிடம் பாராபட்சம் இல்லாமல் நடந்துகொள்வதற்கான பயிற்சியை ஃபோர்டு கார் நிறுவனம் வழங்கியுள்ளது.

ஊழியர்கள் தங்களை அறியாமேலேய ஒரு சிலருக்கு வேலையில் முன்னுரிமை அளிக்ககூடும் என்பதால், வேலை வாய்ப்பு மற்றும் தொழில் சார்ந்த முடிவுகளில் அவர்கள் பரந்த நோக்கத்துடன் செயல்பட, ஊழியர்களுக்கு பாரபட்சம் இல்லாமல் எப்படி சிந்திக்கலாம் என்பதற்காக பயிற்சியை ஃபோர்டு கார் நிறுவனம் வழங்கியிருந்தது குறிப்பிடத்தக்கது.