தனது முதல் பறக்கும் வாகனத்தை அறிமுகம் செய்த பிரபல நிறுவனம்... வீட்டில் இருக்கும் அனுபவத்தை இது வழங்கும்!!

மின்சார வாகனங்களைத் தொடர்ந்து வாகன ஆர்வலர்கள் மத்தியில் பறக்கும் வாகனங்கள் மீது அதிக ஆர்வம் நிலவ ஆரம்பித்துள்ளது. வாகன பிரியர்களின் இந்த எதிர்பார்ப்பைத் தொடர்ந்து சில முன்னணி நிறுவனங்கள் அதன் பறக்கும் வாகனங்களைக் காட்சிப்படுத்தத் தொடங்கியுள்ளன.

இந்த வரிசையில் உலக புகழ்பெற்ற ஜெனரல் மோட்டார்ஸ் கோ நிறுவனம் இணைந்துள்ளது. இந்நிறுவனம் அதன் எதிர்கால பறக்கும் வாகனத்தை தற்போது வெளியீடு செய்திருக்கின்றது. இந்த பறக்கும் கார் செங்குத்தாக தரையிறங்கும் திறனைக் கொண்டிருக்கின்றது. டேக்ஆஃப்-பினையும் இது செங்குத்தாகவே செய்யும்.

இந்த திறனைக் கொண்டிருக்கின்ற காரணத்தினாலயே இந்த வாகனத்திற்கு ஜிஎம் நிறுவனம் விடோல் (vertical take-off and landing - VTOL) எனும் பெயரை வைத்திருக்கின்றது. ஆகையால், விமானங்களுக்கு தேவைப்படும் ஓடு தளம் இதற்கு தேவைப்படாது. மேலும், இது ஓர் சுய-ஓட்டுநர் திறன் கொண்ட பறக்கும் வாகனம் என்பது கூடுதல் சிறப்பு தகவலாக இருக்கின்றது.

ட்ரோன் கேமிராவைத் தழுவிய உருவத்தையே இந்த பறக்கும் வாகனம் பெற்றிருக்கின்றது. இது அதிகபட்சமாக மணிக்கு 55 மைல் (88கிமீ) எனும் வேகத்தில் பறக்கும். இந்த சூப்பர் திறனுக்காக 90kW திறன் கொண்ட மின் மோட்டார் இதில் பயன்படுத்தப்பட்டிருக்கின்றது. இந்த மின் மோட்டாருக்கு தேவையான மின்சாரத்தை ஜிஎம் அல்டியம் பேட்டரிகள் வழங்குகின்றது.

இந்த வாகனத்தின் உடற்கூடு மிக இலகு ரக எடையில் உருவாக்கப்பட்டிருக்கின்றது. அதேசமயம் உறுதியானது. ஆகையால், அதிக ரேஞ்ஜ் (மைலேஜ்) பலனை எதிர்பார்க்க முடியும். இந்த வாகனத்தைப் பறக்கச் செய்ய ஏதுவாக நான்கு ஜோடி ரோட்டார்கள் பயன்படுத்தப்பட்டிருக்கின்றன.

இவையே அதிவேகத்தில் பறக்க செய்தல், செங்குத்தாக தரையிறங்குதல் - மேலெழும்புதலைச் செய்ய உதவுகின்றது. இந்த பறக்கும் வாகனம் எப்படி இயங்கும் என்கிற அதிகாரப்பூர்வ வீடியோ நிறுவனத்தின் அதிகாரப்பூர்வ யுட்யூப் பக்கத்தில் வெளியிடப்பட்டிருக்கின்றது. அதில், பறக்கும் வாகனத்தின் இயக்கம் மற்றும் செயல்பாடுகள் பற்றிய பல்வேறு சுவாரஷ்ய தகவல்கள் இடம்பெற்றிருக்கின்றன.

முன்மாதிரி மாடலாகவே இந்த வாகனம் தற்போது அறிமுகம் செய்யப்பட்டிருக்கின்றது. விரைவில் பயன்பாட்டிற்கான உற்பத்தி மாடல் அறிமுகம் செய்யப்படும் என எதிர்பார்க்கப்படுகின்றது. இதை உறுதிப்படுத்தும் வகையில் தற்போது வெளியிடப்பட்டிருக்கும் வீடியோவில் "விரைவில் வந்து சேரும்" என்ற வாசகம் இடம்பெற்றிருக்கின்றன.

இதன் கேபின் வீட்டில் இருக்கும் சோஃபாக்களைப் போன்ற அதிக சொகுசு வசதிக் கொண்ட இருக்கைகளை தாங்கியிருக்கின்றது. இத்துடன், பயோமெட்ரிக் சென்சார், குரல் கட்டளை மற்றும் ஹேண்ட் கெஸ்சர் ரெகாக்னிஷன் உள்ளிட்ட தொழில்நுட்ப வசதிகள் இதில் இடம்பெற்றிருக்கின்றன.