வெளிநாடுகளில் விற்பனையில் சக்கை போடு போடும் பஜாஜ் டோமினார் !

ரூ.1.40 லட்சம் எக்ஸ்ஷோரூம் விலையில் வந்த இந்த பைக்கிற்கு ஆரம்பத்தில் நல்ல வரவேற்பு கிடைத்தது. மாதத்திற்கு 10,000 பைக்குகள் என்ற விற்பனை இலக்குடன் அறிமுகம் செய்யப்பட்ட டோமினார், அதனை எட்ட முடியாமல் திணறி வருகிறது.

ஆரம்பத்தில் ராயல் என்ஃபீல்டு மார்க்கெட்டை அசைத்து பார்க்க முனைந்தாலும், இப்போது சற்றே பின் வாங்கி நிற்கிறது டோமினார். அதேநேரத்தில், இந்த பைக்கிற்கு வெளிநாடுகளில் நல்ல வரவேற்பு கிடைத்திருக்கிறது.

ஆம். கடந்த மாதம் இந்தியாவில் 2,000 டோமினார் பைக்குகள் விற்பனையாகி உள்ள நிலையில், வெளிநாடுகளில் 2,500 டோமினார் பைக்குகள் விற்பனையாகி உள்ளன. இது பஜாஜ் ஆட்டோ நிறுவனத்திற்கு ஊக்கம் தருவதாக அமைந்துள்ளது.

தற்போது தென்கிழக்கு ஆசியா மற்றும் லத்தீன் அமெரிக்க நாடுகளுக்கு டோமினார் பைக் ஏற்றுமதி செய்யப்படுகிறது. விரைவில் ஆஸ்திரேலியா மற்றும் ஐரோப்பிய நாடுகளுக்கும் ஏற்றுமதி செய்ய பஜாஜ் ஆட்டோ தீவிரம் காட்டி வருகிறது.

ஆஸ்திரேலியா மற்றும் ஐரோப்பிய நாடுகளில் விற்பனைக்கு செல்லும்போது, விற்பனை எண்ணிக்கை கணிசமாக உயரும் வாய்ப்பு இருக்கிறது. உள்நாட்டில் எதிர்பார்த்த அளவு விற்பனை இல்லாவிட்டாலும், வெளிநாடுகளில் டோமினார் பைக்கின் விற்பனை மூலமாக இலக்கு சமன் செய்யப்படும் வாய்ப்பு இருப்பதாக கருதப்படுகிறது.

உள்நாட்டில் பஜாஜ் டோமினார் 400 பைக்கின் விற்பனை எதிர்பார்த்த அளவு இல்லாததற்கு, ராயல் என்ஃபீல்டு மோட்டார்சைக்கிள்களின் ஆதிக்கம்தான் முக்கிய காரணமாக பார்க்கப்படுகிறது. அதனை உடைப்பதற்கு பஜாஜ் தொடர்ந்து முயற்சிகளை மேற்கொண்டு வருகிறது.

ராயல் என்ஃபீல்டு மோட்டார்சைக்கிள்களில் இல்லாத பல கூடுதல் சிறப்பம்சங்களை பஜாஜ் டோமினார் 400 பைக் பெற்றிருக்கிறது. ஏபிஎஸ் பிரேக்கிங் சிஸ்டம், முன்புறத்தில் பெரிய டிஸ்க் பிரேக், முழுவதுமான டிஜிட்டல் இன்ஸ்ட்ரூமென்ட் க்ளஸ்ட்டர் ஆகியவை கூடுதல் சிறப்பம்சங்களாக உள்ளன. ஆனாலும், ராயல் என்ஃபீல்டு மோட்டார்சைக்கிள்களுக்குத்தான் மவுசு அதிகம் உள்ளது.

கேடிஎம் 390 பைக்கில் பயன்படுத்தப்படும் எஞ்சின்தான் பஜாஜ் டோமினார் 400 பைக்கிலும் பயன்படுத்தப்படுகிறது. ஆனால், மூன்று ஸ்பார்க் ப்ளக்குகள் கொண்ட தொழில்நுட்பம், மேம்படுத்தப்பட்ட கியர் ரேஷியாவுடன் கூடிய எஞ்சினாக பஜாஜ் டோமினார் 400 பைக்கில் இடம்பெற்றிருக்கிறது.

இந்த எஞ்சின் அதிகபட்சமாக 34.5 பிஎச்பி பவரையும், 35 என்எம் டார்க் திறனையும் வழங்கும். இந்த பைக்கில் 6 ஸ்பீடு கியர்பாக்ஸ் பொருத்தப்பட்டு இருக்கிறது. வெளிநாடுகளில் நல்ல வரவேற்பை பெற்றிருக்கும் பஜாஜ் டோமினார் 400 பைக்கிற்கு உள்நாட்டிலும் வரவேற்பு அதிகரிக்கும் என்று நம்பிக்கை தெரிவிக்கிறது பஜாஜ் ஆட்டோ நிறுவனம். பொறுத்திருந்து பார்ப்போம்.

Trending On DriveSpark Tamil: