சிபிஎஸ் பிரேக்குடன் ஹோண்டா ட்ரீம் யுகா மற்றும் லிவோ பைக்குகள் அறிமுகம்!

வரும் ஏப்ரல் 1ந் தேதி முதல் பைக்குகளில் அதிக பாதுகாப்பை தரும் பிரேக் சிஸ்டம் பொருத்தப்படுவது கட்டாயமாக்கப்பட்டுள்ளது. அதன்படி, 125சிசி வரையிலான இருசக்கர வாகனங்களில் சிபிஎஸ் பிரேக் சிஸ்டமும், அதற்கு மேலான சிசி திறன் கொண்ட மாடல்களில் ஏபிஎஸ் பிரேக்கிங் சிஸ்டமும் கொடுக்கப்பட வேண்டும்.

இந்த நிலையில், ஹோண்டா நிறுவனம் தனது இருசக்கர வாகனங்களில் சிபிஎஸ் மற்றும் ஏபிஎஸ் பிரேக் சிஸ்டத்துடன் மேம்படுத்தி அறிமுகம் செய்து வருகிறது. அந்த வரிசையில் தற்போது ட்ரீம் யுகா மற்றும் லிவோ பைக்குகளில் சிபிஎஸ் பிரேக் சிஸ்டத்தை பொருத்தி அறிமுகம் செய்துள்ளது.

ஹோண்டா ட்ரீம் யுகா பைக் சிபிஎஸ் ஒரு வேரியண்ட்டிலும், லிவோ சிபிஎஸ் மாடலானது டிரம் பிரேக் மற்றும் டிஸ்க் பிரேக் கொண்ட இரண்டு வேரியண்ட்டுகளிலும் விற்பனைக்கு கிடைக்கும்.

புதிய ஹோண்டா ட்ரீம் யுகா மற்றும் லிவோ பைக்குகளில் புதிய பிரேக் சிஸ்டத்தை தவிர்த்து, பெரிய அளவிலான மாற்றங்கள் எதுவும் செய்யப்படவில்லை. இந்த பைக்கின் பாடி டீக்கெல் ஸ்டிக்கர் மற்றும் வண்ணத் தேர்வுகளில் மாற்றங்கள் இள்லை.

புதிய ட்ரீம் யுகா பைக்கில் பாடி கலரிலான சைடு மிரர்கள் பொருத்தப்பட்டுள்ளன. இந்த பைக்கில் ரோலிங் ரெசிஸ்டென்ஸ் டயர்கள் பொருத்தப்பட்டு இருப்பதால், அதிக எரிபொருள் சிக்கனத்தை தரும் என்று ஹோண்டா மோட்டார்சைக்கிள் நிறுவனம் தெரிவிக்கிறது.

இந்த இரண்டு பைக்குகளிலும் 109.19 சிசி எஞ்சின் பயன்படுத்தப்பட்டு இருக்கிறது. இந்த எஞ்சின் 8.4 பிஎச்பி பவரையும், 9.09 என்எம் டார்க் திறனையும் வழங்கும். 4 ஸ்பீடு கியர்பாக்ஸ் இணைக்கப்பட்டு இருக்கிறது.

எஞ்சின் மட்டுமின்றி, சேஸீ மற்றும் சஸ்பென்ஷனும் இரண்டு பைக்குகளிலும் ஒன்றுதான். முன்புறத்தில் டெலிஸ்கோப்பிக் ஃபோர்க்குகளும், பின்புறத்தில் ட்வின் ஸ்பிரிங் ஹைட்ராலிக் சஸ்பென்ஷன் அமைப்பு பொருத்தப்பட்டு இருக்கிறது.

ஹோண்டா ட்ரீம் யுகா பைக்கின் சிபிஎஸ் பிரேக் சிஸ்டம் மாடலுக்கு ரூ.54,847 எக்ஸ்ஷோரூம் விலையாக நிர்ணயிக்கப்பட்டு இருக்கிறது. சாதாரண மாடலைவிட ரூ.600 கூடுதல் விலையில் வந்துள்ளளது. ஹோண்டா லிவோ பைக்கின் டிரம் சிபிஎஸ் பிரேக் சிஸ்டம் மாடலுக்கு ரூ.57,539 எக்ஸ்ஷோரூம் விலையாகவும், டிஸ்க் சிபிஎஸ் மாடலுக்கு ரூ.59,950 எக்ஸ்ஷோரூம் விலையும் நிர்ணயிக்கப்பட்டு இருக்கிறது.