ஹோண்டாவின் 2021 என்சி750எக்ஸ் மற்றும் என்சி750எக்ஸ் டிசிடி பைக்குகள்!! இந்தியா வர வாய்ப்பிருக்கா?

ஹோண்டா என்சி750எக்ஸ் மோட்டார்சைக்கிள் உலகளவில் முதன்முறையாக கடந்த 2014ல் அறிமுகப்படுத்தப்பட்டது. அமெரிக்கா மற்றும் ஐரோப்பிய சந்தைகளில் பிரபலமான ஹோண்டா பைக் மாடலாக விளங்கும் இது 2021ஆம் ஆண்டிற்காக குறிப்பிடத்தக்க மாற்றங்களுக்கு உட்படுத்தப்பட்டுள்ளது.

இருப்பினும் 745சிசி இணையான-இரட்டை என்ஜின் அமைப்பில் எந்த மாற்றமும் இல்லை. ஆனால் இந்த என்ஜின் அதிகப்பட்சமாக 58.5 பிஎஸ் மற்றும் 69 என்எம் டார்க் திறனை வெளிப்படுத்தும் வகையில் திருத்தி வடிவமைக்கப்பட்டுள்ளது. கியர்பாக்ஸிலும் ஹோண்டா மறுவேலை செய்துள்ளது.

நகர்புற சாலைகளில் வேகமான செயல்பாட்டிற்காக முதல் மூன்று கியர்கள் முன்பை விட தாழ்வாகவும், சிறந்த க்ருஸிங் செயல்திறன் மற்றும் மேம்படுத்தப்பட்ட எரிபொருள் திறனிற்காக கடைசி மூன்று கியர்கள் சற்று உயரமாகவும் வழங்கப்பட்டுள்ளன. கூடுதல் சவுகரியத்திற்கு 6-ஸ்பீடு டிசிடி கியர்பாக்ஸ் வேரியண்ட்டையும் வாடிக்கையாளர்கள் தேர்வு செய்யும் வகையில் வழங்கப்பட்டுள்ளது.

ஸ்போர்ட், மழை, ஸ்டாண்டர்ட் மற்றும் கஸ்டம் என்ற ரைடிங் மோட்களில் கொண்டுவரப்பட்டுள்ள 2021 என்சி750எக்ஸ் மோட்டார்சைக்கிளில் மூன்று அமைப்புகளுடன் ட்ராக்‌ஷன் கண்ட்ரோல் மற்றும் முழு-டிஜிட்டல் எல்சிடி இன்ஸ்ட்ரூமெண்ட் க்ளஸ்ட்டர் சிறப்பம்சங்களாக வழங்கப்பட்டுள்ளன.

மற்றப்படி என்சி750எக்ஸ் பைக்கின் தோற்றத்தில் பெரியளவில் எந்த மாற்றமும் இல்லை. முன்பை காட்டிலும் சற்று உயரம் குறைவாக காட்சியளிக்கிறது. இதன் காரணமாக சஸ்பென்ஷன் முன்பக்கத்தில் 18மிமீ வரையிலும் பின்பக்கத்தில் 30மிமீ வரையில் குறைக்கப்பட்டுள்ளது.

தரையில் இருந்து இருக்கையின் உயரமும் 30மிமீ குறைக்கப்பட்டுள்ளதால் இது ஆஃப்-ரோடு பிரியர்களுக்கு சற்று ஏமாற்றமாக இருக்கும். ஆனால் உயரம் குறைவானவர்களுக்கு மிகவும் ஏற்ற பைக் மாடலாக கொண்டுவரப்பட்டுள்ள 2021 என்சி750எக்ஸ் பைக்கில் யுஎஸ்பி சார்ஜிங் துளை உடன் 23 லிட்டர் கொள்ளளவில் சேமிப்பிடம் வழங்கப்பட்டுள்ளது.

விண்ட்ஷீல்டு சற்று பெரியதாக்கப்பட்டுள்ளது, பைக்கில் உள்ள அனைத்து விளக்குகளும் ப்ரீமியம் உணர்விற்காக எல்இடி தரத்தில் உள்ளன. பைக்கின் மொத்த கெர்ப் எடை 6 கிலோ குறைந்து 214 கிலோவாக கொண்டுவரப்பட்டுள்ளது. 2021 ஹோண்டா என்சி750எக்ஸ் மற்றும் என்சி750எக்ஸ் டிசிடி பைக்குகளின் விலைகள் குறித்த விபரமும் எதுவும் வெளியிடப்படவில்லை.

விற்பனையில் இருக்கும் இதன் முந்தைய தலைமுறையின் விலை யுகே-வில் 7,499 யூரோ (கிட்டத்தட்ட ரூ.7.14 லட்சம்)-ஆக உள்ளது. இந்தியாவில் பிக்விங் டீலர்ஷிப்களின் எண்ணிக்கையை அதிகரிக்க ஹோண்டா நிறுவனம் திட்டமிட்டு வருகிறது. இதனால் எதிர்காலத்தில் என்சி750எக்ஸ் பைக் மாடல் நம் நாட்டிலும் விற்பனைக்கு வரலாம்.