2021ஆம் ஆண்டிற்கான கேடிஎம் ஆர்சி200 பைக் இதுதானா? தொழிற்சாலையில் இருந்து ஸ்பை படம் கசிந்தது

கொரோனாவினால் உலகமே சற்று ஓய்வு எடுத்தாற்போல் இருந்தாலும், 2020ல் கேடிஎம் சற்று பிசியாகதான் இருந்துள்ளது. இந்த நிறுவனத்தில் இருந்து இந்த வருடத்தில் 250சிசி மற்றும் 390சிசி-களில் அட்வென்ச்சர் பைக்குகள் வெளிவந்தன.

அதேபோல் ட்யூக்250 மற்றும் ட்யூக் 125 பைக்குகளும் சில சிறிய காஸ்மெட்டிக் மாற்றங்களை பெற்றுள்ளன. ஆனால் கேடிஎம் ஆர்சி பைக்குகள் புதிய பெயிண்ட் தேர்வுகளை தவிர்த்து பெரியளவில் எந்த அப்கிரேட்-ஐயும் இந்த வருடத்தில் பெறவில்லை.

ஆனால் விரைவில் கேடிஎம் ஆர்சி200 பைக் மாடல் சில அப்கிரேட்-ஐ பெறவுள்ளது. இதனை தற்போது ரஷ்லேன் செய்திதளம் மூலமாக கிடைத்துள்ள ஸ்பை படம் உறுதிப்படுத்துகின்றது. இந்த படம் தொழிற்சாலை ஒன்றில் இருந்து இணையத்தில் கசிந்துள்ளது.

ஆர்சி200 மட்டுமின்றி ஆர்சி125, 250 மற்றும் 390 பைக்குகளுக்கும் அப்கிரேட்-ஐ வருகிற 2021ஆம் ஆண்டில் கேடிஎம் நிறுவனம் வழங்கவுள்ளதாக தகவல்கள் கூறுகின்றன. இந்த அப்டேட்கள் டிசைன் மற்றும் சேசிஸ் மட்டுமில்லாமல் பைக்கின் என்ஜின் அமைப்பிலும் கொண்டுவரப்படலாம் என தெரிகிறது.

2019 ஐக்மா நிகழ்ச்சியில் 390 அட்வென்ச்சர் காட்சிப்படுத்தப்பட்டதுபோல் இந்த டிசம்பர் மாதத்தில் நடக்க வேண்டிய 2020 ஐக்மா கண்காட்சியில் புதிய ஆர்சி வரிசை பைக்குகளை கேடிஎம் காட்சிப்படுத்தி இருக்கும். ஆனால் இம்முறை இந்த நிகழ்ச்சி கொரோனாவினால் ரத்து செய்யப்பட்டுவிட்டது.

தற்போது வெளியாகியுள்ள எந்தவொரு மறைப்பும் இல்லாத 2021 கேடிஎம் ஆர்சி200 பைக்கின் முதல் ஸ்பை படத்தில், பைக் தொழிற்சாலையில் தயாரிப்பு பணியில் இருப்பதை பார்க்க முடிகிறது. மேலும் இந்த தொழிற்சாலை பஜாஜ் ஆட்டோவின் புனே தொழிற்சாலையாக இருக்கலாம்.

ஏனெனில் இந்த ஸ்பை படத்தில் ஆர்சி200 பைக்கிற்கு பின்பக்கத்தில் ஹஸ்க்வர்னா பைக்குகளையும் பார்க்க முடிகிறது. இந்தியாவில் கேடிஎம் மற்றும் ஹஸ்க்வர்னா பிராண்ட்களின் தயாரிப்பு பஜாஜ் ஆட்டோ நிறுவனத்தின் தொழிற்சாலைகளில் தயாரிக்கப்பட்டு வருவது குறிப்பிடத்தக்கது.

படத்தில் பைக்கின் ஹெட்லைட் ட்யூக்200-இல் உள்ளதை போன்று ஹலோஜன் யூனிட்டாக வழங்கப்பட்டுள்ளது. ஒற்றை ஹெட்லைட்டை சுற்றிலும் எல்இடி டிஆர்எல் கொடுக்கப்பட்டுள்ளது. இவற்றுடன் பெரிய விஸரும் நம் கண்களுக்கு காட்சியளிக்கிறது.

ஆரஞ்ச் மற்றும் கருப்பு நிறத்தில் கிராஃபிக்குகள் பல படிகள் அப்கிரேடாக உள்ளன. இந்த நிறம் மட்டுமின்றி வேறு சில நிறங்களிலும் 2021 ஆர்சி200 பைக் வழங்கப்படும் என எதிர்பார்க்கப்படுகிறது. ஸ்பை படத்தை சற்று உற்று பார்த்தால் டிஸ்க் ப்ரேக் அமைப்பு சற்று வித்தியாசப்பட்டுள்ளதை அறியலாம்.

அதாவது சக்கரத்தை பிடித்து கொள்ளும் சக்கர மையத்திற்கு பதிலாக முன்பக்க டிஸ்க் ப்ரேக் ஆனது அலாய் சக்கரத்தில் இணைக்கப்பட்டுள்ளது. அதேபோல் பைக்கின் பின்பக்கத்தில் துணை-ஃப்ரேம் புதியதாகவும், எக்ஸாஸ்ட் குழாய் பைக்கின் அடிப்பகுதியிலும் வழங்கப்படவுள்ளதாக தகவல்கள் கூறுகின்றன.

2021ஆம் ஆண்டிற்கான அப்கிரேட்கள் பைக்கின் தோற்றம், சக்கரங்கள் மற்றும் விண்ட்ஸ்க்ரீனில்தான் கொண்டுவரப்பட்டுள்ளன. என்ஜின் அமைப்பில் மாற்றம் கொண்டுவரப்பட வாய்ப்புகள் குறைவே.

வரும் வாரங்களில் கேடிஎம் நிறுவனத்தால் வெளிக்காட்டப்படும் என எதிர்பார்க்கப்படுகின்ற 2021 ஆர்சி200 பைக்கின் விலை தற்போதைய விலையை காட்டிலும் ரூ.10,000 அளவில் அதிகமாக நிர்ணயிக்கப்பட வாய்ப்புள்ளது.