வெளிவருகிறது 350சிசி-யில் அடுத்த ராயல் என்பீல்டு பைக்!! இந்த தோற்றத்தில் இருந்தால் யாருக்குதான் பிடிக்காது!

சென்னையை சேர்ந்த ராயல் என்பீல்டு நிறுவனம் தற்சமயம் 200சிசி-இல் இருந்து 500சிசி வரையிலான மோட்டார்சைக்கிள் பிரிவில் மற்ற நிறுவனங்களுக்கு தலைவராக விளங்கி வருகிறது.

இந்த நிலையை அப்படியே தொடர இந்த நிறுவனத்தில் இருந்து குறிப்பிட்ட இடைவெளியில் புதிய மோட்டார்சைக்கிள்கள் வெளிவந்த வண்ணம்தான் உள்ளன. இதனால் ராயல் என்பீல்டு பைக்குகளை அவ்வப்போது சாலை சோதனைகளில் பார்க்க முடிகிறது.

ராயல் என்பீல்டின் சமீபத்திய அறிமுகமான மீட்டியோர் 350 பைக்கிற்கு அடுத்து புதிய மோட்டார்சைக்கிளை சோதனை ஓட்டங்களில் இந்த நிறுவனம் உட்படுத்தி வருகிறது. இந்த சோதனை மோட்டார்சைக்கிள் பிரபலமான இண்டர்செப்டர் 650 பைக்கின் 350சிசி வெர்சன் போல் தோன்றமளிக்கிறது.

இதனால் இந்த சோதனை மோட்டார்சைக்கிள் இண்டர்செப்டர் 350 என்ற பெயரில் அறிமுகமாகலாம் அல்லது வேறெதாவது புதிய பெயரில் தயாரிப்பு நிறுவனம் கொண்டுவரலாம். காடிவாடி செய்திதளம் மூலமாக கிடைத்துள்ள இது தொடர்பான ஸ்பை படங்களில் இந்த சோதனை மாதிரி சில பாகங்களை வழக்கமான இண்டர்செப்டர் 650 பைக்கில் இருந்து பெற்றுள்ளதை பார்க்க முடிகிறது.

இந்த படத்தில் பைக்கின் பின்பகுதியை மட்டும் தான் தெளிவாக பார்க்க முடிகிறது. இதில் பின்பகுதியில் பொருத்தப்பட்டுள்ள செவ்வகம் வடிவிலான டர்ன் இண்டிகேட்டர்களுடன் வால்பகுதி இண்டர்செப்டர் 650-ஐ ஒத்து காணப்படுகிறது.

இருப்பினும் சில வேறுபாடுகளையும் நம்மால் அறிய முடிகிறது. அதாவது, அந்த 650சிசி பைக்கில் இரட்டை எக்ஸாஸ்ட் அமைப்பு வழங்கப்படுகிறது. ஆனால் இந்த சோதனை பைக்கில் ஒற்றை எக்ஸாஸ்ட்டை மட்டுமே பார்க்க முடிகிறது.

அதேபோல் ராயல் என்பீல்டின் இந்த புதிய 350சிசி பைக்கில் முன்பக்கத்தில் நிலையான டெலிஸ்கோபிக் ஃபோர்க்குகளும், பின்பக்கத்தில் ஷாக் அப்சார்பர்களும் எதிர்பார்க்கப்படுகின்றன. மேலும் இரட்டை-சேனல் ஏபிஎஸ் உடன் டிஸ்க் ப்ரேக்குகளும் இந்த பைக்கில் வழங்கப்படுவதற்கு வாய்ப்புள்ளது.

மீட்டியோர் 350 பைக்கில் முதன்முறையாக வழங்கப்பட்டுள்ள பயணத்திற்கான வழிக்காட்டி வசதியை இண்டர்செப்டர் 350 பைக்கிலும் ராயல் என்பீல்டு நிறுவனம் வழங்கும். வன்பொருள்களை பொருத்தவரையில் இண்டர்செப்டர் 350, விரைவில் வெளிவரவுள்ள புதிய தலைமுறை கிளாசிக் 350 மற்றும் மீட்டியோர் 350 பைக்குகளுடன் பகிர்ந்து கொள்ளலாம்.

அதேபோல் என்ஜின் அமைப்பையும் கிளாசிக் 350 மற்றும் மீட்டியோர் 350 பைக்கில் வழங்கப்படும் 349சிசி, சிங்கிள்-சிலிண்டர், ஏர்/ஆயில் கூல்டு என்ஜினை இனடர்செப்டர் 350 பைக் தொடருவதற்கே வாய்ப்புகள் அதிகம். அதிகப்பட்சமாக 6,100 ஆர்பிஎம்-ல் 20.2 எச்பி மற்றும் 4,000 ஆர்பிஎம்-ல் 27 என்எம் டார்க் திறனை வெளிப்படுத்தக்கூடிய இந்த என்ஜின் உடன் 5-ஸ்பீடு கியர்பாக்ஸ் இணைக்கப்படுகிறது.

ஆனால் இண்டர்செப்டரில் இந்த என்ஜின் மேற்கூறப்பட்டுள்ளதில் இருந்து வேறுப்பட்ட ஆற்றல்களை வெளிப்படுத்தும் என எதிர்பார்க்கப்படுகிறது. 650 இரட்டை பைக்குகள் ஏற்கனவே மிகவும் மலிவானதாக உள்ளன. இவை இன்னும் 350சிசி-யில் வெளிவந்தால் நிச்சயம் ராயல் என்பீல்டு இண்டர்செப்டர் பைக்குகள் அதிகளவில் வாடிக்கையாளர்களை சென்றைடையும்.