பழைய டூ வீலரை எக்ஸ்சேஞ்ச் செய்து புதிய ஏத்தர் வாங்கும் திட்டம் அறிமுகம்!

இந்திய எலெக்ட்ரிக் ஸ்கூட்டர் மார்க்கெட்டில் ஏத்தர் முக்கிய போட்டியாளராக இருந்து வருகிறது. ஏத்தர் ஸ்கூட்டர்களுக்கு வாடிக்கையாளர்கள் மத்தியில் அதிக வரவேற்பு இருந்து வருகிறது. சென்னை மற்றும் பெங்களூர் நகரங்களில் மட்டுமே ஏத்தர் நிறுவனம் தனது எலெக்ட்ரிக் ஸ்கூட்டர்களை விற்பனை செய்து வருகிறது.

இந்த நிலையில், கொரோனா பிரச்னை காரணமாக, வாடிக்கையாளர்களை ஈர்ப்பதற்கான புதிய திட்டங்கள் அறிவிக்கப்பட்டு வருகின்றன. அந்த வகையில், பயன்படுத்தப்பட்ட இருசக்கர வாகனத்தை எக்ஸ்சேஞ்ச் செய்து புதிய ஏத்தர் ஸ்கூட்டரை வாங்கும் திட்டத்தை அந்நிறுவனம் அறிவித்துள்ளது.

இந்த புதிய திட்டத்தை CredR என்ற நிறுவனத்துடன் இணைந்து ஏத்தர் அமல்படுத்தப்பட உள்ளது. சென்னை, பெங்களூர் நகரங்களில் உள்ள ஷோரூம்களில் பயன்படுத்தப்பட்ட வாகனத்தை எக்ஸ்சேஞ்ச் செய்யும் திட்டம் அறிமுகம் செய்யப்பட்டு இருக்கிறது.

பழைய பெட்ரோல் இருசக்கர வாகனம் எந்த பிராண்டாக இருந்தாலும் எக்ஸ்சேஞ்ச் செய்யப்படும். பைக், ஸ்கூட்டர்களின் கண்டிஷன் மற்றும் இதர அம்சங்களை ஆய்வு செய்து அதற்கு தக்கவாறு விலை நிர்ணயிக்கப்படும்.

புதிய ஏத்தர் 450 ப்ளஸ் மற்றும் 450எக்ஸ் ஆகிய ஸ்கூட்டர்களுக்கு இந்த திட்டம் வழங்கப்படுகிறது. புதிய ஏத்தர் ஸ்கூட்டரின் விலையில் எக்ஸ்சேஞ்ச் விலை கழித்துக் கொள்ளப்படும் என்று தெரிவிக்கப்பட்டு இருக்கிறது. இதுதவிர்த்து, ஏத்தர் 450 ஸ்கூட்டருக்கு குத்தகை திட்டமும் அறிவிக்கப்பட்டுள்ளது. இந்த திட்டத்தின்படி, மாதம் ரூ.2,589 கட்டணம் செலுத்த வேண்டும்.

அனைத்து விதமான செலவீனங்களும் இதில் அடங்கிவிடும் என்று ஏத்தர் தெரிவித்துள்ளது. மாதாந்திர திட்டமும் வாடிக்கையாளர்களுக்கு அதிக நன்மையை தரும் என்று ஏத்தர் தெரிவிக்கிறது.

இந்த நிலையில், விரைவில் கோவை உள்ளிட்ட நாட்டின் பிற முக்கிய நகரங்களிலும் வர்த்தகத்தை துவங்குவதற்கான முயற்சிகளில் ஏத்தர் ஈடுபட்டுள்ளது. கொரோனாவால் தள்ளிப் போன விரிவாக்கத் திட்டத்தை மீண்டும் கையில் எடுக்கவும் அந்நிறுவனம் முடிவு செய்துள்ளது. மேலும், அடுத்த ஆண்டு மார்ச் முதல் வெளிநாடுகளுக்கும் ஏத்தர் ஸ்கூட்டர்களை ஏற்றுமதி செய்யவும் திட்டமிட்டுள்ளது.