மலிவான ஹீரோ பைக்... எச்எஃப் டீலக்ஸ் கிக்-ஸ்டார்ட் பிஎஸ்6 தரத்தில் அறிமுகம்...

இந்த பிஎஸ்6 வேரியண்ட், மிகவும் முக்கியமான அப்டேட்டாக எலக்ட்ரிக்-ஸ்டார்ட் வசதியை ஏற்றுள்ளது. ஸ்போக் சக்கரம் மற்றும் அலாய் சக்கரம் என இரு விதமான வேரியண்ட்களில் விற்பனை செய்யப்பட்டு வரும் எச்எஃப் டீலக்ஸ் பைக் எக்ஸ்ஷோரூமில் ரூ.46,800- ரூ.47,800 அளவில் விலையை கொண்டுள்ளது.

முன்னதாக கடந்த ஜனவரி மாதத்தில் அறிமுகமான எச்எஃப் டீலக்ஸ் செல்ஃப்-ஸ்டார்ட் மாடலின் விலை தற்போது அறிமுகமாகியுள்ள கிக்-ஸ்டார்ட் மாடலின் ஆரம்ப விலையை காட்டிலும் கிட்டத்தட்ட ரூ.10 ஆயிரம் அதிகமாக ரூ.56,675 ஆக நிர்ணயிக்கப்பட்டுள்ளது.

இந்த இரு விதமான எச்எஃப் மாடலிலும் இயக்க ஆற்றலை வழங்குவதற்கு ஒரே விதமான 100சிசி சிங்கிள்-சிலிண்டர் என்ஜின் தான் பிஎஸ்6 அப்கிரேட்டாக ஃப்யூல்-இன்ஜெக்டட் சிஸ்டத்துடன் வழங்கப்பட்டுள்ளது. இந்த புதிய சிஸ்டத்தினால் 9 சதவீத எரிபொருள் திறனை கூடுதலாக வழங்கும் இந்த 100சிசி என்ஜின் அதிகப்பட்சமாக 8.36 பிஎச்பி பவரை வெளிப்படுத்தும்.

முன்னதாக பிஎஸ்4 தரத்தில் இந்த என்ஜின் 7.94 பிஎச்பி பவரை தான் வெளிப்படுத்தி வந்தது குறிப்பிடத்தக்கது. ஆனால் டார்க் திறனில் எந்த மாற்றமும் இல்லாமல் 8.05 என்எம்-ஆக தான் உள்ளது. இவை மட்டுமின்றி இந்த புதிய என்ஜின் அமைப்பு 6 சதவீத வேகமான ஆக்ஸலேரேஷன் உடன் சிறப்பான செயல்திறனை வழங்கும்.

இவற்றுடன் புதிய எச்எஃப் டீலக்ஸ் பைக்குகள் ஹீரோ நிறுவனத்தின் ஐ3எஸ் (ஐடியல் ஸ்டார்ட்-ஸ்டாப் சிஸ்டம்) சிஸ்டத்தையும் பெற்றுள்ளன. எச்எஃப் டீலக்ஸ், ஹீரோ நிறுவனத்தின் சிறப்பான விற்பனை மாடலாக ஸ்பிளெண்டர்+ பைக்கிற்கு அடுத்த நிலையில் உள்ளது.

சமீபத்தில் நிறைவடைந்த 2019-20 நிதியாண்ட்டில் இந்த இரு ஹீரோ பைக்குகளின் விற்பனையில் பெரிய அளவில் வித்தியாசம் இல்லை. 20,63,148 யூனிட்கள் விற்பனையுடன் ஸ்பிளெண்டர்+ முதலிடத்தையும், அதனை விட சில ஆயிரங்களை மட்டுமே குறைவாக பெற்று எச்எஃப் டீலக்ஸ் 20,50,974 யூனிட்கள் விற்பனையுடன் இரண்டாவது இடத்திலும் உள்ளன.

இந்திய சந்தையில் மிகவும் மலிவான விலை கொண்ட பைக் மாடலாக ஹீரோ எச்எஃப் டீலக்ஸ் கிக்-ஸ்டார்ட் பிஎஸ்6 பைக் தற்போது அறிமுகமாகினாலும், இதனை விட குறைவான விலையில் பஜாஜ் நிறுவனத்தின் சிடி100 மாடல் விற்பனை செய்யப்பட்டு வருகிறது. இந்த பஜாஜ் பைக்கின் விலை எக்ஸ்ஷோரூமில் ரூ.41,293-ஆக உள்ளது குறிப்பிடத்தக்கது.