பிஎஸ்-6 எஞ்சினுடன் வரும் மூன்று புதிய டுகாட்டி பைக் மாடல்கள்!

கடந்த ஏப்ரல் 1 முதல் வாகனங்களுக்கான பிஎஸ்-6 மாசு உமிழ்வு விதிகள் அமலுக்கு கொண்டு வரப்பட்டன. இந்த சூழலில், சூப்பர் பைக் தயாரிப்பில் பிரபலமான டுகாட்டி நிறுவனம் பிஎஸ்-6 பைக் மாடல்களை கொண்டு வருவதற்கான திட்டத்தில் தீவிரமாக உள்ளது. கொரோனா பாதிப்பு காரணமாக, தனது பிஎஸ்-6 பைக் மாடல்களின் அறிமுகத்தை சற்று தாமதப்படுத்தி உள்ளது.

இந்த நிலையில், வரும் ஆகஸ்ட் மாதத்தில் பனிகேல் பிஎஸ்-6 மாடலை கொண்டு வர இருக்கிறது. இதைத்தொடர்ந்து, இந்த ஆண்டு மேலும் மூன்று பைக் மாடல்களை பிஎஸ்-6 எஞ்சின் தேர்வுடன் அறிமுகப்படுத்த டுகாட்டி திட்டமிட்டுள்ளதாக தகவல் வெளியாகி இருக்கிறது.

மல்டிஸ்ட்ரேடா குடும்பத்தில் ஒரு புதிய பைக் மாடலை டுகாட்டி அறிமுகப்படுத்த இருப்பதாக தகவல்கள் கூறுகின்றன. இந் பைக் 950 சிசி பிஎஸ்-6 எஞ்சினுடன் இந்தியாவில் அறிமுகப்படுத்தப்பட உள்ளது.

அடுத்து பிஎஸ்-6 தர எஞ்சினுடன் ஸ்க்ராம்ப்ளர் 800 பைக் மாடல்களை வரும் நம்பரில் இந்தியா கொண்டு வருவதற்கும் டுகாட்டி திட்டமிட்டுள்ளது. இந்தியாவில் டுகாட்டி நிறுவனத்தின் அதிகம் விற்பனையாகும் மாடல்களாக ஸ்க்ராம்பளர் மாடல்கள் உள்ளன.

மூன்றாவதாக, ஸ்க்ராம்ப்ளர் 1100 பைக் மாடலையும் பிஎஸ்-6 தர எஞ்சினுடன் விற்பனைக்கு கொண்டு வருவதற்கு டுகாட்டி திட்டமிட்டுள்ளது. இந்த மாடலுக்கு குறைவான வரவேற்பு இருந்தாலும், வரும் காலங்களில் நிச்சயம் விற்பனை படிப்படியாக உயர வாய்ப்பு இருப்பதாக டுகாட்டி கருதுகிறது.

டுகாட்டி ஸ்க்ராம்ப்ளர் 1100 பைக் மாடலானது யூரோ-5 மாசு அம்சத்துடன் வெளிநாடுகளில் விற்பனை செய்யப்படுகிறது. இதே எஞ்சின் இந்தியாவில் பிஎஸ்-6 தரத்திற்கு நிகரானதாக இருக்கும். மேலும், டிசைனில் சிறிய அளவிலான மாற்றங்களுடன் புதுப்பொலிவு பெற்று வர இருப்பதாகவும் தகவல்கள் கூறுகின்றன.

பிஎஸ்-6 தரத்திற்கு இணையாக வர இருக்கும் புதிய டுகாட்டி பைக் மாடல்கள் இந்தியர்கள் மத்தியில் அதிக ஆவலை ஏற்படுத்தி உள்ளது. குறிப்பாக, ஸ்க்ராம்ப்ளர் மாடல்கள் சரியான பட்ஜெட்டிலும், வசீரமான தோற்றத்திலும் கிடைப்பதால், இந்தியர்கள் அதிக ஆவலோடு காத்திருக்கின்றனர்.