விலையுயர்ந்த பிஎம்டபிள்யூ பைக்காக மாறிய ஸ்பிளென்டர்... இதற்கான செலவுதான் இன்னும் ஆச்சரியமா இருக்கு!

ஹீரோ மோட்டோகார்ப் நிறுவனத்தின் பிரபல இருசக்கர வாகனங்களில் ஸ்பிளெண்டர் பைக்கும் ஒன்று. இது நாட்டின் அதிகம் விற்பனையாகும் இருசக்கர வாகனமும்கூட. இந்த பைக்கையே விலையுயர்ந்த பிஎம்டபிள்யூ நிறுவனத்தின் கஃபே ரேசர் பைக்கிற்கு இணையான ஸ்டைலில் இந்தியாவைச் சேர்ந்த மாடிஃபிகேஷன் நிறுவனம் மாற்றியிருக்கின்றது.

இந்த தோற்றத்திற்காக பல்வேறு அணிகலன்கள் நீக்கப்பட்டு புதிய ஆஃப்டர் மார்க்கெட் உடல்கூறுகள் சேர்க்கப்பட்டிருக்கின்றன. குறிப்பாக, உருமாற்றத்தை ஏற்றும் வகையில், ஸ்பிளென்டர் பைக்கின் ஃபிரேமில் லேசான மாற்றங்கள் செய்யப்பட்டிருக்கின்றன. இதைத் தொடர்ந்தே அனைத்து புதிய கூறுகளும் இப்பைக்கில் சேர்க்கப்பட்டுள்ளது.

இதன்படி, டயர் முதல் இருக்கை வரை அனைத்தையும் மாடிஃபிகேஷன் குழு மாற்றியமைத்துள்ளது. ஏன் பெட்ரோல் டேங்க், ஹெட்லைட், மட்டுகுவார்ட், ஹேண்டில், ஃபுட் ரெஸ்ட் உள்ளிட்டவற்றை விட்டு வைக்காமல் அவர்கள் மாற்றியிருக்கின்றனர். இதனால்தான் ஸ்பிளெண்டர் பைக் தற்போது புதிய உருவத்திற்கு மாறியிருக்கின்றது.

இந்த புதிய உருவ மாற்றத்தால் ஒருவர் மட்டுமே செல்லக்கூடிய பைக்காக இது மாறியிருக்கின்றது. சற்று நீளம் குறைந்த இருக்கையைப் பயன்படுத்தியிருக்கின்ற காரணத்தினால் இதன் உருவம் மட்டுமே இப்படி மாறியிருக்கின்றது. ஆகையால், தாராளமாக அல்லாமல் சற்று ஒடுங்கியவாறே இருவர் இதில் பயணிக்க முடியும்.

இதைத்தொடர்ந்து, சில இடங்களில் புதிய வண்ணத்தையும் மாடிஃபிகேஷன் குழுவினர் சேர்த்திருக்கின்றனர். சஸ்பென்ஷன்களில் நிற மாற்றத்தை நம்மால் காண முடிகின்றது. பிரீமியம் லுக்கை வழங்க வேண்டும் என்பதற்காக கோல்டன் நிறம் சஸ்பென்ஷனுக்கு வழங்கப்பட்டிருக்கின்றது.

இந்த மாற்றங்களினாலேயே ஹீரோ ஹோண்டா ஸ்பிளென்டர் பைக், பிஎம்டபிள்யூ பைக்கின் அவதாரத்தைப் பெற்றிருக்கின்றது. புதிதாக சேர்க்கப்பட்டிருக்கும் ப்யூவல் டேங்கினாலேயே இந்த தோற்றத்தை பைக் பெற்றிருக்கின்றது. பழைய கஃபே ரேஸர் ரக பிஎம்டபிள்யூ பைக்கின் ப்யூவல் டேங்கே இதற்காக பயன்படுத்தப்பட்டிருக்கின்றது. அதில், பிஎம்டபிள்யூ சின்னம் தற்போதும் இருப்பதை நம்மால் காண முடிகின்றது.

Image Courtesy: Reyansh Khichi

இந்த ஒட்டுமொத்த மாற்றத்திற்குமே ரூ. 60 ஆயிரம் மட்டுமே செலவாகியிருப்பதாக கூறப்படுகின்றது. இது மிக அதிகம் என்று கூறிவிட முடியாது. கடந்த காலங்களில் புதிய பைக்கின் விலைக்கே வாகன மாடிஃபிகேஷன் செய்யப்பட்டிருக்கின்றது. அந்தவகையில், இது மிக மிக குறைந்த செலவில் செய்யப்பட்ட வாகன மாடிஃபிகேஷன் ஆகும்.

தற்போது உருமாற்றத்தைப் பெற்றிருப்பது 1994ல் ஹீரோ மற்றும் ஹோண்டா இணைவில் விற்பனைக்கு வந்த ஸ்பிளென்டர் பைக்காகும். இதனையே புதிய அவதாரத்திற்கு வாகன ஆர்வலர்கள் மாற்றியமைத்திருக்கின்றனர். இதுபோன்ற ஓர் வாகனத்தின் உண்மையான தோற்றத்தை மழுங்க செய்து, வேறொரு உருவம் கொடுப்பது இந்திய மோட்டார் வாகன விதிகளின்படி சட்டவிரோத செயல் என்பது குறிப்பிடத்தகுந்தது.