புதிய பைக் மாடல்களுடன் சந்தையை வலுப்படுத்த கேடிஎம் தீவிரம்!

கேடிஎம் நிறுவனத்தின் பைக் மாடல்களுக்கு இந்தியாவில் அதிக வரவேற்பு இருந்து வருகிறது. ஆரம்ப ரக பிரிமீயம் பைக் மார்க்கெட்டில் கேடிஎம்தான் நம்பர்- 1 தேர்வாகவும் உள்ளது. இந்த நிலையில், புதிய பிராண்டுகளின் வரவு காரணமாக கேடிஎம் சிறிது நெருக்கடியை சந்திக்க துவங்கி இருக்கிறது.

இந்த நெருக்கடியை போக்கிக் கொள்ளும் விதமாக, தனது பிராண்டிலும் தனது கீழ் செயல்பட்டு வரும் ஹஸ்க்வர்னா பிராண்டிலும் புதிய மாடல்களை களமிறக்க திட்டமிட்டுள்ளது. குறிப்பாக, தனது பிராண்டில் விலை குறைவான பைக் மாடல்களை கொண்டு வருவதற்கான முயற்சிகளில் இறங்கி இருப்பதாக ஆட்டோகார் இந்தியா தள செய்தி தெரிவிக்கிறது.

அதன்படி, 250சிசி அட்வென்ச்சர் பைக் மாடலை மிக விரைவில் விற்பனைக்கு கொண்டு வருவதற்கு கேடிஎம் திட்டமிட்டுள்ளது. இது ஏற்கனவே விற்பனையில் உள்ள 390 அட்வென்ச்சர் பைக் மாடலைவிட விலை குறைவான தேர்வாக அமையும்.

கேடிஎம் ட்யூக் 250 பைக்கில் இருக்கும் அதே 249சிசி பிஎஸ்6 எஞ்சின்தான் இந்த பைக்கிலும் பயன்படுத்தப்படும். இந்த எஞ்சின் 29.6 பிஎச்பி பவரையும், 24 என்எம் டார்க் திறனையும் வெளிப்படுத்தும். 6 ஸ்பீடு கியர்பாக்ஸ் இணைக்கப்பட்டு இருக்கும். ஸ்டீல் ட்ரெல்லிஸ் ஃப்ரேம், அலாய் வீல்கள் ஆகியவையும் ட்யூக் 250 பைக்கிலிருந்து பெற்றிருக்கும்.

இந்த பைக்கில் எம்ஆர்எஃப் மோக்ரிப் மீட்டியோர் எஃப்எம்2 என்ற விசேஷ ட்யூப்லெஸ் டயர்கள் இடம்பெற்றிருக்கும். டிஎஃப்டி திரையுடன் இன்ஸ்ட்ரூமென்ட் க்ளஸ்ட்டர் இரண்டு சக்கரரங்களிலும் டிஸ்க் பிரேக்குகள், டிராக்ஷன் கன்ட்ரோல் சிஸ்டம், ரைடு பை ஒயர் மற்றும் குயிக் ஷிஃப்டர் வசதிகள் இதன் முக்கிய அம்சங்களாக இருக்கும்.

இந்த பைக் மாடல் தவிர்த்து தனது ஆர்சி125 மற்றும் ஆர்சி200 பைக் மாடல்களில் புதிய வண்ணத் தேர்வுகளை வழங்கவும் கேடிஎம் நிறுவனம் திட்டமிட்டுள்ளது. இது வாடிக்கையாளர்களுக்கு கூடுதல் தேர்வு வாய்ப்பை வழங்கும். தற்போது இந்த மாடல்கள் ஒரே ஒரு வண்ணத் தேர்வில் மட்டுமே கிடைக்கின்றன.

இதுமட்டுமின்றி, ஹஸ்க்வர்னா பிராண்டில் ஸ்வர்ட்பிலின் 401 மற்றும் விட்பிலின் 401 ஆகிய பைக் மாடல்களையும் அடுத்த மாதம் விற்பனைக்கு கொண்டு வர கேடிஎம் திட்டமிட்டுள்ளதாக தகவல்கள் வெளியாகி இருக்கின்றன. இவை கேடிஎம் 390 பைக் மாடல்களின் அடிப்படையில் உருவாக்கப்பட்டுள்ளன. வடிவமைப்பில் மட்டும் மாறுபடுகின்றன.