'மேட் இன் இந்தியா' பிஎம்டபிள்யூ ஜி310ஆர் மோட்டார்சைக்கிள் ஐரோப்பாவில் விற்பனைக்கு அறிமுகம்...

பிஎம்டபிள்யூ மோட்டோராட் நிறுவனம் புதிய ஜி310ஆர் (BMW G310R) பைக்கை ஐரோப்பிய சந்தையில் விற்பனைக்கு அறிமுகம் செய்துள்ளது. பிஎம்டபிள்யூ ஜி310ஆர் மோட்டார்சைக்கிள் இந்தியாவில் உற்பத்தி செய்யப்படுகிறது என்பது இங்கே குறிப்பிடத்தக்க விஷயம். அதுவும் தமிழகத்தில் என்பது கூடுதல் சிறப்பம்சம்.

ஓசூரில் உள்ள தனது ஆலையில் டிவிஎஸ் மோட்டார் நிறுவனம்தான், பிஎம்டபிள்யூ ஜி310ஆர் பைக்குகளை உற்பத்தி செய்து வருகிறது. இங்கிருந்துதான் இந்த பைக் வெளிநாட்டு சந்தைகளுக்கு ஏற்றுமதி செய்யப்படுகிறது. புகைப்படங்களை வைத்து பார்க்கையில் இந்தியாவில் விற்பனை செய்யப்படும் மாடலும், ஐரோப்பிய சந்தைக்கான மாடலும் ஒன்று போலவே இருப்பது போல் தெரிகிறது.

ராயல் என்பீல்டு ஹிமாலயன் பிஎஸ்6 - இப்படி ஒரு ரிவியூ வீடியோ இதுக்கு முன்னாடி பாத்திருக்க மாட்டீங்க!!!

மிக முக்கியமாக வரும் ஜனவரி 1ம் தேதி முதல் அமலுக்கு வரவுள்ள யூரோ 5 மாசு உமிழ்வு விதிமுறைகளுக்கு இணக்கமான வகையில் புதிய பிஎம்டபிள்யூ ஜி310ஆர் உருவாக்கப்பட்டுள்ளது. புதிய பிஎம்டபிள்யூ ஜி310ஆர் பைக் சமீபத்தில்தான் இந்திய சந்தையிலும் விற்பனைக்கு அறிமுகம் செய்யப்பட்டது என்பது குறிப்பிடத்தக்கது.

இந்திய சந்தையில் 2.45 லட்ச ரூபாய் (எக்ஸ் ஷோரூம்) என்ற விலையில், புதிய பிஎம்டபிள்யூ ஜி310ஆர் விற்பனைக்கு அறிமுகம் செய்யப்பட்டது. இந்த புதிய மாடலில் இன்ஜின் மேம்படுத்தப்பட்டிருந்ததுடன், டிசைனிலும் மாற்றம் செய்யப்பட்டிருந்தது. அத்துடன் ஜி310ஆர் பைக்கில் கூடுதலாக சில வசதிகளையும் பிஎம்டபிள்யூ நிறுவனம் சேர்த்திருந்தது.

ஐரோப்பிய சந்தையில் விற்பனைக்கு அறிமுகம் செய்யப்பட்டுள்ள புதிய ஜி310ஆர் மோட்டார்சைக்கிளுக்கு பிஎம்டபிள்யூ நிறுவனம் 4,875 பவுண்டுகளை விலையாக நிர்ணயம் செய்துள்ளது. இது இந்திய மதிப்பில் சுமார் 4.80 லட்ச ரூபாய் ஆகும். ஐரோப்பிய சந்தையில் முன்பு இருந்ததை விட தற்போது விலை அதிகரிக்கப்பட்டுள்ளது.

ஆனால் இந்திய சந்தையில் இதற்கு நேர்மாறாக புதிய பிஎம்டபிள்யூ ஜி310ஆர் மோட்டார்சைக்கிளின் விலை அதிரடியாக குறைக்கப்பட்டிருந்தது. அதாவது பிஎஸ்-4 மாடலுடன் ஒப்பிடுகையில், சுமார் 54,000 ரூபாய் விலை குறைப்பை செய்து பிஎம்டபிள்யூ மோட்டோராட் நிறுவனம் அதிரடி காட்டியது. இந்திய வாடிக்கையாளர்களை கவர்வதற்காக இந்த விலை குறைப்பு அஸ்திரத்தை பிஎம்டபிள்யூ மோட்டோராட் நிறுவனம் கையில் எடுத்திருந்தது.

பிஎம்டபிள்யூ ஜி310ஆர் பைக்கில், மேம்படுத்தப்பட்ட 313சிசி, லிக்யூட்-கூல்டு, சிங்கிள்-சிலிண்டர் இன்ஜின் வழங்கப்பட்டுள்ளது. இந்த இன்ஜின் 9,500 ஆர்பிஎம்மில் 33.5 பிஎச்பி பவரையும், 7,500 ஆர்பிஎம்மில் 28 என்எம் டார்க் திறனையும் உருவாக்க கூடியது. 6 ஸ்பீடு கியர் பாக்ஸ் வழங்கப்பட்டுள்ளது. அத்துடன் ஸ்லிப்பர் கிளட்ச் வசதியும் இடம்பெற்றுள்ளது.

பிஎம்டபிள்யூ ஜி310ஆர் பைக் அதிகபட்சமாக மணிக்கு 143 கிலோ மீட்டர்கள் வேகத்தில் செல்லக்கூடியது. அத்துடன் பூஜ்ஜியத்தில் இருந்து மணிக்கு 50 கிலோ மீட்டர்கள் என்ற வேகத்தை வெறும் 2.5 வினாடிகளில் எட்டி விடக்கூடிய திறனையும் இந்த மோட்டார்சைக்கிள் பெற்றுள்ளது. 2021 பிஎம்டபிள்யூ ஜி310ஆர் பைக் டிசைன் அப்டேட்களை பெற்றிருப்பதுடன் மட்டுமல்லாது, மேம்படுத்தப்பட்ட இன்ஜின் மற்றும் சில கூடுதல் வசதிகளையும் பெற்றுள்ளது.