மிகவும் கவர்ச்சியான புதுமுக பைக்கை வெளியீடு செய்த சுசுகி... இதைதான் சுசுகி 2021ல் அமெரிக்காவில் களமிறக்குகிறது

பிரபல இருசக்கர வாகன உற்பத்தி நிறுவனமான சுசுகி, 2021ம் ஆண்டிற்கான ஜிஎஸ்எக்ஸ்250 ஆர் மாடலை வெளியீடு செய்துள்ளது. இது மோட்டார்சைக்கிள் வாகன பிரியர்கள் மத்தியில் மகிழ்ச்சியை ஏற்படுத்தியுள்ளது. இந்திய இளைஞர்கள் மத்தியில் கடந்த காலைங்களைக் காட்டிலும் சுசுகி மோட்டார்சைக்கிள் நிறுவனத்தின் இருசக்கர வாகனங்களுக்கு நல்ல டிமாண்ட் கிடைக்க ஆரம்பித்துள்ளது.

இம்மாதிரியான சூழ்நிலையிலேயே 2021ம் ஆண்டிற்கான ஜிஎஸ்எக்ஸ் 250 ஆர் பைக்கின் வெளியீடை சுசுகி செய்திருக்கின்றது. இப்பைக்கிற்கு அமெரிக்க டாலர்கள் மதிப்பில் 5,499 என்ற விலை நிர்ணயிக்கப்பட்டுள்ளது. இது இந்திய மதிப்பில் ரூ. 4.06 லட்சம் ஆகும். அடேங்கப்பா இவ்ளோ அதிக விலையா என கேட்கத் தோன்றலாம். இது அமெரிக்க சந்தைக்கான விலை மட்டுமே ஆகும்.

இப்பைக்கில் பல்வேறு புதிய கூறுகளை சுசுகி சேர்த்திருப்பதாக தகவல்கள் தெரிவிக்கின்றன. அந்தவகையில், பைக்கை மேலும் அழகூட்டும் செயல்கள் அதிகளவில் செய்யப்பட்டுள்ளது. இதற்காக புதிய கட்டுமஸ்தான உடல் பேனல்கல் சேர்க்கப்பட்டிருக்கின்றன.

இதுமட்டுமின்றி, எல்சிடி இன்ஸ்ட்ரூமென்ட் க்ளஸ்டர், எல்இடி டிஆர்எல்கள், ஹெட்லேம்ப் மற்றும் வால்பகுதி மின் விளக்குகளில் எல்இடி தரத்திலான லைட்டுகள் ஆகியவை பயன்படுத்தப்பட்டிருக்கின்றன. இதன் எரிபொருள் தொட்டி 15 லிட்டர் கொள்ளளவு கொண்டதாகும்.

மேலும், சிறப்பு ஹேண்ட்லிங் வசதிக்காக க்ளிப்-ஆன் ஹேண்டில்பார் மற்றும் பிளவுபட்ட இருக்கை ஆகியவை சேர்க்கப்பட்டிருக்கின்றன. இதேபோன்று சிறந்த எஞ்ஜின் திறனுக்காக 248சிசி திறனை வெளிப்படுத்தக்கூடிய பாரல்லல் ட்வின் சிலிண்டர், லிக்யூடு கூல்டு மோட்டாரே பயன்படுத்தப்பட்டுள்ளது.

இத்துடன் சிறப்பான வேகக்கட்டுப்பாட்டிற்காக ஆறு படிநிலைகள் கியர்பாக்ஸ் இணைக்கப்பட்டுள்ளது. மேலும், சௌகரியமான சஸ்பென்ஷன் வசதிக்காக டெலிஸ்கோபிக் ஃபோர்க் முன்பக்கத்திலும், மோனோ-ஷாக் அப்சார்பர் பின்பக்கத்திலும் சேர்க்கப்பட்டிருக்கின்றன.

இதுமட்டுமின்றி பாதுகாப்பான பயண அனுபவத்தை ஏற்படுத்திக் கொடுக்கின்ற வகையில் இரு வீல்களுக்கும் டிஸ்க் பிரேக் வசதி கொடுக்கப்பட்டிருக்கின்றது. இதுபோன்ற எக்கசக்க வசதிகளை இப்பைக் கொண்டிருக்கின்ற காரணத்தினாலயே ஜிஎஸ்எக்ஸ்250ஆர் பைக்கிற்கு அதிக விலையை சுசுகி நிர்ணயித்துள்ளது.

ஜப்பான் நிறுவனம் இதன் இந்திய வருகை பற்றிய தகவலை இதுவரை வெளியிடவில்லை. ஆகையால், இப்பைக் இந்தியாவில் விற்பனைக்குக் கிடைப்பது கேள்விக் குறியே. இதன் இடத்தைப் பூர்த்தி செய்கின்ற வகையில் மிகவும் கவர்ச்சியான பைக்குகளாக ஜிக்ஸர் 250 மற்றும் ஜிக்ஸர் எஸ்எஃப் 250 ஆகிய இரு மாடல்களை சுசுகி இந்தியாவில் விற்பனைக்கு வழங்கியிருக்கின்றது.