இந்தியாவில் அதிகம் விற்பனையாகும் டூவீலர்கள் இவைதான்... இதில் பொங்கலுக்கு நீங்கள் எதை வாங்க போறீங்க?

இந்தியாவில் கடந்த நவம்பர் மாதம் அதிகம் விற்பனை செய்யப்பட்ட டாப்-10 இரு சக்கர வாகனங்களின் பட்டியல் வெளியாகியுள்ளது. இதில், ஹீரோ ஸ்பிளெண்டர் முதல் இடத்தை பிடித்துள்ளது. கடந்த 2019ம் ஆண்டு நவம்பர் மாதம் ஹீரோ மோட்டோகார்ப் நிறுவனம் 2,23,289 ஸ்பிளெண்டர் பைக்குகளை விற்பனை செய்திருந்தது.

இந்த எண்ணிக்கை நடப்பாண்டு நவம்பர் மாதம் 2,48,398 ஆக உயர்ந்துள்ளது. இது 11.25 சதவீத வளர்ச்சியாகும். இந்த பட்டியலில் ஹோண்டா நிறுவனத்தின் ஆக்டிவா ஸ்கூட்டர் இரண்டாவது இடத்தை பிடித்துள்ளது. கடந்த 2019ம் ஆண்டு நவம்பர் மாதம் 2,12,164 ஆக்டிவா ஸ்கூட்டர்களை ஹோண்டா நிறுவனம் விற்பனை செய்திருந்தது.

இந்த எண்ணிக்கை நடப்பாண்டு நவம்பர் மாதம் 2,25,822 ஆக உயர்ந்துள்ளது. இது 6.44 சதவீத வளர்ச்சியாகும். இந்த பட்டியலில் ஹீரோ ஹெச்எஃப் டீலக்ஸ் மூன்றாவது இடத்தை பிடித்துள்ளது. கடந்த 2019ம் ஆண்டு நவம்பர் மாதம் 1,59,544 ஆக இருந்த ஹீரோ ஹெச்எஃப் டீலக்ஸ் பைக்கின் விற்பனை எண்ணிக்கை நடப்பாண்டு நவம்பர் மாதம் 1,79,426 ஆக உயர்ந்துள்ளது. இது 12.46 சதவீத வளர்ச்சியாகும்.

இந்த பட்டியலில் 4வது இடத்தை பஜாஜ் பல்சர் பிடித்துள்ளது. கடந்த 2019ம் ஆண்டு நவம்பர் மாதம் 68,268 பல்சர் பைக்குகளை மட்டுமே பஜாஜ் நிறுவனம் விற்பனை செய்திருந்தது. ஆனால் நடப்பாண்டு நவம்பர் மாதம் 1,04,904 பல்சர் பைக்குகள் விற்பனை செய்யப்பட்டுள்ளன. இதன் மூலம் விற்பனையில் 53.66 சதவீத வளர்ச்சியை பஜாஜ் பல்சர் பதிவு செய்துள்ளது.

இந்த பட்டியலில் 5வது இடத்தை ஹோண்டா சிபி ஷைன் பிடித்துள்ளது. கடந்த 2019ம் ஆண்டு நவம்பர் மாதம் 75,144 ஆக இருந்த ஹோண்டா சிபி ஷைன் பைக்கின் விற்பனை எண்ணிக்கை நடப்பாண்டு நவம்பர் மாதம் 94,413 ஆக உயர்ந்துள்ளது. இது 25.64 சதவீத வளர்ச்சியாகும். இந்த பட்டியலில் 6வது இடத்தை டிவிஎஸ் எக்ஸ்எல் பிடித்துள்ளது.

கடந்த 2019ம் ஆண்டு நவம்பர் மாதம் 57,550 எக்ஸ்எல் மொபட்களை டிவிஎஸ் நிறுவனம் விற்பனை செய்திருந்தது. இந்த எண்ணிக்கை நடப்பாண்டு நவம்பர் மாதம் 70,750 ஆக உயர்ந்துள்ளது. இது 22.94 சதவீத வளர்ச்சியாகும். இந்த பட்டியலில் 7வது இடத்தை டிவிஎஸ் ஜூபிடர் பிடித்துள்ளது. கடந்தாண்டு நவம்பர் மாதம் 41,007 ஜூபிடர் ஸ்கூட்டர்களை டிவிஎஸ் நிறுவனம் விற்பனை செய்திருந்தது.

ஆனால் நடப்பாண்டு நவம்பர் மாதம் 62,626 ஜூபிடர் ஸ்கூட்டர்கள் விற்பனை செய்யப்பட்டுள்ளன. இது 52.72 சதவீத வளர்ச்சியாகும். இந்த பட்டியலில் 8வது இடத்தை ஹீரோ பேஷன் பிடித்துள்ளது. கடந்தாண்டு நவம்பர் மாதம் 39,525 ஆக இருந்த பேஷன் பைக்குகளின் விற்பனை எண்ணிக்கை நடப்பாண்டு நவம்பர் மாதம் 53,768 ஆக உயர்ந்துள்ளது. இது 36.04 சதவீத வளர்ச்சியாகும்.

கடந்த நவம்பர் மாதம் அதிகம் விற்பனை செய்யப்பட்ட டாப்-10 இரு சக்கர வாகனங்களின் பட்டியலில் முதல் 8 இடங்களை பிடித்துள்ள தயாரிப்புகள் அனைத்தும் வளர்ச்சியைதான் பதிவு செய்துள்ளன. ஆனால் கடைசி 2 இடங்களை பிடித்துள்ள தயாரிப்புகள் மட்டும் வீழ்ச்சியை பதிவு செய்துள்ளன. இந்த பட்டியலில் 9வது இடத்தை சுஸுகி அக்ஸெஸ் பிடித்துள்ளது.

நடப்பாண்டு நவம்பர் மாதம் சுஸுகி நிறுவனம் 45,582 அக்ஸெஸ் ஸ்கூட்டர்களை மட்டுமே விற்பனை செய்துள்ளது. ஆனால் கடந்தாண்டு நவம்பர் மாதம் இந்த எண்ணிக்கை 49,128 ஆக இருந்தது. இது 7.22 சதவீத வீழ்ச்சியாகும். இந்த பட்டியலில் 10வது மற்றும் கடைசி இடத்தில் பஜாஜ் பிளாட்டினா உள்ளது. நடப்பாண்டு நவம்பர் மாதம் 41,572 பிளாட்டினா பைக்குகளை பஜாஜ் நிறுவனம் விற்பனை செய்துள்ளது.

ஆனால் இந்த எண்ணிக்கை கடந்தாண்டு நவம்பர் மாதம் 53,015 ஆக இருந்தது. இது 21.58 சதவீத வீழ்ச்சியாகும். கொரோனா வைரஸ் அச்சம் காரணமாக மக்கள் தற்போது பொது போக்குவரத்தை தவிர்த்து வருகின்றனர். அதற்கு பதிலாக சொந்த வாகனங்களில் பயணம் செய்வதை பாதுகாப்பானதாக கருதுகின்றனர். இதன் காரணமாக இரு சக்கர வாகனங்களின் விற்பனை உயர்ந்துள்ளது.

எனவேதான் டாப்-10 பட்டியலில் இடம்பெற்றுள்ள முதல் 8 இரு சக்கர வாகனங்கள் விற்பனையில் வளர்ச்சியை பதிவு செய்துள்ளதாக ஆட்டோமொபைல் வல்லுனர்கள் தெரிவிக்கின்றனர். தற்போது பொங்கல் பண்டிகை நெருங்கி வருகிறது. இதை முன்னிட்டு புதிய இரு சக்கர வாகனங்களை வாங்குவதற்கு நீங்கள் முடிவு செய்திருக்கலாம்.

இங்கே நாங்கள் வழங்கியுள்ள பட்டியலின் அடிப்படையில் நீங்கள் வாங்கவுள்ள புதிய இரு சக்கர வாகனத்தை முடிவு செய்யலாம். டாப்-10 பட்டியலில் இடம்பெற்றுள்ள இரு சக்கர வாகனங்கள் சிறப்பான விற்பனை எண்ணிக்கையை பதிவு செய்துள்ளன. வாடிக்கையாளர்களின் நம்பிக்கையை பெற்றுள்ளதே இதற்கு காரணம். எனவே இதன் அடிப்படையில் நீங்கள் வாங்கவுள்ள இரு சக்கர வாகனத்தை தேர்வு செய்வது சிறப்பானதாக இருக்கும்.