2020ல் இத்தனை அட்வென்ச்சர் பைக்குகள் இந்தியாவிற்கு வந்துள்ளதா!! உங்களது தேர்வு எது?

கேடிஎம் 250 அட்வென்ச்சர்

கொரோனாவினால் கொண்டுவரப்பட்ட ஊரடங்குகள் ஒவ்வொன்றாக தளர்வு செய்யப்பட்ட சமயத்தில் 250 அட்வென்ச்சர் பைக் மாடலை கேடிஎம் நிறுவனம் நம் நாட்டில் அறிமுகப்படுத்தியது. இதன் எக்ஸ்ஷோரூம் விலை ரூ.2.48 லட்சமாக நிர்ணயிக்கப்பட்டுள்ளது.

ப்ளூடூத் இணைப்பு கொண்ட டிஎஃப்டி திரை உடன் வழங்கப்படும் இந்த அட்வென்ச்சர் பைக்கில் ட்யூக் 250 பைக்கில் வழங்கப்படுகின்ற அதே 248சிசி, சிங்கிள்-சிலிண்டர், லிக்யூடு-கூல்டு என்ஜின்தான் வழங்கப்படுகிறது.

கேடிஎம் 390 அட்வென்ச்சர்

2019ல் வாடிக்கையாளர்களின் மத்தியில் மிகுந்த எதிர்பார்ப்புமிக்க மாடலாக இருந்த கேடிஎம் 390 அட்வென்ச்சர் 2020 ஜனவரி மாதத்தில் இந்தியாவில் அறிமுகப்படுத்தப்பட்டு குறிப்பிடத்தக்க வகையிலான வாடிக்கையாளர்கள் பட்டாளத்தை பெற்று வருகிறது.

கேடிஎம் நிறுவனம் 390 அட்வென்ச்சர் உள்பட தனது 390சிசி வரிசை பைக்குகளில் 373சிசி சிங்கிள்-சிலிண்டர் என்ஜின் பொருத்துகிறது. அதிகப்பட்சமாக 9000 ஆர்பிஎம்-ல் 43 பிஎச்பி மற்றும் 7000 ஆர்பிஎம்-ல் 37 என்எம் டார்க் திறனை வெளிப்படுத்தக்கூடிய இந்த பிஎஸ்6 என்ஜின் உடன் 6-ஸ்பீடு கியர்பாக்ஸ் இணைக்கப்படுகிறது. கேடிஎம் 390 அட்வென்ச்சரின் எக்ஸ்ஷோரூம் விலை ரூ.3.06 லட்சமாக உள்ளது.

பிஎம்டபிள்யூ ஜி 310ஜிஎஸ்

இந்தியாவில் மிகவும் மலிவான விலையில் கிடைக்கும் பிஎம்டபிள்யூ பைக்குகளில் ஒன்று ஜி 310ஜிஎஸ். இதன் பிஎஸ்6 வெர்சன் ரூ.2.85 லட்சம் என்ற விலையில் அறிமுகமானது. இது அதன் பிஎஸ்4 வெர்சனை காட்டிலும் ரூ.64,000 குறைவாகும்.

புதிய எல்இடி ஹெட்லைட் உடன் இளைஞர்களை கவரும் விதத்தில் வழங்கப்படுகின்ற இந்த பிஎம்டபிள்யூ அட்வென்ச்சர் பைக்கில் 313சிசி, லிக்யூடு-கூல்டு, சிங்கிள்-சிலிண்டர், 4-வால்வு என்ஜின் பொருத்தப்படுகிறது. இந்த என்ஜின் அதிகப்பட்சமாக 9500 ஆர்பிஎம்-ல் 33.5 பிஎச்பி மற்றும் 7500 ஆர்பிஎம்-ல் 28 என்எம் டார்க் திறனை வெளிப்படுத்தும் ஆற்றல் கொண்டது.

ட்ரையம்ப் டைகர் 900

புதிய ட்ரையம்ப் டைகர் 900 பைக் ரூ.13.7 லட்சம் என்ற ஆரம்ப விலையில் இந்த 2020ல் அறிமுகமானது. அதுவே இதன் டாப் ராலி ப்ரோ வேரியண்ட் ரூ.15.5 லட்சத்தில் விற்பனை செய்யப்படுகிறது. பிஎஸ்6 என்ஜின் மட்டுமின்றி பைக்கின் க்ரவுண்ட் க்ளியரென்ஸும் மேம்படுத்தப்பட்டுள்ளது.

பைக்கின் ஆரம்ப விலையில் கிடைக்கும் டைகர் 900ஜிடி மாடல் பெரும்பாலும் பொது சாலைக்கு ஏற்ற விதத்தில்தான் வடிவமைக்கப்படுகிறது. இதில் அலாய் சக்கரங்கள், தாழ்வான இருக்கை அமைப்பு மற்றும் சற்று குறைவான தொழிற்நுட்ப அம்சங்கள் வழங்கப்படுகின்றன.

அதுவே ராலி மற்றும் ராலி ப்ரோ வேரியண்ட்கள் ஆஃப்-ரோடுகளுக்கு தேவையான கருவிகள் மற்றும் வயர்-ஸ்போக் சக்கரங்களை பிரத்யேகமாக பெறுகிறது. முன்பை காட்டிலும் குறைவான எடையில் கொண்டுவரப்பட்டுள்ள இந்த மூன்று வேரியண்ட்களிலும் 888சிசி இன்லைன் 3-சிலிண்டர் என்ஜின் பொருத்தப்படுகிறது.

டுகாட்டி மல்டிஸ்ட்ராடா 950எஸ்

டுகாட்டி 2020 மல்டிஸ்ட்ராடா 950எஸ் பைக்கை தனது அட்வென்ச்சர் மோட்டார்சைக்கிளாக ரூ.15.49 லட்சம் என்ற ஆரம்ப விலையில் இந்த ஆண்டு விற்பனைக்கு கொண்டுவந்தது. இதில் பிஎஸ்6 தரத்திற்கு இணக்கமான 937சிசி L-இரட்டை, லிக்யூடு-கூல்டு என்ஜின் பொருத்தப்படுகிறது.

6-ஸ்பீடு கியர்பாக்ஸ் உடன் இணைக்கப்படுகின்ற இந்த என்ஜின் அதிகப்பட்சமாக 9000 ஆர்பிஎம்-ல் 111 பிஎச்பி மற்றும் 7,750 ஆர்பிஎம்-ல் 96 என்எம் டார்க் திறனை பைக்கிற்கு வழங்கும் திறன் கொண்டது. ஸ்போர்ட், டூரிங், அர்பன் மற்றும் எண்டுரோ என்ற நான்கு விதமான ட்ரைவிங் மோட்களில் கிடைக்கும் இந்த பைக்கில் ட்ரான்ஸ்மிஷன் அமைப்பில் புதியதாக விரைவான-ஷிஃப்டர் இணைக்கப்பட்டுள்ளது.