எதிர்பார்த்திராத மிக மிக குறைந்த விலையில் பிளாட்டினா 100 பைக் அறிமுகம்... எலெக்ட்ரிக் ஸ்டார்ட் வசதியுடன்...

பஜாஜ் நிறுவனம் அதன் புகழ்வாய்ந்த பைக் மாடல்களில் ஒன்றான பிளாட்டினா 100 பைக்கை புதிய வசதியுடன் நாட்டில் விற்பனைக்கு அறிமுகப்படுத்தியுள்ளது. எலெக்ட்ரிக் ஸ்டார்ட் (Electric Start) வசதியுடனே அது அறிமுகம் செய்யப்பட்டிருக்கின்றது.

மேலும், இப்பைக்கில் பிளாட்டினா பிராண்டின் நிரூபிக்கப்பட்ட 'கம்ஃபோர்டெக் தொழில்நுட்பம்' வசதியும் வழங்கப்பட்டிருக்கின்றது. தெளிவாகக் கூற வேண்டுமானால் கரடு-முரடான சாலையில் சென்றாலும்கூட அதிக சிரமத்தை வழங்காத வண்ணம் ஸ்பிரிங்-இன்-ஸ்பிரிங் வசதிக் கொண்ட சஸ்பென்ஷன்கள் இப்பைக்கில் வழங்கப்பட்டிருக்கின்றன.

இது நீண்ட தூர பயணத்தைக்கூட சௌகரியமான மற்றும் அலாதியான பயணமாக மாற்ற உதவும். இத்துடன், ட்யூப்லெஸ் டயர் இப்பைக்கில் சிறந்த இயக்கத்திற்காக வழங்கப்பட்டிருக்கின்றது. இது பாதுகாப்பான மற்றும் பஞ்சரில்லா பயணத்தை வழங்க உதவும்.

பஜாஜ் நிறுவனம் இந்த பைக்கில் 102சிசி திறன் கொண் 4 ஸ்ட்ரோக், சிங்கிள் சிலிண்டர், எஸ்ஓஎச்சி, ஏர் கூல்டு எஞ்ஜினையே பயன்படுத்தியிருக்கின்றது. இந்த எஞ்ஜின் அதிகபட்சமாக 7,500 ஆர்பிஎம்மில் 7.9 பிஎஸ் பவரையும், 5500 ஆர்பிஎம்மில் 8.34 என்எம் டார்க்கையும் வெளியேற்றும் திறனைக் கொண்டது.

இந்த எஞ்ஜின் 4 ஸ்பீடு கியர்பாக்ஸில் இயங்குகின்றது. பைக்கின் கவர்ச்சியான தோற்றத்திற்காக இரு விதமான நிற தேர்வுகளை பஜாஜ் வழங்குகின்றது. காக்டெயில் ஒயின் சிவப்பு மற்றும் இபோனி கருப்பு (வெள்ளி நிறத்திலான ஸ்டிக்கர்களுடன்) ஆகிய இரு விதமான நிறத்தேர்விலேயே பஜாஜ் பிளாட்டினா 100 இஎஸ் பைக் அறிமுகம் செய்யப்பட்டுள்ளது.

இதுதவிர பைக்கின் சிறந்த லுக்கிற்காக துள்ளியமான பார்வை திறனை வழங்கக்கூடிய பின்பக்கத்தைப் பார்க்க உதவும் கண்ணாடிகள் மற்றும் முன் பக்கத்தில் பகல் நேர எல்இடி மின் விளக்குகள் உள்ளிட்டவை சேர்க்கப்பட்டிருக்கின்றன. இதுபோன்ற ஏராளமான அம்சங்கள் இப்பைக்கில் இடம்பெற்றிருப்பது குறிப்பிடத்தகுந்தது.

பைக்கின் அறிமுகத்தைத் தொடர்ந்து நாட்டின் அனைத்து டீலர்களிடத்திலும் இப்பைக்கை விற்பனைக்காகக் கொண்டு சேர்த்து வருகின்றது பஜாஜ் நிறுவனம். ஆகையால், அங்கீகரிக்கப்பட்ட டீலர்களிடத்தில் எலெக்ட்ரிக் ஸ்டார்ட் வசதிக் கொண்ட இப்பைக்கை இனி எளிதில் காண மற்றும் வாங்க முடியும்.

தொடர்ந்து, அறிமுக விலையாக பைக்கிற்கு ரூ. 53,920 என்ற மிக குறைந்த விலையையே நிறுவனம் நிர்ணயித்துள்ளது. இது, டெல்லி எக்ஸ்-ஷோரூம் விலையாகும். தினசரி மற்றும் மைலேஜை அதிகம் விரும்பும் வாகன ஓட்டிகளின் தேர்வில் ஒன்றாக இப்பைக் இருக்கின்றது. இப்பைக்கில் கிக் மற்றும் எலெக்ட்ரிக் ஸ்டார்ட் வசதியை நிறுவனம் அறிமுகம் செய்திருப்பது இளைஞர்கள் மத்தியில் மகிழ்ச்சியை ஏற்படுத்தியிருக்கின்றது.

பஜாஜ் பிளாட்டினா 100 எலெக்ட்ரிக் ஸ்டார்ட் பைக்கில் இடம் பெற்றிருக்கும் முக்கிய அம்சங்களின் பட்டியல்:

• நீளமான இருக்கை
• கிக் மற்றும் எலெக்ட்ரிக் ஸ்டார்ட் வசதி
• ஸ்டைலான அலாய் வீல்
• ஸ்மூத் மற்றும் சத்தமே இல்லாத இயக்கம்
• 20சதவீத நீளமான முன் மற்றும் பின்பக்க சஸ்பென்ஷன்கள்
• ட்யூப்லெஸ் டயர்கள்
• பெரிய ரப்பர் கால் வைக்கும் பேட்க்ள்
• எல்இடி டிஆல்எல் ஹெட்லேம்ப்