மூன்று ஸ்பெஷல் எடிசன் டூ-வீலர்களை அறிமுகம் செய்த உலகின் பழமையான மோட்டார்சைக்கிள் நிறுவனம்... ஏன் தெரியுமா?

உலகின் பழமை வாய்ந்த இருசக்கர வாகன தயாரிப்பு நிறுவனங்களில் மோட்டோ குஸ்ஸி-யும் ஒன்று. இந்த நிறுவனமே தற்போது நூறாம் ஆண்டு கொண்டாட்டத்தை கொண்டாடி வருகின்றது. ஆமாங்க இந்த நிறுவனம் இவ்வுலகில் கால் தடம் பதித்து நடப்பாண்டுடன் நூறு ஆண்டுகள் ஆகிவிட்டன.

இந்த வரலாற்று சிறப்புமிக்கு நிகழ்வை முன்னிட்டு புதிய ஸ்பெஷல் எடிசன் இருசக்கர வாகனங்களையும் நிறுவனம் அறிமுகம் செய்திருக்கின்றது. தனது நூற்றாண்டு தினத்தை விழாவாக கொண்டாடுவதோடு நிறுத்திக் கொள்ளாமல் தனது வாடிக்கையாளர்களையும் கவர வேண்டும் என்பதற்காக இந்த சிறப்பு எடிசன் வாகனங்களை மோட்டோ குஸ்ஸி அறிமுகப்படுத்தியுள்ளது.

வி7, வி9 மற்றும் வி85 டிடி எனும் இருசக்கர வாகனங்களையே அது சிறப்பு பதிப்பு இருசக்கர வாகனங்களாக அறிமுகப்படுத்தியிருக்கின்றது. இதனை இவ்வருடம் முழுவதும் விற்பனைச் செய்ய மோட்டோ குஸ்ஸி திட்டமிட்டிருக்கின்றது. பொதுவாக ஸ்பெஷல் எடிசன் வாகனங்கள் என்றால் குறிப்பிட்ட எண்ணிக்கையில் மட்டுமே விற்பனைச் செய்வது வழக்கம்.

ஆனால், இந்த நிலையை மாற்றி இந்த ஆண்டு முழுவதும் ஸ்பெஷல் எடிசன் வாகனங்களை விற்க இருப்பதாக மோட்டோ குஸ்ஸி அறிவித்திருக்கின்றது. இந்த வாகனங்கள் வழக்கமாக விற்பனைக்குக் கிடைக்கும் மோட்டோ குஸ்ஸி வாகனங்களைப் போன்றில்லாமல் சில சிறப்பு கூறுகளைத் தாங்கியிருக்கும். நூற்றாண்டை நினைவுப்படுத்தும் வகையில் ஸ்பெஷல் ஸ்டிக்கர் மற்றும் நிறங்கள் ஆகியவற்றை இது பெற்றிருக்கின்றது.

இதுமட்டுமின்றி, சாடின் ஃபினிஸ்ட் ப்யூவல் டேங்க், தங்க முலாம் பூசப்பட்ட முன் பக்க மட்குவார்ட் போன்ற பல்வேறு ஸ்பெஷல் உடல் கூறுகளையும் இப்பைக்கில் பெற்றிருக்கின்றது. தற்போது வழங்கப்பட்டிருக்கும் இந்த பிரத்யேக அம்சங்கள் மோட்டோ குஸ்ஸியின் பழங்கால தயாரிப்புகளை நினைவுப்படுத்தும் வகையில் அமைந்திருக்கின்றது.

குறிப்பாக, 350 பியல்பெரோ பைக்கைப் போன்று இது காட்சியளிக்கிறது. இது பல்வேறு சிறப்புகளையும், அவார்டுகளையும் நிறுவனத்திற்கு பெற்று தந்த இருசக்கர வாகனம் ஆகும். செப்டம்பர் 9 முதல் 12 வரையிலான தினங்களில் நூற்றாண்டைக் கொண்டாட மோட்டோ குஸ்ஸி திட்டமிட்டிருக்கின்றது.

இந்த நிகழ்வில் பங்கேற்க ஆயிரக் கணக்கான வாகன ஆர்வலர்கள் காத்துக் கொண்டிருக்கின்றனர். மோட்டோ குஸ்ஸி நிறுவனம் 1921ம் ஆண்டிலேயே இந்த உலகில் கால் தடம் பதித்தது. இத்தாலியின் மண்டெல்லோ டெல் லாரியோ எனும் பகுதியையே தலைமையமாகக் கொண்டு தற்போதும் இந்நிறுவனம் இயங்கிக் கொண்டிருக்கின்றது.

2004ம் ஆண்டு ஐரோப்பாவின் மிகப் பெரிய மோட்டார்சைக்கிள் உற்பத்தியாளரான பியாஜியோ குழுமத்தின் பங்குகளை இந்நிறுவனம் வாங்கியது. இதுபோன்ற பல்வேறு வரலாற்று சிறப்புமிக்க செயல்களை இந்நிறுவனம் பல ஆண்டுகளாக உலகில் மேற்கொண்டு வருகின்றது. எனவேதான் இந்நிறுவனத்தின் நூற்றாண்டு தின கொண்டாட்டத்தை எதிர்நோக்கி வாகன ஆர்வலர்கள் காத்துக் கொண்டிருக்கின்றனர்.