அலாய் சக்கரங்களுடன் தயாரிக்கப்படும் 2021 ராயல் என்பீல்டு கிளாசிக் 350!! புதியதாக ஏகப்பட்ட அப்கிரேட்கள்...

தண்டர்பேர்டு 350 பைக்கிற்கு மாற்றாக கடந்த 2020ஆம் ஆண்டின் இறுதியில் கொண்டுவரப்பட்ட மீட்டியோர் 350 பைக்கிற்கு நல்லப்படியான வரவேற்பு அதன் அறிமுகத்தில் இருந்து கிடைத்து வருகிறது.

இதற்கு மிக முக்கிய காரணமாக மீட்டியோர் 350 பைக்கின் வடிவமைப்பிற்கு பயன்படுத்தப்பட்ட புதிய ஜே ப்ளாட்ஃபாரத்தை கூறலாம். இதனால் தான் இதே புதிய ப்ளாட்ஃபாரத்தில் உருவாக்கப்படும் புதிய தலைமுறை கிளாசிக் 350 மற்றும் ஹண்டர் 350 என சில 350சிசி பைக்குகளை அறிமுகப்படுத்த ராயல் என்பீல்டு நிறுவனம் தயாராகி வருகிறது.

இதில் முதலில் வரப்போவது இரண்டாம் தலைமுறை கிளாசிக் 350 பைக் ஆகும். புதிய ஜே ப்ளாட்ஃபாரத்தில் தயாரிக்கப்படுவதினால் வழக்கமான ஒற்றை கீழ்நிலை சேசிஸிற்கு மாற்றாக இரட்டை தொட்டில் சட்டகத்திற்கு அப்கிரேடாக ராயல் என்பீல்டு நிறுவனம் நகர்ந்துள்ளது.

இதன் விளைவாக, புதிய கிளாசிக் 350 பைக்கின் ஹேண்ட்லிங் மேம்பட்டிருக்கும் என்று எதிர்பார்க்கிறோம். இந்த நிலையில் தான் தற்போது காடிவாடி செய்திதளம் மூலமாக புதிய தலைமுறை கிளாசிக் 350 பைக்கின் சோதனை ஓட்ட ஸ்பை படங்கள் நமக்கு கிடைத்துள்ளன.

இந்த படங்களை வைத்து பார்க்கும்போது வெளிப்புறத்தில் இந்த பைக், வட்ட வடிவிலான பின் இருக்கை, பின் இருக்கை பயணி பிடித்து கொள்வதற்கு பின்பக்கத்தில் புதிய பிடிப்பான்கள் மற்றும் க்ரோம் தொடுதல்களுடன் அப்டேட் செய்யப்பட்ட பின்பக்க ஹெட்லைட் & இண்டிகேட்டர் உள்ளிட்டவற்றுடன் சிறிய அளவிலான டிசைன் மாறுபாடுகளை பெற்றுள்ளதை அறிய முடிகிறது.

இவை எல்லாத்தையும் விட முக்கிய அப்கிரேட் ஆக இந்த சோதனை கிளாசிக் 350 பைக்கில் பொருத்தப்பட்டுள்ள அலாய் சக்கரங்களை சொல்லலாம். இவற்றுடன் ட்யுப்லெஸ் டயர்களும் கூடுதல் தேர்வாக வழங்கப்படலாம்.

அதேபோல் 300மிமீ முன் டிஸ்க்கும், 270மிமீ பின்பக்க டிஸ்க் ப்ரேக்கும் பொசிஷன் மாற்றப்பட்டுள்ளன. திருத்தியமைக்கப்பட்டுள்ள டிஜிட்டல் இன்ஸ்ட்ரூமெண்ட் கன்சோல் கூகுளின் மூலம் செயல்படும் ட்ரிப்பர் நாவிகேஷன் சிஸ்டத்திற்கென தனியாக பேட்-ஐ கொண்டுள்ளது.

மீட்டியோர் 350 பைக்கின் மூலம் அறிமுகப்படுத்தப்பட்ட ட்ரிப்பர் நாவிகேஷன் சிஸ்டம் அதன்பின் புதிய தலைமுறை ஹிமாலயனில் வழங்கப்பட்டது. 2021 ராயல் என்பீல்டு கிளாசிக் 350 பைக்கில் சற்று திருத்தம் செய்யப்பட்ட 349சிசி, சிங்கிள்-சிலிண்டர் காற்று-குளிர்விப்பான் என்ஜின் பொருத்தப்பட உள்ளது.

மீட்டியோர் 350 பைக்கிலும் வழங்கப்படும் இந்த என்ஜின் அதிகப்பட்சமாக 19.2 எச்பி மற்றும் 27 என்எம் டார்க் திறனை வெளிப்படுத்தக்கூடியது. இதன் உடன் 5-ஸ்பீடு ட்ரான்ஸ்மிஷன் இணைக்கப்படுகிறது.