2 விதமாக பயன்படுத்திக்கலாம்! இந்தியாவில் அறிமுகமானது வாகன பதிவு தேவைப்படாத ஒகினவா மின்சார ஸ்கூட்டர்!

பிரபல மின்சார இருசக்கர வாகன தயாரிப்பு நிறுவனமான ஒகினவா இரு விதமான பயன்பாட்டு திறன் கொண்ட ட்யூவல் (Dual) எனும் மின்சார இருசக்கர வாகனத்தை இந்தியாவில் விற்பனைக்கு அறிமுகப்படுத்தியுள்ளது. இது ஓர் மொபட் ரக மின்சார ஸ்கூட்டராகும். டிவிஎஸ் எக்ஸ்எல் மொபட்டைப் போன்று இதன் ஸ்டைல் இருக்கின்றது.

இதன் இடத்தைக் காலி செய்யும் நோக்கிலேயே ஒகினவா இந்த மின்சார இருசக்கர வாகனத்தை இந்தியாவில் அறிமுகப்படுத்தியிருக்கின்றது. இதனைத் தேவையென்றால் சரக்கு ஏற்றி செல்லும் வாகனமாகவோ அல்லது இருவர் பயணிக்கும் ஸ்கூட்டராகவோ மாற்றிக் கொள்ள முடியும்.

இதுவே இந்த மொபட் ரக மின்சார இருசக்கர வாகனத்தின் சிறப்பம்சமாகும். இந்த வாகனத்தைக் கொண்டு 200 கிலோ வரையிலான சரக்கு வாகனங்களை ஏற்றி செல்ல முடியும் என்பது குறிப்பிடத்தகுந்தது. இத்தகைய திறன்மிக்க மின்சார வாகனத்திற்கு ஒகினவா மிக குறைந்த விலையையே நிர்ணயித்திருக்கின்றது.

ரூ. 58,998 என்ற விலையே நிர்ணயிக்கப்பட்டுள்ளது. ஜெமோபாய் மிஸோ மின்சார இருசக்கர வாகனத்திற்கு போட்டியளிக்கின்ற வகையில் இதன் விலை மற்றும் அறிமுகம் அமைந்திருக்கின்றது. ஜொமோபாய் மிஸோ மின்சார இருசக்கர வாகனமும் வர்த்தக ரீதியாக பயன்படும் வசதிகளைக் கொண்ட டூ வீலர் ஆகும்.

ஆனால், இதைக் காட்டிலும் கூடுதல் சிறப்பு வசதிகளைக் கொண்ட மின்சார வாகனமாகவே புதிய ஒகினவா ட்யூவல் இருக்கின்றது. இதன் பின்பக்கத்தில் மட்டுமின்றி முன்பக்கத்திலும் லக்கேஜ் ஏற்றி செல்வதற்கான கேரியர் வசதி கொடுக்கப்பட்டிருக்கின்று. ஆனால், இதில் இலகு ரக பொருட்களை மட்டுமே ஏற்றிச் செல்ல முடியும்.

அதேசமயம், பின் பக்க கேரியரில் அதிக எடைக் கொண்ட பொருட்களைக் கூட ஏற்றி செல்ல முடியும். சிலிண்டர், தண்ணீர் கேன், அரிசி மூட்டை என பல விதமான பொருட்களை ஏற்றிக் கொண்டு செல்ல முடியும். இத்தகைய சிறப்பு வசதிகளை இது பெற்றிருக்கின்ற காரணத்தினாலயே வர்த்தக ரீதியாக இயங்கும் நிறுவனங்களுக்கான தயாரிப்பாக இது பார்க்கப்படுகின்றது.

இந்த மின்சார வாகனம் இருவிதமான நிற தேர்வுகள் கிடைக்கும் என தகவல்கள் தெரிவிக்கின்றன. ஃபையர் ரெட் மற்றும் சன்ஷைன் மஞ்சள் ஆகிய நிறங்களில் இது விற்பனைக்குக் கிடைக்கும். இந்த ஸ்கூட்டரில் 250 வாட் திறன் கொண்ட மின் மோட்டாரே பயன்படுத்தப்பட்டிருக்கின்றது. இதன் அதிகபட்ச வேகமே மணிக்கு 25 கிமீ வேகம் ஆகும்.

ஆகையால், இதனை ஓட்ட டிரைவிங் லைசென்ஸ் தேவையில்லை. மேலும், வாகன பதிவு சான்றும் தேவைப்படாது என கூறப்படுகின்றது. மின்சார தேவைக்காக 48W 55Ah திறன் கொண்ட தனியாக பிரித்தெடுக்கக் கூடிய லித்தியம் பேட்டரி பயன்படுத்தப்பட்டிருக்கின்றது. இதனை ஒரு முறை முழுமையாக சார்ஜ் செய்தால் சுமார் 130 கிமீ தூரம் வரை பயணிக்க முடியும்.

மேலும், இதனை முழுமையாகச் சார்ஜ் செய்ய 4 முதல் 5 மணி நேரங்களே போதும். அதேசமயம், பூஜ்ஜியத்தில் இருந்து 80 சதவீதம் சார்ஜ் செய்ய 1.5 மணி நேரங்களே போதும். இதுமட்டுமின்றி, ரிமோட் பங்க்சன் சிஸ்டம், பக்கவாட்டு ஃபூட் ரெஸ்ட், குளோவ் பாக்ஸ் மற்றும் செல்போன் சார்ஜிங் பாயிண்ட் என பல்வேறு சிறப்பு வசதிகள் இதில் வழங்கப்பட்டிருக்கின்றன.

தொடர்ந்து இந்த மின்சார இருசக்கர வாகனத்தின் பக்கம் மக்களைக் கவர வேண்டும் என்பதற்காக சில சிறப்பு சலுகைகளை ஒகினவா அறிவித்திருக்கின்றது. பேட்டரிக்கு 3 வருட வாரண்டி மற்றும் மோட்டாருக்கு 3 வருடங்கள் அல்லது 30 ஆயிரம் கிமீ என்ற வாரண்டியை அது அறிவித்துள்ளது.