டாடா சீப்பான விலையில் தான் எலக்ட்ரிக் காரை உருவாக்கும்னு யார் சொன்னது! இந்த காரை ஓட்டி பார்த்தது தனி அனுபவம்!

டாடா ஹாரியர் EV (Tata Harrier EV), இந்திய மின்சார எஸ்யூவி கார் (Electric SUV Car) சந்தையில் புதியதாக நுழைந்துள்ளது. இதன் எக்ஸ்-ஷோரூம் விலைகள் ரியர்-வீல்-டிரைவ் வெர்சனுக்கு ₹21.5 லட்சம் முதல், அதி-உயர்ந்த குவாட்-மோட்டார் ஆல்-வீல் டிரைவ் மாடலுக்கு ₹30.3 லட்சம் வரை நிர்ணயிக்கப்பட்டுள்ளன.

இரண்டு பேட்டரி பேக்குகள், மேம்பட்ட ADAS அம்சங்கள், 14.5-இன்ச் தொடுதிரை மற்றும் பெரிய பேட்டரி கொண்ட ஹாரியர் இவி எலக்ட்ரிக் காரில் 622 கிமீ வரை பயணிக்கக்கூடிய திறன் ஆகியவை முக்கிய அம்சங்களாகும். டீசல் ஹாரியர் காரிலிருந்து மாறுபட்டு, ஹாரியர் EV இரட்டை-மோட்டார் ஆல்-வீல் டிரைவ் வசதி, பிரீமியம் தரத்திலான உட்புறம் மற்றும் தொழில்நுட்ப வசதிகளில் சிறந்து விளங்குகிறது. இந்த காரின் விமர்சனங்களை இனி விரிவாக காணலாம்.

டாடா ஹாரியர் EV விமர்சனம் - வெளிப்புற வடிவமைப்பு

ஹாரியர் EV காரின் முன் பகுதியில், காரின் உடல் நிறத்திலான கிரில்லுக்கு மேலே LED DRL ஸ்ட்ரிப் ஒன்று காரின் முழு அகலத்திற்கும் உள்ளது. இதன் டைனமிக் இண்டிகேட்டர்கள் DRLகளில் ஒருங்கிணைக்கப்பட்டுள்ளன. முழுமையான LED அமைப்புடன், இரு விதமாக செயல்படக்கூடிய ப்ரொஜெக்டர் ஹெட்லேம்ப்கள், கார்னரிங் விளக்குகள் மற்றும் ஃபாக் விளக்குகள் உள்ளன.

ஹெட்லைட்களுக்கு அருகில் உள்ள ஏர் வென்ட்கள் வெளிப்புற காற்றை உள்ளே வழங்கி பிரேக் மற்றும் டயரை குளிரூட்டல் அடைய செய்கின்றன. இது காரின் ஏரோடைனமிக்ஸை மேம்படுத்துகிறது. காருக்கு முன்பகுதியில் ரேடார் மற்றும் கேமரா வழங்கப்பட்டு இருப்பது லெவல் 2 ADAS அம்சங்கள் காரில் உள்ளன என்பதை குறிக்கிறது.

பக்கவாட்டுப் பகுதி டீசல் ஹாரியரைப் போலவே உள்ளது. எலக்ட்ரிக் கார் என்பதை குறிக்கும் பேட்ஜ்கள் மற்றும் 19-இன்ச் ஏரோ சக்கரங்கள், ரோலிங் சத்தத்தைக் குறைக்கக்கூடிய எலக்ட்ரிக் கார்களுக்கே உண்டான டயர்களுடன் பொருத்தப்பட்டுள்ளன. பியானோ கருப்பு நிறத்திலான காரின் மேற்கூரையில் பொருட்களை கட்டி எடுத்து செல்வதற்கான கம்பிகள் மற்றும் காரை சுற்றிலும் குரோம் இல்லாதது SUVக்கு சுத்தமான, நவீன தோற்றத்தை ஹாரியர் இவி எலக்ட்ரிக் காருக்கு அளிக்கிறது.

காரின் பின்புறத்தில் LED டெயில்லைட்கள், மேற்கூரையில் ஸ்பாய்லர், உயரத்தில் பொருத்தப்பட்ட ஸ்டாப் விளக்கு மற்றும் கருப்பு நிறத்தில் ஹாரியர்.EV பேட்ஜ் வழங்கப்பட்டுள்ளன. கைகளில் இல்லாமல், கால்களிலேயே திறக்கக்கூடிய பூட் பகுதி 502 லிட்டர் கொள்ளளவில் உள்ளது. பொருட்களை வைத்து எடுத்து செல்ல இந்த இடவசதி மட்டுமில்லாமல், காரின் முன்பக்க பொனெட்டிற்கு அடியில் டிரங்க் (frunk) பகுதி ரியர்-வீல்-டிரைவ் வேரியண்ட்களில் 67 லிட்டர் கொள்ளளவிலும், ஆல்-வீல் டிரைவ் வேரியண்ட்களில் 35 லிட்டர் கொள்ளளவிலும் இடவசதியை பெறலாம்.

டாடா ஹாரியர் EV விமர்சனம் - உட்புற வடிவமைப்பு

ஹாரியர் EV-யின் கேபின், சவுகரியமான பயணம் மற்றும் தொழிற்நுட்பங்களின் பயன்பாட்டிற்கு ஏற்ப வடிவமைக்கப்பட்டுள்ளது. பெரிய அளவிலான பனோரமிக் சன்ரூஃப், பின்பக்க ஜன்னல் கண்ணாடிகளில் திரைச்சீலைகள் மற்றும் பெரும்பாலான இருக்கைகளில் கால் வைப்பதற்கு தாராளமான இடவசதியைப் பெற முடிகிறது. இருக்கைகள் வசதியாக உள்ளன, மேலும் நீண்ட பயணங்களின்போது கூடுதல் ஆதரவுக்காக விங்க்லெட்டுகளுடன் சரிசெய்யக்கூடிய தலையணைகளைக் கொண்டுள்ளன.

கப் ஹோல்டர்களுடன் மடிக்கக்கூடிய ஆர்ம்ரெஸ்ட் பின்புறத்தில் வழங்கப்படுகிறது. ஆர்ரெஸ்ட்டை மடக்கிவிட்டு ஒருவர் அந்த இடத்தில் அமரலாம். ஆனால், அவருக்கு தலையணை கிடைக்காது. "பாஸ் மோட்" செயல்பாடு பின்புற பயணிகளுக்கு முன் பயணிகள் இருக்கையை மின்னணு முறையில் சரிசெய்ய அனுமதிக்கிறது. பின்புற பயணிகள் 65W ஃபாஸ்ட்-சார்ஜிங் டைப்-சி போர்ட்கள் மற்றும் கூடுதல் சேமிப்பு இடங்களையும் பெறுகிறார்கள்.

காரின் பின்புறத்தை பார்க்க, முன்பக்கத்தை போல பின்பக்கத்திலும் கேமரா வழங்கப்பட்டு இருப்பதுடன், டிஜிட்டல் ரியர்-வியூ கண்ணாடி (IRVM)-ஐயும் பயன்படுத்தலாம். வயர்லெஸ் ஆப்பிள் கார்ப்ளே, அமேசான் அலெக்ஸாவை ஏற்கக்கூடியதாக 14.5-இன்ச் இன்போடெயின்மென்ட் திரை உள்ள நிலையில், இதன்மூலம் காருக்குள் காலநிலை மற்றும் வாகன அமைப்புகள் உள்ளிட்ட பல கட்டுப்பாடுகளை கட்டுப்படுத்தலாம்.

AC வென்ட்களுக்கு கீழே தொடு-உணர்வு கட்டுப்பாடுகள் உள்ளன. மேலும், இரட்டை-மண்டல காலநிலை கட்டுப்பாடு தரமாக உள்ளது. 360-டிகிரி கேமரா அமைப்பு, வயர்லெஸ் சார்ஜிங் பேட் மற்றும் கூடுதல் ஃபாஸ்ட்-சார்ஜிங் போர்ட்கள் சவுகரியமான கார் பயண அனுபவத்தை உறுதி செய்கின்றன. ஆஃப்-ரோடு மோட் ஆனது பனி, சேறு, மணல், பாறை உள்ளிட்டவற்றில் பயணிக்க வழிவகை செய்கிறது.

மேலும், தனது விருப்பத்திற்கு ஏற்பவும் ஒரு டிரைவிங் மோட்-ஐ டிரைவர் உருவாக்கி கொள்ள முடியும். இவை இல்லாமல், ஈக்கோ, பூஸ்ட் மற்றும் ஸ்போர்ட் என்கிற மூன்று டிரைவ் மோட்களும் உள்ளன. பூஸ்ட் டிரைவ் மோட் ஆனது முழு 390 bhp இயக்க ஆற்றலை வழங்கும். இரு முன் இருக்கைகளும் காற்றோட்ட வசதியுடன், மின்னணு முறையில் சரிசெய்யக்கூடியவை ஆக உள்ளன.

கார்பன் ஃபைபரை ஒத்த அமைக்கப்பட்ட டிரிம்மைக் டேஷ்போர்டு கொண்டுள்ளது; இது பிரீமியம் உணர்வை சேர்க்கிறது. தட்டையான அடிப்பகுதியை கொண்ட ஸ்டீயரிங் சக்கரம் சாய்க்க கூடியதாக உள்ளது. மற்றும், ஸ்டேரிங் சக்கரத்தில் ஒளிரும் லோகோக்கள் மற்றும் சில கண்ட்ரோல்கள் உள்ளன. B-பில்லரில் மற்றும் கேபினுக்குள் உள்ள சென்சார்கள் மூலம் NFC கார்டு அல்லது ஸ்மார்ட்போன் மூலம் சாவியில்லாமல் காருக்குள் நுழையலாம்.

டாடா ஹாரியர் EV விமர்சனம் - விவரக்குறிப்புகள் & பரிமாணங்கள் - பேட்டரி, பவர் மற்றும் ரேஞ்ச்

ஹாரியர் EV இரண்டு பேட்டரி பேக் விருப்பங்களுடன் கிடைக்கிறது: 65 kWh மற்றும் 75 kWh என்பன அவை ஆகும். காரின் ரியர்-வீல்-டிரைவ் வேரியண்ட்களை இதில் ஏதேனும் ஒரு பேட்டரியுடன் வாங்கலாம். ஆனால் குவாட்-மோட்டார் ஆல்-வீல் டிரைவ் வேரியண்ட் பெரிய 75 kWh பேக் உடன் மட்டுமே வழங்கப்படுகிறது. இந்த 75kWh பேட்டரியை கொண்ட எலக்ட்ரிக் மோட்டார் 390 bhp மற்றும் 505 Nm டார்க்கை உருவாக்குகிறது.

மேலும் 6 வினாடிகளுக்குள் 0-100 km/h வேகத்தை எட்டும். 65 kWh பேட்டரியுடன் கூடிய ரியர்-வீல்-டிரைவ் வேரியண்ட்டில் 538 கிமீ வரை பயணிக்க முடியும் எனவும், 75 kWh பேட்டரி உடன் 622 கிமீ வரை பயணிக்க முடியும் எனவும் தெரிவிக்கப்பட்டுள்ளது. பெரிய பேட்டரி கொண்ட ஆல்-வீல்-டிரைவ் மாடல் 500 கிமீ-க்கும் அதிக தொலைவிற்கு செல்லும்.

டாடா ஹாரியர் EV விமர்சனம் - ஓட்டுநர் அனுபவம் - சாலை மற்றும் ஆஃப்-ரோடு செயல்பாடு

ஹாரியர் EV, குறிப்பாக பூஸ்ட் டிரைவ் மோடில், விரைவான முடுக்கத்தை வழங்குகிறது. மேலும், நகரம் மற்றும் நெடுஞ்சாலைகளில் ஓட்டுவதற்கு ஏற்ற செயல்திறனைக் வழங்குகிறது. சஸ்பென்ஷன் சுமூகமான பயணத்திற்கு ஏற்ப வடிவமைக்கப்பட்டுள்ளது. இருப்பினும், கனமான பேட்டரி பேக் மற்றும் SUV பாடி ஸ்டைல் காரணமாக பயணத்தின்போது சில நேரங்களில் காருக்குள் குலுக்கல்களை எதிர்கொள்ள வேண்டியதாக இருந்தது.

ஆல்-வீல் டிரைவ் ஹாரியர் இவி காரில், பல்வேறு நிலப்பரப்புகளுக்கு தேர்ந்தெடுக்கக்கூடிய டிரைவ் மோட்களுடன், உண்மையான ஆஃப்-ரோடு திறனை பெற முடிகிறது. பிரேக்கிங் செயல்பாடு போதுமானதாகவும், நான்கு டிஸ்க் பிரேக்குகள் மற்றும் ஆறு ஏர்பேக்குகள் பயணிகளுக்கு பாதுகாப்புக்கான உணர்வையும் வழங்குகின்றன. இருப்பினும், ஆரம்பத்தில் பெடல் உணர்வு மென்மையானதாக இருக்கலாம், மேலும் சில ஓட்டுநர்களுக்கு அதனை சரிசெய்ய வேண்டியதாக இருக்கலாம்.

சார்ஜிங் ஆப்ஷன்களை பொறுத்தவரையில், 3.3 kW சுவர் சார்ஜர் (75 kWh பேட்டரியை முழுமையாக சார்ஜ் செய்ய சுமார் 30 மணிநேரம்), 7.2 kW ஹோம் சார்ஜர் (12-15 மணிநேரம்) மற்றும் 120 kW DC ஃபாஸ்ட் சார்ஜர் (சுமார் 25 நிமிடங்களில் 0-80%) ஆகியவை அடங்குகின்றன. டாடா-வின் நகர்ப்புற மையங்களில் உள்ள 60 kW ஃபாஸ்ட் சார்ஜர் நெட்வொர்க் (Fast Charger Network) பெரும்பாலான பயனர்களுக்கு டாப்-அப்களை வசதியாக்குகிறது.

டாடா ஹாரியர் EV விமர்சனம் - தீர்ப்பு மற்றும் இறுதி எண்ணங்கள் - மதிப்பு மற்றும் பயன்பாடு

டாடா ஹாரியர் EV மற்ற எலக்ட்ரிக் கார்களுக்கு சவாலான விலையில், ரேஞ்ச், செயல்திறன் மற்றும் அம்சங்களின் சரியான கலவையை வழங்குகிறது. எலக்ட்ரிக் எஸ்யூவி கார் என்கிற அடையாளத்துடன், நீண்ட தூரம் பயணிக்கக்கூடிய திறன் மற்றும் ஆல்-வீல் டிரைவ் விருப்பத்துடன், விசாலமான, வசதியான மற்றும் நன்கு பொருந்திய குடும்ப வாகனத்தை விரும்புவோருக்கு டாடா ஹாரியர் இவி ஏற்றது.

நவீன வடிவமைப்பு, மேம்பட்ட பாதுகாப்பு அம்சங்கள் மற்றும் நடைமுறை சார்ஜிங் தீர்வுகள் ஆகியவற்றுடன், இந்த பிரிவில் எலக்ட்ரிக் எஸ்யூவி காரைத் தேடும் எவரும் ஹாரியர் EV-ஐ கருத்தில் கொள்ள வேண்டும். டாடா-வின் விரிவான சேவை நெட்வொர்க் மற்றும் EV ஆதரவுக்கான அர்ப்பணிப்பு ஆகியவை அதன் கவர்ச்சியை மேலும் அதிகரிக்கும்.