மாருதி சுஸுகி ஸ்விஃப்ட்

மாருதி சுஸுகி ஸ்விஃப்ட் வெளிப்புற மற்றும் உட்புற டிசைன்

இந்தியர்கள் மனதை கொள்ளை கொண்ட ஹேட்ச்பேக் கார் மாடல் மாருதி ஸ்விஃப்ட். மூன்றாம் தலைமுறை மாடலாக விற்பனையில் இருக்கும் ஸ்விஃப்ட் கார் 2021 மாடலாக மேம்படுத்தப்பட்டு விற்பனையில் வைக்கப்பட்டுள்ளது. இந்த காரில் முன்புற க்ரில் அமைப்பில் சிறிய மாற்றங்களுடன் க்ரோம் பட்டையுடன் புதுப்பொலிவு கொடுக்கப்பட்டு இருக்கிறது. புரொஜெக்டர் ஹெட்லைட்டுகள், பகல்நேர விளக்குகள், புதிய பம்பர் அமைப்பு, வட்ட வடிவிலான பனி விளக்குள் என பல புதிய மாற்றங்களுடன் தொடர்ந்து சிறந்த டிசைனிலான மாடலாக வாடிக்கையாளர்களை தக்க வைத்து வருகிறது.

பின்புற கதவுகளின் கைப்பிடிகள் ஜன்னல் சட்டத்திலேயே இயைந்து கொடுக்கப்பட்டு இருப்பது முக்கிய சிறப்பு. பக்கவாட்டில் கருப்பு வண்ண சி பில்லர் மற்றும் புதிய அலாய் வீல்கள் இதன் கவர்ச்சியை கூட்டுகிறது. இந்த காரின் பின்புறத்தில் புதிய எல்இடி டெயில் லைட் க்ளஸ்ட்டர் உள்ளது.

மாருதி சுஸுகி ஸ்விஃப்ட் எஞ்சின் மற்றும் செயல்திறன்

2021 மாடலாக விற்பனைக்கு கொண்டு வரப்பட்ட மாருதி ஸ்விஃப்ட் காரில் பழைய 1.2 லிட்டர் பெட்ரோல் எஞ்சினுக்கு பதிலாக 1.2 லிட்டர் டியூவல்ஜெட் பெட்ரோல் எஞ்சின் பயன்படுத்தப்பட்டு இருக்கிறது.

இந்த எஞ்சின் அதிக செயல்திறன் மற்றும் மைலேஜை வழங்கும் சிறப்பம்சங்களை பெற்றிருக்கிறது. இந்த எஞ்சின் அதிகபட்சமாக 89 பிஎச்பி பவரையும், 113 என்எம் டார்க் திறனையும் வழங்கும்.

பழைய மாடலைவிட செயல்திறன் கூடி இருக்கிறது. இதன் எஞ்சின் மென்மையான அனுபவத்துடன் போதிய செயல்திறனை வழங்குவதால் உற்சாகமான ஓட்டுதல் அனுபவத்தை தரும்.

மாருதி சுஸுகி ஸ்விஃப்ட் மைலேஜ்

2021 மாடலாக வந்துள்ள புதிய மாருதி ஸ்விஃப்ட் காரின் மேனுவல் மாடல் லிட்டருக்கு 23.2 கிமீ மைலேஜையும், ஏஎம்டி ஆட்டோமேட்டிக் கியர்பாக்ஸ் மாடல் லிட்டருக்கு 23.76 கிமீ மைலேஜையும் வழங்கும் என்று தெரிவிக்கப்படுகிறது. அதாவது, ஆட்டோமேட்டிக் மாடல் கூடுதல் மைலேஜை வழங்கும் என்பது குறிப்பிடத்தக்க விஷயமாக கூறலாம்.

மாருதி சுஸுகி ஸ்விஃப்ட் முக்கிய அம்சங்கள்

இந்த காரில் முழுவதுமான கருப்பு வண்ண இன்டீரியர் கொடுக்கப்பட்டு இருக்கிறது. தட்டையான அடிப்பாகம் கொண்ட ஸ்டீயரிங் வீல், 7 அங்குல தொடுதிரையுடன் கூடிய ஸ்மார்ட்பிளே இன்ஃபோடெயின்மென்ட் சிஸ்டம், வட்ட வடிவிலான ஏசி வென்ட்டுகள், க்ரூஸ் கன்ட்ரோல் சிஸ்டம், காரை நிறுத்தும்போது தானியங்கி முறையில் மடங்கிக் கொள்ளும் வெளிப்புற ரியர் வியூ மிரர்கள் ஆகியவை முக்கிய அம்சங்களாக கூறலாம். இன்ஸ்ட்ரூமென்ட் க்ளஸ்ட்டரில் சிறிய அலங்கார விஷயங்கள் செய்யப்பட்டு இருக்கின்றன.

புதிய மாருதி ஸ்விஃப்ட் காரில் இரண்டு ஏர்பேக்குகள், ரியர் பார்க்கிங் சென்சார்கள், இபிடியுடன் கூடிய ஏபிஎஸ் பிரேக்கிங் சிஸ்டம், ரியர் பார்க்கிங் கேமரா முக்கிய அம்சங்களாக உள்ளன. அனைத்து ஏஎம்டி கியர்பாக்ஸ் கொண்ட வேரியண்ட்டுகளிலும் ஹில் ஹோல்டு அசிஸ்ட் மற்றும் எலெக்ட்ரானிக் ஸ்டெபிளிட்டி புரோகிராம் நிரந்தர பாதுகாப்பு அம்சமாக உள்ளது.

மாருதி சுஸுகி ஸ்விஃப்ட் தீர்ப்பு

இந்திய ஹேட்ச்பேக் கார் மார்க்கெட்டில் தன்னிகரற்ற அம்சங்கள் கொண்ட மாடலாக மாருதி ஸ்விஃப்ட் கார் உள்ளது. டிசைன், மைலேஜ், கையாளுமை, வசதிகள் என அனைத்தும் மிகச் சரியான விலையில் கிடைப்பதால் வாடிக்கையாளர்களுக்கு சிறந்த தேர்வாக அமைந்து வருகிறது. ரீசேல் மதிப்பும் அதிகம் இருப்பதால் ஹேட்ச்பேக் கார் வாங்க விரும்புவோரின் முதல் சாய்ஸாக கூறலாம்.