ஹோண்டா அமேஸ்

ஹோண்டா அமேஸ் விமர்சனம்

ஹோண்டா அமேஸ் வெளிப்புற மற்றும் உட்புற டிசைன்

காம்பேக்ட் செடான் கார் சந்தையில் மிக முக்கிய தேர்வாக ஹோண்டா அமேஸ் கார் விளங்குகிறது. கடந்த 2013ம் ஆண்டு இந்தியாவில் விற்பனைக்கு கொண்டு வரப்பட்ட இந்த கார் 2016ம் ஆண்டு புதுப்பொலிவு கொடுக்கப்பட்டது. இதையடுத்து, கடந்த ஆண்டு முற்றிலும் புதிய வடிவமைப்பு கொள்கையில் இரண்டாம் தலைமுறை மாடலாக இந்தியாவில் களமிறக்கப்பட்டது.

முதல் தலைமுறை மாடலில் இருந்து வடிவமைப்பு முற்றிலும் மாறியதோடு, வடிவத்திலும் பெரிய காராக மாறியிருக்கிறது. முகப்பில் வலிமையான க்ரோம் சட்டத்துடன் கூடிய க்ரில் அமைப்பு, அழகிய ஹெட்லைட்டுகள், பகல்நேர விளக்குகள் இதன் முகப்பை மிக மிக வசீகரமாக காட்டுகிறது.

பக்கவாட்டில் பாடி லைன்கள் மிக அழுத்தமாகவும், கம்பீரத்துடன் கொடுக்கப்பட்டுள்ளது. பிற கார்களை போல அல்லாமல், பூட் ரூம் ஒட்ட வைத்தது போல அல்லாமல், மிக இயல்பாக இயைந்து சென்று ஒரு முழுமையான செடான் காருக்குரிய தோற்றத்தை தருகிறது. அலாய் வீல்கள் அழகு சேர்க்கின்றன. பின்புறத்தில் சி வடிவிலான டெயில் லைட் க்ளஸ்ட்டர் காருக்கு சரியான அளவில் கொடுக்கப்பட்டு இருக்கிறது. மொத்தத்தில் சிறந்த டிசைன் உடைய காம்பேக்ட் செடான் கார் மாடலாக கூற முடியும்.

உட்புறம் மிகவும் பிரிமீயமாக உள்ளது. சிட்டி காரில் இருக்கும் டிசைன் அம்சங்கள் பிரதிபலிக்கின்றன. டேஷ்போர்டு கருப்பு மற்றும் பீஜ் வண்ணத்தில் கொடுக்கப்பட்டுள்ளது. இன்டீரியர் டிசைன் மிக எளிமையாகவும், நேர்த்தியாகவும் உள்ளது.

ஹோண்டா அமேஸ் எஞ்சின் மற்றும் செயல்திறன்

ஹோண்டா அமேஸ் கார் 1.2 லிட்டர் பெட்ரோல் எஞ்சின் மற்றும் 1.5 லிட்டர் டீசல் எஞ்சின் தேர்வுகளில் கிடைக்கிறது. இதில், 1.2 லிட்டர் பெட்ரோல் எஞ்சின் அதிகபட்சமாக 87 பிஎச்பி பவரையும், 109 என்எம் டார்க் திறனையும் வெளிப்டுத்தும். டீசல் எஞ்சின் அதிகபட்சமாக 98 பிஎச்பி பவரையும், 200 என்எம் டார்க் திறனையும் அளிக்கும்.

பெட்ரோல் மற்றும் டீசல் மாடல்கள் 5 ஸ்பீடு மேனுவல் கியர்பாக்ஸ் அல்லது சிவிடி ஆட்டோமேட்டிக் கியர்பாக்ஸ் தேர்வுகளில் கிடைக்கும். டீசல் சிவிடி மாடல் எஞ்சின் அதிகபட்சமாக 79 பிஎச்பி பவரையும், 160 என்எம் டார்க் திறனையும் வழங்கும். மேனுவல் மாடலைவிட சற்றே குறைவாக இருக்கிறது.

ஹோண்டா அமேஸ் மைலேஜ்

ஹோண்டா அமேஸ் காரின் பெட்ரோல் மேனுவல் கியர்பாக்ஸ் மாடலானது லிட்டருக்கு 19.5 கிமீ மைலேஜையும், சிவிடி மாடல் லிட்டருக்கு 19 கிமீ மைலேஜையும் வழங்கும். டீசல் மேனுவல் மாடல் லிட்டருக்கு 27.8 கிமீ மைலேஜையும், சிவிடி மாடல் 23.8 கிமீ மைலேஜையும் வழங்கும் என்று நிறுவனம் தரப்பில் தெரிவிக்கப்படுகிறது.

ஹோண்டா அமேஸ் முக்கிய அம்சங்கள்

ஹோண்டா அமேஸ் காரில் 7.0 அங்குல தொடுதிரையுடன் கூடிய இன்ஃபோடெயின்மென்ட் சிஸ்டம் வழங்கப்படுகிறது. மல்டி இன்ஃபர்மேஷன் திரையுடன் கூடிய புதிய இன்ஸ்ட்ரூமென்ட் க்ளஸ்ட்டர் உள்ளது. பெட்ரோல் சிவிடி மாடலில் பேடில் ஷிஃப்ட் வசதியும் கொடுக்கப்படுகிறது. ஆட்டோமேட்டிக் க்ளைமேட் கன்ட்ரோல், க்ரூஸ் கன்ட்ரோல், புஷ் பட்டன் ஸ்டார்ட், ஷார்க் ஃபின் ஆன்டெனா ஆகியவை முக்கிய அம்சங்களாக உள்ளன.

இந்த காரில் இரண்டு ஏர்பேக்குகள், இபிடியுடன் கூடிய ஏபிஎஸ் பிரேக்கிங் சிஸ்டம், பார்க்கிங் சென்சார்கள் அனைத்து வேரியண்ட்டுகளிலும் நிரந்தரமாக கொடுக்கப்படுகிறது. ஐசோஃபிக்் சைல்டு சீட் மவுண்ட்டுகள், சென்ட்ரல் லாக்கிங், ரியர் டீஃபாகர் உள்ளிட்ட வசதிகளும் இடம்பெற்றுள்ளன.

தீர்ப்பு

ஹோண்டா அமேஸ் காரின் முக்கிய அம்சமாக டிசைன் மற்றும் பிரிமீயமான இன்டீரியரை கூறலாம். மேலும், போதுமான தொழில்நுட்ப வசதிகள், பின் இருக்கையில் அதிக இடவசதியும் இதனை முன்னிறுத்தும் விஷயம். இந்த காரில் டீசல் மாடலில் சிவிடி கியர்பாக்ஸ் தேர்வு வழங்கப்படுவதும் கவனிக்கத்தக்க விஷயம். அனைத்து விதத்திலும் நிறைவை தரும் கார் மாடலாக இருக்கிறது.