நிஸான் மேக்னைட்

நிஸான் மேக்னைட் வெளிப்புற மற்றும் உட்புற டிசைன்

பெரும் எதிர்பார்ப்புக்கு மத்தியில் புதிய நிஸான் மேக்னைட் எஸ்யூவி அறிமுகம் செய்யப்பட்டு இருக்கிறது. சப்-காம்பேக்ட் எஸ்யூவி மார்க்கெட்டில் மிக குறைவான விலை தேர்வாக இந்த புதிய எஸ்யூவி வந்துள்ளது. டிசைன், வசதிகள், எஞ்சின் தேர்வுகள் போன்ற விஷயங்களிலும் நிறைவை தரும் வகையில் அமைந்துள்ளது.

புதிய நிஸான் மேக்னைட் எஸ்யூவியில் முகப்பில் மிக பிரம்மாண்டமான க்ரில் அமைப்பு பொருத்தப்பட்டு இருக்கிறது. மெல்லிய எல்இடி புரொஜெக்டர் ஹெட்லைட்டுகள், L வடிவிலான எல்இடி பகல்நேர விளக்குகள், பனி விளக்குகள், ஸ்கஃப் பிளேட் ஆகியவை காரின் முகப்பை மிக வசீகரமாக காட்டுகிறது.

புதிய நிஸான் மேக்னைட் எஸ்யூவியில் பக்கவாட்டு டிசைனும் கவர்ந்து இழுக்கிறது. இந்த காரின் 16 அங்குல டைமண்ட் கட் அலாய் வீல்கள், பெரிய வீல் ஆர்ச்சுகள், கருப்பு வண்ண பிளாஸ்டிக் கிளாடிங் சட்டங்கள் ஆகியவை காருக்கு மிக வசீகரமான தோற்றத்தை தருகிறது. சில்வர் வண்ண ரூஃப் ரெயில்களும் இந்த காரின் மிக முக்கிய விஷயமாக இருக்கிறது.

நிஸான் மேக்னைட் காரின் பின்புறத்தில் மேக்னைட் பெயர் மிகப்பெரிய எழுத்துக்களில் கொடுக்கப்பட்டு இருப்பது பிரிமீயம் கார் போல காட்டுகிறது. அதேபோன்று, அழகிய டெயில் லைட் க்ளஸ்ட்டர்கள், வலிமையான பம்பர் அமைப்பு, ரூஃப் ஸ்பாய்லர், சில்வர் வண்ண ஸ்கஃப் பிளேட் ஆகியவையும் சிறப்பு சேர்க்கிறது.

புதிய நிஸான் மேக்னைட் எஸ்யூவியின் உட்புறமும் மிக அட்டகாசமாக இருக்கிறது. வசீகரமான டேஷ்போர்டு அமைப்பு, 8 அங்குல தொடுதிரையுடன் கூடிய இன்ஃபோடெயிமென்ட் சிஸ்டம், லெதர் உறையுடன் கூடிய ஸ்டீயரிங் வீல், தரமான இருக்கை கவர்கள் ஆகியவற்றுடன் மிக சிறப்பான இடவசதியை பெற்றிருக்கிறது.

நிஸான் மேக்னைட் எஞ்சின் மற்றும் செயல்திறன்

புதிய நிஸான் மேக்னைட் எஸ்யூவியில் இரண்டு எஞ்சின் தேர்வுகள் கொடுக்கப்படுகின்றன. இந்த எஸ்யூவியில் சாதாரண 1.0 லிட்டர் பெட்ரோல் எஞ்சின் அதிகபட்சமாக 71 பிஎச்பி பவரையும், 96 என்எம் டார்க் திறனையும் வழங்கும். 5 ஸ்பீடு மேனுவல் கியர்பாக்ஸ் தேர்வில் கிடைக்கும்.

அடுத்து, டர்போசார்ஜர் கொண்ட 1.0 லிட்டர் பெட்ரோல் எஞ்சின் அதிகபட்சமாக 99 பிஎச்பி பவரையும், 160 என்எம் டார்க் திறனையும் வழங்கும். 5 ஸ்பீடு மேனுவல் அல்லது சிவிடி கியர்பாக்ஸ் தேர்வுகளில் கிடைக்கும்.

நிஸான் மேக்னைட் மைலேஜ்

புதிய நிஸான் மேக்னைட் எஸ்யூவியின் 1.0 லிட்டர் பெட்ரோல் எஞ்சின் லிட்டருக்கு 18.75 கிமீ மைலேஜை வழங்கும். 1.0 லிட்டர் டர்போ பெட்ரோல் எஞ்சின் மேனுவல் மாடல் லிட்டருக்கு 20 கிமீ மைலேஜையும், சிவிடி மாடல் லிட்டருக்கு 17.7 கிமீ மைலேஜையும் வழங்கும் என்று தெரிவிக்கப்படுகிறது. இந்த காரில் 40 லிட்டர் கொள்திறன் கொண்ட பெட்ரோல் டேங்க் உள்ளது.

நிஸான் மேக்னைட் முக்கிய அம்சங்கள்

புதிய நிஸான் மேக்னைட் எஸ்யூவியில் எல்இடி புரொஜெக்டர் ஹெட்லைட்டுகள், எல்இடி பகல்நேர விளக்குகள், 8 அங்குல தொடுதிரையுடன் கூடிய இன்ஃபோடெயின்மென்ட் சிஸ்டம், ஆப்பிள் கார் ப்ளே, ஆன்ட்ராய்டு ஆட்டோ செயலிகளை வயர்லெஸ் முறையில் இணைக்கும் வசதி, முழுமையான டிஜிட்டல் இன்ஸ்ட்ரூமென்ட் க்ளஸ்ட்டர், வயர்லெஸ் சார்ஜர், ஏர்பேக்குகள், இபிடியுடன் கூடிய ஏபிஎஸ் பிரேக்கிங் சிஸ்டம், ஹில் ஸ்டார்ட் அசிஸ்ட், க்ரூஸ் கன்ட்ரோல், பிரேக் அசிஸ்ட், டிராக்ஷன் கன்ட்ரோல் என வசதிகளுக்கு பஞ்சமில்லை.

நிஸான் மேக்னைட் தீர்ப்பு

எஸ்யூவி வாங்க வேண்டும் என்ற கனவில் மிக குறைவான பட்ஜெட் கொண்டவர்களுக்கு அதிசிறந்த தேர்வாக புதிய நிஸான் மேக்னைட் அமைந்துள்ளது. எஞ்சின், வசதிகள், விலை என அனைத்திலும் சிறந்த மதிப்பை வழங்கும். ஆனால், நிஸான் நிறுவனத்தின் விற்பனைக்கு பிந்தைய சேவை தரம் வாடிக்கையாளர்களை தயங்க வைக்கும் விஷயமாக இருக்கிறது.